Топката е засега кај нас. Ние веруваме дека Грците ќе го направат она што го ветија. Ова е најдобриот компромис што може да се направи, имајќи предвид колку луѓето во двете земји се лути едни на други, изјави министерот за надворешни работи, Никола Димитров во интервју за германскиот весник „Велт“, одговарајќи на прашање околу позицијата на Грција за ратификација на договорот за името.

Во однос на процесите во македонското Собрание, Димитров вели дека можат да се случат уште многу работи до последното гласање за кое повторно ќе биде потребно двотретинско мнозинство.

„За околу два месеца, кога текстот ќе се дебатира и одлучува, повторно ќе ни треба двотретинско мнозинство за да ги ратификуваме промените“, рече Димитров и додаде дека опозициските пратници кои претходно ги поддржа уставните измени поставија услови за да го поддржат и клучното гласање за два месеци.

Министерот во интервјуто се осврна на односите со Москва. Запрашан за анти-НАТО расположението кај Русија во однос на Македонија, Димитров рече дека да се биде дел од НАТО, не мора да значи лош однос со Москва.

„Долгорочно гледано, ние мораме да ги надминеме тензиите меѓу Русија и Западот и повторно тесно да соработуваме со Русија. Предуслов, се разбира, е да се почитува територијалниот интегритет и да се воспостави мир во Украина. Нам, на Европејците, долгорочно гледано ни треба подобар однос со Русија. Не станува збор за или-или. Членството во НАТО не значи да се биде вечно против Русија“, одговори Димитров.

Запрашан за очекувањата од ЕУ и Германија, министерот одговори дека сите сакаме мир и стабилност на Балканот, а за тоа потребни ни се разговорите за пристап со ЕУ.

„Сите ние сакаме мир и стабилност на Балканот, и за тоа ни требаат разговорите за пристап со ЕУ. Самодовербата на ЕУ е разнишана. Проширувањето не е тема, со која во ЕУ може да се добијат избори. Но, неангажирањето во нашиот регион секогаш ќе биде поскапо од ангажирањето. Ние сме остров во средината на ЕУ. Миграциската криза покажа колку е важен регионот за европската безбедност. Сепак, процесот на пристапување функционира само ако не е исполитизиран“, порача Димитров и дополни дека нашата желба е да бидеме третирани согласно заслугите.

Во однос на мигрантската криза и можноста за отворање центри за азил надвор од ЕУ, Димитров рече дека не може да се бара од една земја да го споделува товарот, а не и придобивките.

„Веднаш штом ќе станеме членка на клубот и ги уживаме правата на членство во ЕУ, со задоволство ќе го споделуваме и товарот. Тогаш во целост ќе бидеме способни да ја имплементираме заедничката политика на ЕУ во оваа област“, додаде Димитров.