Македонија
Дигитален самит: Феноменот на „лажни вести“ е намерно поткопување на демократските процеси

Обемната агенда на Дигиталниот самит за земјите од Западен Балкан беше заокружена со посебна работилница за појавата на лажните вести, како неизбежна, нус-појава од глобалната дигитализација.
Модератор на оваа завршна сесија беше министерот за надворешни работи, Никола Димитров, кој по воведното излагање му даде збор на министерот без ресор во Владата на Република Македонија, задолжен за отчетност, транспарентност и комуникации, Роберт Поповски, кој се осврна на изминатиот период и ефектите од системската дистрибуција на лажни вести во нашата земја.
„Нема поголем непријател на вистината од лагата, но истовремено вистината е најдобар одговор на лажните вести“, истакна тој и потоа се фокусираше на следните чекори кои Владата планира да ги преземе во справувањето со овој феномен.
Поповски изрази поддршка за оние кои работат во сферата на истражувачкото новинарство во земјата и информираше дека Владата веќе презеде мерки, како дел од реформите во медиумите, за да се подобрат состојбите во новинарството, а со тоа и за борбата со лажните вести.
Метју Џејкобс од Бирото за Европа и Евроазија со американскиот Стејт департмент, и одговорен за борбата против лажните вести во оваа институција, го дефинираше феноменот на „лажни вести“ како намерно поткопување на демократските процеси. Неговата анализа беше дека корисниците се тие што ги актуелизираат лажните вести, а не ботовите и други автоматизирани дигитални процеси. Во однос на чекорите што треба да бидат преземени, тој истакна дека решението мора да биде фокусирано на корисниците, а не на автоматските процеси. Џејкобс заврши со заклучокот дека владите генерално мора да се подобрат во дигиталната комуникација и дека координирана дигитална соработка е клучна во овој процес
Новинарката и филмски продуцент Рејчел Рајт од Би-би-си информираше дека во оваа медиумска куќа постои цел оддел кој работи на проверка на фактите за осигурување дека информациите кои се пласираат се точни.
„Работата на новинарите е да бидат објективен филтер на случувањата околу нас, но феноменот ‘лажни вести’ го поткопува овој процес“, рече таа и заврши со заклучокот дека новинарите треба да ги „тренираат“ граѓаните да бидат еден своевиден тип на новинари, во процесот на барање на вистината и фактите.
Ерик Брнс, комуникациски и медиумски стратег, изведе заклучок дека лажните вести се всушност еволуција на дезинформациите и дека „Фејсбук“ денес е главен извор на вести. Тој кажа дека еден фундаментален проблем во целата ситуација е тоа дека луѓето не можат да се согласат околу тоа што се всушност „факти“. Брнс изјави дека има потреба од тоа да се остават новинарите да бидат новинари и дека има потреба други, различни сервиси, да се справат со идентификувањето на фактите.
Паоло Чезарини од Европската комисија на панелот изјави дека овој феномен на лажни вести е далеку поопсежен и подлабок отколку само брендирањето на самиот феномен и дека агендите зад овој феномен се политички и економски. Тој изјави дека лажните вести во голема мера влијаат не само врз новите медиуми туку и врз традиционалните.
Истражувачката новинарка Сашка Цветковска истакна дека секој ден се соочуваме со хиперпродукција на лажни вести и дека се работи за феномен кој сè уште не го познаваме доволно. Нејзиниот предлог е дека решението мора да биде интердисциплинарно и да вклучи различни типови институции.
На крајот од панелот за лажните вести, министерот за надворешни работи, Никола Димитров, заклучи дека оваа сесија на самитот е добар почеток, дека сега е времето да се седне и сериозно да се разговара за стратегија за борба против лажните вести и дека владите во регионот, но и пошироко, во основа треба да бидат фактори за наоѓање на конечно решение.
Инаку, Дигиталниот самит за земјите од Западен Балкан е прв од ваков вид во регионот и се одржуваше од 18-19 април во Скопје, во хотелот „Александар Палас“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Македонецот кој спречи терористички напад во авион: „Реагирав инстинктивно“

