Македонија
Дарлишта и градоначалникот на Бутел плански ја блокираа „Комунална“ за да глумат спасители, рече советничката Витина

Независната советничка во Град Скопје, Ирена Витина, упати обвинувања до поединци од ВМРО-ДПМНЕ поради блокадата и бунтот во ЈП „Комунална хигиена“ и хаосот што настана со ѓубрето во Скопје.
На вонредната седница во Советот на Град Скопје посветена на состојбите во „Комунална“, Витина рече дека граѓаните треба да ја знаат вистината оти се прават сценарија, се организираат групи да блокираат за некој да се претставува како спасител.
„На 23 мај, директорката Косана Мазнева подели откази на вработени кои не доаѓале на работа, а тоа е право на секој директор. На 25 мај се случува средба на една група во којашто главните дејанија ги имаат Дарлишта – претседател на сидникална организација и еден градоначалник на општина Бутел кој е сопартиец и братучед на еден спасител на Градот Скопје, градоначалник во една друга општина, добар инфлуенсер од Кисела Вода“, рече Витина посочувајќи дека на таа средба бил договорен планот да се блокира претпријатието.
Витина застана во одбрана на Мазнева, велејќи дека директорката макотрпно работи и се бори со опструкции, остварувајќи го своето легитимно право како прв човек на институцијата да води сметка кој доаѓа, а кој не доаѓа на работа. Советничката тврди дека на протестите пред Јавното претпријатие викендов имало и членови на ВМРО-ДПМНЕ кои не се вработени таму.
„Тоа беше киднапирано претпријатие само за да не може да функционира. За некој да биде прогласен за неспособен и неодговорен. На кого е опозиција ВМРО-ДПМНЕ на Данела Арсовска или на Владата? Ова е класичен дефокус, класично замајување и држење во кондииција на членството“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Надлежните со препораки до граѓаните поради најавата за температури до 39 степени во периодот до 13 август

Министерството за здравство информира дека според најновата прогноза од Управата за хидрометеоролошки работи (УХМР), од 8 до 13 август 2025 година се очекува значително зголемување на дневните температури, кои на некои места ќе достигнат и до 39 степени Целзиусови.
Поради тоа, Министерството апелира до граѓаните да ги почитуваат препораките за заштита од топлотен удар: престој во разладени простории, внесување на доволно течности, избегнување на алкохол и засладени пијалаци, носење лесна и светла облека, како и ограничување на физичката активност во најтоплите часови.
Особено внимание треба да се посвети на ризичните групи — деца, стари лица, лица со хронични заболувања и бремени жени.
Во случај на појава на симптоми како вртоглавица, главоболка, гадење или забрзан пулс, веднаш треба да се побара медицинска помош.
Министерството ја следи состојбата и ќе постапува според потребите.
Според најавата на УХМР, времето денес ќе биде сончево со мала до умерена локална облачност. Ќе дува слаб до умерен ветер од северероисточен правец. Максималната температура ќе биде во интервал од 30 до 37 степени.
Македонија
Четири различни цени за паркинг во Клинички, просторот ќе се прошири двојно

Министерот за здравство, Азир Алиу, информира дека во Клиничкиот центар ќе има четири различни влезови со различни ценовници за паркирање – бесплатен за онколошки пациенти, поевтин за пациенти со упат, поскап за вработените и најскап за граѓаните кои доаѓаат по други причини. Договорот за управување со паркингот ќе го потпише Министерството со ЈП Градски паркинг.
Се најавува и оптимизација на паркинг просторот, со дупло повеќе места и дополнителни влезови, вклучувајќи и еден кај Кардиологија. Ќе се воведе 24-часовен мониторинг со камери и нов систем за следење на плаќањето и активностите. Доколку оптимизацијата не биде доволна, ќе се размислува за изградба на катна гаража.
Македонија
Образец за пријавување прекршок во случај кога не е овозможен визуелен пристап до струјомерите

Врз основа на официјалниот одговор добиен од Министерството за енергетика, рударство и минерални суровини, Инжинери на Република Македонија (ИНРМ) изработи урнек за поднесување на претставка до Државниот инспекторат за енергетика, рударство и минерални суровини, кој може да го користи секој граѓанин што смета дека му е повредено правото на визуелен пристап до сопствениот струјомер.
Министерството потврди дека токму Државниот инспекторат за енергетика е надлежен за спроведување инспекциски надзор во случаите кога операторот на електродистрибутивниот систем (ЕВН Македонија АД) не овозможува пристап до мерниот уред, што претставува повреда на член 164 став (1) точка 19 од Законот за енергетика. Истовремено, овој прекршок е санкциониран со глоба од 1.000 до 3.000 евра во денарска противвредност согласно член 286 од истиот закон.
Со цел да се олесни поднесувањето на пријави од страна на граѓаните, ИНРМ изработи шаблон што секој засегнат корисник може слободно да го преземе, пополни и достави по електронски пат или редовно по пошта.
Претставката е достапна на следните линкови:
🔗 ИНРМ веб-страница (преземање на документи):
https://www.inzenerinarm.com/prevzemanje-dokumenti
🔗 Facebook група на ИНРМ каде е објавен документот:
https://www.facebook.com/share/p/16P8CmATVr/
Ги повикуваат сите граѓани на кои не им е овозможен директен увид во бројките на сопствениот мерен уред, да го искористат правото на пријавување, со цел да се заштитат како потрошувачи.