Македонија
Да се обезбедат сензори за континуирано мерење гликемии и инсулински пумпи за лицата со дијабетес во Македонија, бара СЗДСМ

Сојузот на здруженијата на лицата со дијабетес на Македонија (СЗДСМ) ги повикува сите пратеници во Собранието, како и креаторите на здравствените политики во Владата, да му дадат приоритет на здравјето на над 3.500 граѓани, кои живеат со тип 1 дијабетес (Т1Д) во РС Македонија, како и на речиси 2.000 лица со тип 2 дијабетес (Т2Д) со здравствени компликации од високите нивоа на шеќер во крвта.
Сојузот ги повикува сите парламентарни групи и пратеници во Собранието на РС Македонија да ги усвои амандманите за одвојување дополнителни средства за набавка на сензори за континуирано мерење гликемии (CGM), како и за инсулински пумпи за да се осигури дека секое лице со T1Д и Т2Д со компликации има пристап до новите технологии кои спасуваат животи.
„Северна Македонија се соочува со предизвици во грижата за дијабетесот, вклучително и ограничен пристап до современи помагала за следење на вредностите на шеќерот во крвта, како и до соодветни третмани. CGM сензорите и инсулинските пумпи се критично важни за управување со дијабетесот. Во моментот се обезбедуваат CGM-сензори за 18,5 % од вкупниот број на лица со тип 1 дијабетес и за 6 % од Т1Д има обезбедено инсулински пумпи. Ова остава илјадници пациенти со тип 1 дијабетес и со тип 2 дијабетес со компликации да не може да имаат корист од благодатите на овие нови технологии.
Зошто CGM се од суштинско значење?
Ако се направи т.н. Cost-Benefit анализа (анализа на трошоците во однос на придобивките) за обезбедување CGM-сензори за лица со дијабетес тип 1 и за лицата со тип 2 дијабетес со компликации, ќе се заклучи дека долгорочните финансиски придобивки од користење на CGM-сензорите ја надминува повеќекратно почетната инвестиција во смисла на подобрени здравствени резултати и намалени вкупни трошоци за здравствена заштита“, велат од Сојузот на здруженијата на лицата со дијабетес на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во текот на вчерашниот ден санкционирани 865 возачи, 128 за неносење заштитен шлем

Вчера во рамки на активностите на полициските службеници од сите осум сектори за внатрешни работи при БЈБ на МВР, а во врска со засилените сообраќајни контроли за почитување на сообраќајните правила и прописи на патиштата низ државава, беа издадени 865 платни налози, извести МВР.
Според статистичката евиденција по однос на сторените прекршоци согласно Законот за безбедност на сообраќајот на патиштата, и натаму меѓу најбројните се прекршоците на непрописно паркирање (213), потоа прекршоците по основ на движење со неприлагодена брзина од дозволената (117), како и прекршоците по основ на непоседување на возачка дозвола (110).
Покрај ова, вчера беа изречени и 128 прекршочни платни налози за мотоциклисти по основ на неносење заштитен шлем, потоа во четири случаи казнети се алкохолизирани возачи, седумина возачи минале на црвено светло, а прекршочни пријави заработиле и петмина пешаци.
Исто така по основ на неносење сигурносен појас изречени се 47 прекршочни казни, по основ на недозволено говорење на мобилен телефон при возење – 25. Согласно, пак, Законот за возила од сообраќај се исклучени 33 нерегистрирано возило како и 10 технички неисправни возила, соопшти МВР.
Македонија
МНР ја демантира партијата Левица: Паушални и целосно неточни наводи кои не соодветствуваат со фактичката состојба

Министерството за надворешни работи и надворешна трговија категорично ги демантира неточните информации изнесени од страна на политичката партија „Левица“, поврзани со работењето на Конзулатот на Република Северна Македонија во Њу Џерси.
„Станува збор за паушални и целосно неточни наводи кои не соодветствуваат со фактичката состојба. Воедно, ја информираме јавноста дека дипломатско-конзуларното претставништво функционира со редовно работно време и е целосно на располагање за сите услуги и потреби на македонската дијаспора во Соединетите Американски Држави“, велат од Министерството.
Македонија
Перински во Зелениково: Инвестирањето во локални проекти е основа за подобар квалитет на живот

Во рамките на иницијативата „Каде што срцето е дома“, министерот за локална самоуправа, Златко Перински, денеска ја посети Општина Зелениково, каде што одржа работна средба со градоначалникот Коста Маневски и членовите на општинскиот Совет. Средбата беше искористена за размена на идеи и ставови во однос на актуелните предизвици со кои се соочува општината, но и за планирање на идни чекори за понатамошен развој и напредок на локалната самоуправа. Фокусот беше ставен на најважните приоритети за подобрување на животните услови на жителите и за унапредување на инфраструктурата.
Една од темите што беше разгледана беше предлогот за измена и дополнување на Законот за локална самоуправа. Министерот Перински истакна дека оваа измена ќе донесе значајни подобрувања во управувањето на сите општини, со зголемена отчетност и транспарентност, што ќе овозможи поефикасни услуги за граѓаните. Според министерот, измените ќе ги зајакнат општините и ќе им овозможат да се справат со предизвиците со кои се соочуваат, создавајќи подобри услови за живот.
Општина Зелениково, која се наоѓа во јужниот дел на Скопската котлина и ја сочинуваат 14 населени места со рурален карактер, сериозно го насочува својот фокус на подобрување на патната инфраструктура. На првиот владин повик за поддршка на инфраструктурни општински проекти, на Општината и беа одобрени три проекти, а на вториот повик, таа аплицираше за седум проекти.
Министерот Перински нагласи дека Владата ќе продолжи да ги поддржува локалните самоуправи и да инвестира во нив што е од големо значење за остварување на заедничките цели за создавање на пофункционални и современи локални заедници. Поддршката од Владата, како што беше нагласено, претставува значителен фактор за успешната реализација на инфраструктурни проекти и за обезбедување на континуиран развој на сите општини и региони. Таа со засилен интензитет ќе продолжи и во иднина во насока на создавање пофункционални општини кои овозможуваат подобро секојдневие за сите.