На летот од Лондон до Глазгов се случи инцидент, откако еден од патниците извика дека има бомба, со слогани „Смрт за Америка, смрт за Трамп“ и „Алах акбар“. Патникот кој се закани дека ќе постави бомба беше совладан од Зоран Настески, по потекло од Македонија и Србија, кој живее во Велика Британија.
Настески го собори човекот на подот за време на летот и го држеше до слетувањето, кога го презеде шкотската полиција. Во меѓувреме, во Велика Британија е започната истрага за терористичкиот напад. Индискиот „Јутуб“ канал „НДТВ“ објави видео од инцидентот, на кое се гледа моментот кога Настески совладува патник кој извикува дека има бомба и го навредува американскиот претседател Доналд Трамп.
View this post on Instagram
„Вчера наутро тргнав на одмор во Глазгов. Десет минути пред слетувањето, еден човек помина покрај мене држејќи кафе и телефон во рацете. На почетокот се плашев дека ќе ми истури топло кафе, па се засолнив. Потоа почна да вика дека има бомба и дека ќе го собори авионот, за да докаже дека политиката на Трамп е погрешна“, вели Настески, пренесува „Телеграф.рс“.
Патниците паничеа, додаде Настески, децата врескаа, а екипажот беше видливо вознемирен.
„Само реагирав инстинктивно, сакав да ги заштитам другите. Станав, го соборив, му го зедов телефонот и го држев за раце додека не слетавме. Набрзо ми помогна друг патник, не сум сигурен дали беше Англичанец или Шкотланѓанец“, рече Настески.
По слетувањето на аеродромот, пожарникарите и полицијата дојдоа на пистата и уапсија 41-годишен маж. Целиот настан го снимила патничка. Видеото набрзо станало вирално на социјалните мрежи.
По десет години работа во Велика Британија, Настески планира да се пресели со својата партнерка во Србија, каде што има семејни корени. Неговиот татко е Македонец, роден во Скопје, а неговата мајка е Србинка.
„Се селам во Белград затоа што ја запознав најпрекрасната жена на светот, Сандра“, рече Настески.
Авиокомпанијата „Изи џет“ објави дека човекот што го предизвикал инцидентот бил уапсен веднаш по слетувањето во Глазгов и дека персоналот на авионот бил обучен да се справува со вакви ситуации, за да не биде доведена во прашање безбедноста на сите во авионот.
Македонија
Започна изградбата на пречистителната станица за отпадни води во Битола

Во општина Битола, денес беше одржан состанок, со кој се означи почетокот на реализацијата на проектот за изградба на пречистителната станица за отпадни води.
Во присуство на претставници на Министерството за животна средина, Министерството за финансии, изведувачот на пречистителната станица конзорциумот Лантаниа-Стентон градба-Карканиас, избраниот надзор- фирмата Ептиса, претставници на КЈП „Нискоградба“ и претставници на општинската администрација, градоначалникот на општина Битола Тони Коњановски, посочи дека овој стратешки еколошки проект е многу значаен чекор кон заштитата на животната средина.
Основната цел на проектот е да се подобри инфраструктурата за собирање и третман на комунални отпадни води, во согласност со директивата за третман на отпадни води и националниот закон. Според договорот, времетраењето на градба е 2 години и една година гарантен период. Со помош на ЕУ, се гради одржлив систем за отпадни води за идните генерации, преку инвестирање во чиста вода и зелени решенија што ќе обликуваат поздрава и поодржлива иднина.
Македонија
Дожд и грмежи вечерва и во раните утрински часови, јавува УХМР

Времето до крајот на денот ќе биде сончево со мала до умерена локална облачност. Ќе дува слаб до умерен, во западните делови западен, а долж Повардарието северен ветер, кој наместа повремено ќе засилува. Кон крајот на денот во северозападните делови облачноста ќе се зголеми и во текот на ноќта и во раните утрински часови ќе има локален дожд, повремено пороен со појава на грмежи и услови за краткотрајно невреме.
Времето утре ќе биде променливо облачно и посвежо, претпладне со повремено пороен локален дожд, грмежи и услови за појава на краткотрајно невреме. Ќе дува слаб до умерен, а наместа долж Повардарието повремено засилен ветер од северозападен правец. Минималната температура ќе биде во интервал од 13 до 22, а максималната ќе достигне од 27 до 35 степеним јавува УХМР.
Во Скопје, променливо облачно, во раните утрински и претпладневни часови со повремен пороен дожд и услови за појава на ретки грмежи. Ќе дува слаб до умерен, попладне во делови од котлината повремено засилен северен ветер. Минималната температура ќе се спушти до 19, а максималната ќе достигне до 33 степени.