Македонија
Демократски сојуз: Со францускиот предлог бугарските барања стануваат европски
Демократскиот сојуз изразува сериозни резерви за францускиот предлог за деблокада на почетокот на преговорите за членство на Македонија во ЕУ затоа што, како што наведуваат од партијата, тој во суштина ги апсорбира националистичките и негаторските барања на Бугарија и билатералниот спор, преку преговарачката рамка, го претвора во спор помеѓу Македонија и Европската Унија.
„Според документите кои досега ги објавија медиумите, Предлог-преговарачката рамка за почеток на евроинтеграцискиот процес и предлог-заклучоците на Советот на Европската Унија, јасно е дека барањата на Бугарија стануваат дел од преговарачката рамка на ЕУ и од нивното исполнување ќе зависи нашиот напредок кон Европа. Тоа значи дека нашите евро-интеграции стануваат заложник на антимакедонските интереси во Софија, овојпат со европски печат.
Очигледно е дека предлогот е резултат на претходно усогласување на претставници на владите на Македонија и Бугарија, но фактот што постојат или се најавени повеќе документи кои се однесуваат на спорот, протоколи што треба да ги потпишат двете земји, како и Акциски план, кои треба во детали да опишат што се треба да направи Македонија, во суштина значи прифаќање нов договор, покрај постоечкиот Договор за добрососедство и пријателство, чие исполнување сега ќе го мониторира Европската Унија.
Со новиот договор на перфиден начин се оспорува македонскиот идентитет, историјата и јазикот и истовремено не се нудат гаранции дека Бугарија ќе престане да излегува со нови барања, уцени и блокади. Конечниот став ДС ќе го изгради по добивањето на интегралниот текст на предлогот и негова подлабинска анализа“, велат од партијата на Павле Трајанов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Манасиевски: Со Орце Ѓорѓиевски и мнозинството во Советот ќе ги поставиме темелите на промените за Скопје
Членот на Централниот комитет на ВМРО-ДПМНЕ, Валентин Манасиевски, денес изјави дека на претстојните локални избори на 2 ноември, скопјани ќе изберат „пред сè човек, а потоа и градоначалник“ кој знае да работи за граѓаните, истакнувајќи дека кандидатот на ВМРО-ДПМНЕ, Орце Ѓорѓиевски, е вистинскиот избор за чисто и модерно Скопје.
„Со Орце Ѓорѓиевски и мнозинството во Советот ќе ги поставиме темелите на промените што му се потребни на главниот град“, рече Манасиевски, додавајќи дека поддршката од над 91.000 граѓани во првиот изборен круг е голема чест и уште поголема обврска.
Тој нагласи дека довербата од граѓаните е резултат на реални резултати кои Ѓорѓиевски ги покажа на локално ниво во Кисела Вода, како и на државно ниво, каде што Владата предводена од ВМРО-ДПМНЕ во изминатите 16 месеци значително помогна во развојот на општините.
Манасиевски потенцираше дека мнозинството во Советот на Град Скопје ќе овозможи стабилност, координација и побрзо реализирање на ветените проекти – нови мостови, почист воздух, повеќе зелени површини и поефикасен јавен превоз.
Во однос на опозицијата, тој оцени дека СДСМ како „петта партија во Скопје со околу 26.000 гласови“ доживеала сериозен пад и покажала дека нема доверба кај граѓаните.
„Наместо да понудат аргументирана критика или решенија на проблемите, тие продолжуваат по истата погрешна насока“, рече Манасиевски.
„Разликата е јасна – ВМРО-ДПМНЕ е партија која работи чесно, одговорно и транспарентно, а нашите ветувања се реални и остварливи“, додаде тој.
На крајот Манасиевски порача:
„На 2 ноември изборот е едноставен, а тоа е вистинскиот избор – глас за Орце Ѓорѓиевски, глас за бројот 9, за твојот човек, за твоето место, за твојата иднина.“
Македонија
„Влен“: ДУИ е на дното на бунарот
Политичката коалиција ВЛЕН соопшти дека „во секој агол на земјата се чувствува еуфорија кај граѓаните дека ДУИ конечно завршува“, нагласувајќи дека „по повеќе од 20 години лошо владеење, измама и ароганција, Албанците се разбудија и бараат вистински промени“.
Во соопштението се наведува дека ВЛЕН е „најдобар пример за модерна албанска политика – без притисоци, уцени и закани“.
„Комуницираме со граѓаните, ги слушаме нивните грижи и работиме за секое населено место, за секое семејство. Блиску сме до народот, а не сме заклучени во канцеларии и бункери на власта“, стои во соопштението.
Според ВЛЕН, ДУИ „е на дното на бунарот“, а секојдневно се открива „нивниот срамен договор со Левица“, кој, како што се наведува, „го предава интересот на Албанците за лична моќ“.
„Ова јасно се виде на 19 октомври, кога граѓаните им ја изрекоа првата казна. Но, конечниот удар ќе дојде на 2 ноември, во Тетово, Дебар, Долнени, Брвеница и насекаде каде што Албанците одлучија да го затворат поглавјето на ДУИ“, се додава во соопштението.
Од ВЛЕН истакнуваат дека, за разлика од политиката на навреди, тие водат кампања „со почит и достоинство кон Албанците“.
„ВЛЕН не ги навредува Албанците, не ги нарекува ‘загари’ и ‘газиместан’ како Али Ахмети, туку ги почитува со достоинствено претставување и секојдневна работа.“
Коалицијата порачува дека верува во „достоинство, единство и политика што му служи на граѓанинот, а не на личниот џеб“.
„ВЛЕН е новиот дух, силата на промените и печатот дека Албанците ќе имаат чист, силен и искрен глас на секое ниво на власт. На 2 ноември, сите заедно да го затвориме старото поглавје и да ја започнеме новата ера на Албанците со ВЛЕН“, завршува соопштението.
Македонија
Левица: Кандидатите на „Вреди“ шират шовинистичка реторика
Политичката партија Левица изрази загриженост поради, како што наведува, шовинистичката реторика на кандидатот за градоначалник на Брвеница од ВРЕДИ, Хаќим Рамадани, кој, според партијата, „предизвикува етнички тензии и шири национал-шовинизам“.
„Скандалозните изјави на кандидатот за градоначалник на Брвеница од ВРЕДИ – Хаќим Рамадани, предизвикуваат етнички тензии и шират национал-шовинизам, во очигледно отсуство на проекти и визија за развој на сопствената општина“, се наведува во соопштението на Левица.
Според партијата, Рамадани во јавно обраќање од дијаспората „наместо да говори за проекти, со шовинистичка реторика го глорифицирал сепаратизмот на Илирида“, со што „директно промовира национална и етничка омраза против македонскиот народ“.
Левица посочува дека Рамадани потврдил дека во општина Брвеница е обединет со ДУИ во вториот изборен круг против кандидатот на ВМРО-ДПМНЕ. Според партијата, премиерот Христијан Мицкоски одбира да молчи за да го сочува мирот во сопствената влада и прашува дали ќе остане нем набљудувач пред изјави на коалиционите партнери кои шират омраза против македонскиот народ и глорифицираат сепаратизам против унитарниот карактер на државата.

