Демир Далип, претставник на Египќаните, реагира на тврдењата на претседателите на шесте здруженија на Египќаните од Охрид, Струга, Кичево, Ресен и Битола  дека Демир Далип во медиумите лажно се претставува како нивен претставник, а никој не го овластил да зборува во нивно име.

Реакцијата ја пренесуваме интегрално:
,,Во целост ги отфрлам обвиненијата што доаѓаат од одредени здруженија на Египќани кои имаат за цел да ме дефокусираат од легитимната борба за влез на Египќаните во Преамбулата на Уставот, и притоа не бирајќи средства да ги повредат моите чест, углед и достоинство. Имено, се работи за конструирано соопштение, а за тоа говори и фактот што Општинското здружение на Египќани – Кичево јавно се огради, бидејќи било доведен во заблуда и манипулиран нивниот претседател, Рушан Бајрамоски.Исто така, Нијази Тајип е претседател на огранокот на ПЦЕР-Охрид, а истовремено е потписник и со зло(употреба) на печати на две здруженија, од кои едното е регистрирано во Австралија, и истото не е поддржано од мнозинството Египќани во Австралија, а плус тоа, законски е недозволиво истовремено да си претседател на огранок на партија партиципиент во Власта и да бидеш претседател на две здруженија.

Едноставно, јасно е која е целта, да се елиминира Демир Далип како човек кој во континуитет 20 години се залага за правата на Египќаните и кој во последните 6 месеци имаше средби со највлијателните амбасадори, Самоел Жбогар, со високи претставници на Мисијата на ОБСЕ, со францускиот амбасадор Кристијан Тимоние, со заменик-амбасадорот на Германија, други меѓународни организации и тврдам, под секаков вид одговорност, дека не сум остварил никаков личен интерес, туку целта била, е и ќе биде да се прикаже фактичката состојба на Египќаните и мојата одлучност да бидат спомнати во Преамбулата на Уставот.

Јас сум легитимен претставник на мнозинството Египќани, во период од 2008-2017 како национален координатор на НВО ‘Светла иднина 2009’- Охрид, НВО ‘Подобар живот’, неформалната граѓанска иницијатива ОПЕМ, кои настапуваа под заеднички наслов НВО ‘Коалиција на Египќани’, а од страна на истите бев назначен за нивни претставник во 2013-2014, координатор за надворешна соработка на НВО ‘Форца Египќани’.
Во период 2017-2018 фунционира неформалната граѓанска иницијатива НГИ ‘Коалиција на Египќани’ зад која стојат потписи на 200 граѓани.

Должен сум да ѝ служам на етничката заедница на Египќаните, а за ваквите конструирани соопштенија и закани кои доаѓаат од одредени центри на моќ ќе бидат известени сите амбасади и ОБСЕ во Република Македонија”, се вели во дописот.