Заменик-министерот за земјоделство, шумарство и водостопанство, Трајан Димковски, официјално му ја предаде функцијата на новиот министер Љупчо Николовски. Примопредавањето се случи на терен, на откупен пункт на тутун во населбата Драчево. Со ваквото примопредавање праќаме силна порака, секогаш ќе бидеме на терен со земјоделците за заеднички да создаваме мерки и да ги решаваме проблемите, порачаа Димковски и Николовски.

Димковски во изјава за медиумите потенцира дека Николовски е човек што одлично го познава секторот земјоделство, се враќа повторно на министерското место.

„Мене ми е многу драго што имам чест токму јас да му ја предадам функцијата на новиот министер. Пред две години тој ми искажа доверба да продолжам да го водам секторот на негово место, а еве денес токму Николовски се враќа на министерското место“, изјави Димковски и дополни дека во иизминатиот период направено е многу во секторот земјоделство. Тој упати честитки и искажа силно уверување дека новиот тим ќе продолжи да работи посветено за завршување на почнатите проекти и дека сигурно ќе креира нови мерки и нови проекти за развој на земјоделскиот сектор.

Николовски потенцира дека днешеното примопредавање е на терен заедно со земјоделците, со тутунарите, а не во канцеларија, со цел да се прати порака дека оваа пракса ќе се продолжи и во наредниот период.

„Секогаш ќе бидеме на терен со земјоделците, секогаш ќе го слушаме гласот на земјоделците и ќе бараме решение на проблемите. Силно ќе се борам во македонската Влада за секој сектор во рамките на земјоделството да ја зголемуваме поддршката, да правиме нови реформи, да се грижиме, да има повеќе пари за земјоделството, да има подобар пласман, земјата да продолжиме да ја даваме на вистинските земјоделци, да имаме што пониски трошоци за произвдството за што ние треба да се грижиме и државата секогаш да помага. И овој прв ден го почнуваме не во Министерството, туку на терен со средби и ќе продолжиме секој ден со интензивни теренски средби со земјоделците. Само така може да ги дознаеме вистинските проблеми и само така може да наоаѓаме решенија и поддршка за нив“, рече новиот министер за земјоделство, шумарство и водостопанство, Николовски.

Притоа Николовски посочи дека ќе продолжат политиките на ставање во функција на целокупното земјоделско земјиште, сите природни богатства во функција на земјоделството, во функција на руруалниот развој, ќе продолжи грижата за младите земјоделци и што повеќе млади луѓе да се ангажираат во земјоделството, да се изградат модерни откупно-дистрибутивни центри, а државата ќе продолжи да инвестира во овој столб на македонската економија.

Тој дополни дека македонскиот земјоделец, конечно, по 11 години, го доби заслужениот статус во општеството, неговиот труд е препознанен и вреднуван. Од јуни 2017 се воспостави пракса на навремена и неселективна исплата на субвенции. Земјоделците првпат почнаа да ги добиваат субвенциите тогаш кога им се потребни пред почетокот на новата производствена сезона. Првпат за тутунарите го воведовме моделот на повисоки субвенции за тутунот по класи, донесовме нов Закон за тутунот и тутунскиот производи, се укинаа евидентните листови, се уредија и регулираа производството, прометот и контролата на електронските цигари. Се зголемија развојните субвенции за 20 %. Првпат се воведе мерката зелена нафта за 50 отсто кофинансирање на трошоците за набавка на нафта. Решивиме деценски проблеми на земјоделците што се таложеја со години, како што беше исплата на долгот од „Повардарие“ кон лозарите. Се спроведоа многу огласи за земјата да биде кај вистинските земјоделци. Ги мотивиравме младите земјоделците да придонесуваат за овој сектор преку воведување грантови од 20.000 евра, на жените земјоделки со грантови од 3.000 евра. Се почнаа крупни капитални инвестиции во водстопанството. Северна Македонија првпат стана лидер во искористеноста на европските ИПАРД-фондови.

Николовски и Димковски посочија дека и во наредниот период Владата со над 200 милиони евра годишна вкупна финансиска поддршка во земјоделството и руралниот развој ќе ја продолжи поддршката за развојно и одржливо земјоделство.