На последниот ден од работната посета на Париз министерот за надворешни работи, Никола Димитров, имаше обраќање во Фондацијата „Роберт Шуман“ на тема „Европската перспектива на Македонија по договорот со Грција” по што следеше дискусија со поканетите гости, претставници од дипломатскиот кор, политичката и медиумската сфера на Франција.

Димитров се осврна на планот за решавањето на отвореното прашање со Грција, на деликатноста на процесот, изразувајќи оптимизам дека истиот успешно ќе се финализира.

„И покрај многуте предизвици и противења, уверен сум дека по пет години ќе се прашуваме зошто ова не било направено уште на почетокот на деведесеттите. Исто сум уверен дека токму Балканот овој пат ќе покаже дека чудата се можни“, рече Димитров.

Во однос на процесот на проширување, министерот посочи дека е од исклучителна важност ценење на постигнатото низ меритократски принципи, и следната година и формално да се отвори патот на Македонија.

„Крајно време е регионот да почне да се натпреварува на планот на реформи, наместо на планот на историја. И за самата ЕУ, европеизацијата на Балканот е позитивна работа. Потребна е само визија и храброст за донесување големи одлуки со долгорочни придобивки“, додаде Димитров.

Во Националното собрание на Француската Република, министерот Никола Димитров оствари средби со претседателката на Комисијата за надворешни работи, Мариел де Сарнез, и со пратениците Бернар Сор, Лилиана Танги, Фредерик Ле Пети, Седрик Вилани и Жан-Франсуа Елиау. На средбите стана збор за европската перспектива на Република Македонија и за спроведувањето на неопходните реформски приоритети со цел почеток на пристапни преговори со Европската Унија, како и за значењето на поддршката на Франција во тој поглед. Притоа беше заклучено дека европеизацијата на Балканот и консолидацијата на ЕУ се комплементарни процеси.