Македонија
Демократски сојуз: Ковачевски и Маричиќ водат партиска кампања со државни пари

Демократскиот сојуз најостро реагира против кампањата на СДСМ „Ние сме Европа“, која е финансирана од Владата, а на неа присуствуваат само партиски активисти.
Демократскиот сојуз ги поддржува сите активности поврзани со евроинтеграциските процеси, насочени кон коренити реформи, јакнење на демократијата, борба против корупцијата и организираниот криминал, но со пари на граѓаните да организирате предизборна кампања, тоа е спротивно на Изборниот законик, велат од ДС.
– На трибините плукате по сите што не ве поддржуваат во авантурата со уставни промени во услови кога за седум години не спроведовте ниту една реформа, ниту пак имате резултати, велат од партијата.
Тие додаваат дека со оваа кампања власта продолжува да ги манипулирате граѓаните дека со Преговарачката рамка е решен македонскиот јазик, а не е, дека историските, образовните и идентитетските прашања не се дел од рамката, а се, и дека освен уставни измени, Бугарија нема други барања, а има.
– Колку повеќе „притискате“ толку повеќе граѓанскиот отпор се зголемува, едноставно кредибилитет немате и немате поддршка од народот. Граѓаните се за ЕУ, но над 85 % се против Владата на СДСМ и ДУИ и против уставните промени. За уставни промени се само платените функционери од СДСМ и ДУИ. Затоа наместо да губите време и натаму да ги загрозувате националните и државните интереси и да ги блокирате евроинтеграциите, прифатете избори. Народот нека се изјасни, порачуваат од ДС.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето утре претпладне сончево, попладне пороен дожд и грмежи

Времето утре претпладне ќе биде сончево со умерена облачност. Попладне променливо облачно, на повеќе места ќе биде нестабилно со пороен дожд и грмежи, локално во форма на невреме со пообилен пороен дожд, грмежи, засилен ветер и изолирана појава на град, информира УХРМ.
Минималната температура ќе биде во интервал од 6 до 11, а максималната ќе достигне од 19 до 26 степени.
Во Скопје, променливо облачно, попладне во делови од котлината ќе има развој на нестабилна облачност со пороен дожд, грмежи и засилен ветер. Минималната температура ќе се спушти до 9, а максималната ќе достигне до 26 степени.
Под влијание на влажна и нестабилна воздушна маса во текот на оваа седмица времето ќе биде променливо облачно и нестабилно со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Македонија
Судот ја одби гаранцијата од милион евра на Асмир Јахоски

Судот ја одби гаранцијата од еден милион евра на бизнисменот Асмир Јахоски, осомничен за перење пари, во замена да биде пуштен од притвор.
„Кривичниот совет на одделението за гонење организиран криминал и корупција при Основниот кривичен суд Скопје, постапувајќи по предлог на А.Ј., осомничен за перење пари и други приноси од казниво дело, поднесен преку неговиот бранител, за замена на мерката притвор со гаранција, по одржана седница и извршен увид во целокупните списи на предметот, донесе решение со кое предлогот на осомничениот се одбива како неоснован“, соопшти Кривичниот суд.
Имено, судот, ценејќи ги сите околности поврзани со истрагата, и покрај даденото позитивно мислење на јавниот обвинител, смета дека во овој момент сe уште постојат околностите за постоење на определената мерка притвор односно околности кои укажуваат дека може да ја попречи истрагата со влијание на сведоците како и дека може да сокрие, фалсификува или уништи трагите на кривичното дело, од причина што истражната постапка сеуште е во тек и сеуште се преземаат други истражни дејствија за прибирање докази.
Против ова решение странките имаат право на жалба пред Апелациониот суд Скопје во рок од 3 дена од приемот на истото.
Македонија
Граѓаните да бидат внимателни и да не отвораат сомнителни пораки, апелира МВР

Министерството за внатрешни работи ја известува јавноста дека до неколку граѓани и правни лица, од страна на сторители што лажно се претставуваат во име на МВР и ЕВРОПОЛ, се упатени лажни покани во врска со наводна тековна истрага.
„Апелираме до граѓаните да не наседнуваат на ваквите измами, а Секторот за компјутерски криминал при МВР веќе презема соодветни мерки и активности за законско санкционирање на сторителите“, велат од МВР.
Секторот за компјутерски криминал апелира до граѓаните и правните субјекти да не отвораат прикачени документи во прилог на пораки што не доаѓаат од верификувани и за нив познати испраќачи, да не наседнуваат на измами од ваков тип и правните субјекти да преземат соодветни мерки за заштита на нивните компјутерски системи од потенцијален малициозен софтвер во согласност со нивните интерни процедури за сајбер-безбедност.