Македонија
Денеска е Бадник, ден полн со традиции и радост пред Божиќ

Православните христијански верници во Македонија денеска го слават Бадник, ден пред големиот празник Рождество Христово – Божиќ. Овој празник ја носи радоста на Христовото раѓање и се одбележува со традиционални обичаи.
Одбележувањето на Бадник во Скопје ќе започне пред Соборниот храм „Свети Климент Охридски“ и ќе биде организирано од Здружението на граѓани „Одбор за традиционална прослава на Бадник“. Кум на оваа годинашна прослава е Радомир Макеларски, кој ќе го понесе ќупот за Бадник 2025, а здравичар е Атанас Петров, кој на платото пред Соборниот храм ќе ја изрече традиционалната здравица во пресрет на Божиќ.
Во текот на денот, свештениците од Соборниот храм ќе ги осветат нафората и чајот, како и бадникарските гранчиња, кои ќе им се делат бесплатно на присутните. Овие гранчиња, кои годинашните кумови и здравичарот традиционално ги набраа на падините на Водно, се симбол на среќата и здравјето на семејството. Со мотото „Пренеси ја Божиќната радост до секое срце!“, децата на Бадник ќе организираат поворки во Скопје и други градови низ земјата, пејќи ја песната „Вечниот Бог“.
Еден од најзначајните настани во Скопје ќе биде формирањето на најдолгата бадникова поворка, која ќе тргне пред Музејот на Град Скопје и ќе се движи низ улицата „Македонија“. Поворката ќе заврши на Плоштадот во Скопје, каде што ќе се одржи голем Божиќен концерт и креативни работилници за децата, на кои секое дете ќе може да изработи своја ѕвезда, што ќе ја зачува за следната година. За сите деца ќе бидат подготвени повеќе од 3.500 коледарски пакетчиња.
Во текот на Бадниковата вечер, семејствата го почитуваат обичајот на заедничка вечера. Трпезата е богата со посни јадења, а домаќинот ја благословува пред да почне вечерата.
Обичајот бара дел од храна да се остави за Бога и куќата. За здравје на семејството, во огнот се става бадниково гранче, што се смета за најздраво дрво. Гранчињата се украсуваат во домовите, како симбол на среќата, љубовта и светлината, кои треба да ја исполнат нивната празнична атмосфера.
Овие обичаи го носат духот на Божик и ја потврдуваат радоста и заедништвото кои се основа на празнувањето на Христовото раѓање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.