Македонија
Дипломатскиот синдикат со осуда за изјавата на Османи: „Не е албанофобија, туку повик за професионализам“

Македонскиот дипломатски синдикат најостро ги осудува квалификациите упатени од министерот за надворешни работи Бујар Османи за наводна албанофобија или албанохистерија по повикот на Синдикатот за зачувување на професионалните дипломатски стандарди во Министерството.
Од Синдикатот велат дека тие се и ќе продолжат да бидат последниот бедем и механизам за зачувување на угледот и професионалните стандарди во дипломатската служба.
„Ве повикуваме да не употребувате несоодветна политичка реторика кога се работи за прашања што ги засегаат професионалните дипломати и нивните кариери. Би сакале да Ви укажеме дека бројот на членови на МДС континуирано се зголемува, а воедно во него членуваат дипломати од сите етнички заедни. Ова се должи на нашите континуирани принципиелни заложби за унапредување на статусот и правата на професионалните дипломати“, велат од Дипломатскиот синдикат.
Потсетуваат дека откако Османи ја презел функцијата, упатени се повеќе од педесеттина амбасадори и конзули, како и повеќе од двестотини дипломати, на мандат, а Синдикатот реагира исклучиво кога станува збор за прекршување на Законот за надворешните работи или за крајно спорни решенија.
Од тука повторно го поставија прашањето дали со предлогот за упатување генерален конзул во Њујорк се крши Законот за надворешните работи.
Македонскиот дипломатски синдикат вчера обвини дека министерот Бујар Османи за конзул во Њујорк испраќа штотуку вработен во МНР, кој нема дипломатско звање.
„Еклатантен пример за непочитување на внатрешните регулативи е упатувањето на г. Мухаби Синани на местото генерален конзул во Њујорк, истото она место на кое министерот Османи не успеа да ја упати во тоа време ТВ-презентерката Бесмира Ејупи. Имено, г. Синани, кој од неодамна е вработен во МНР од приватна фирма, не исполнува услови за упатување во странство. Тој минатата недела веќе ги има одбрането тезите за упатување, без притоа да има стекнато високо дипломатско звање, кое е законски услов за именување генерален конзул“, велат од Дипломатскиот синдикат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без струја денеска делови од Аеродром и Сопиште

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 11.00 часот, корисниците од ул. Црноризец Храбар. (општина Аеродром)
– во периодот од 09.00 до 14.00 часот, корисниците од ул. 11 во Горно Соње. (општина Сопиште)
Македонија
Променливо облачно со слаб северен ветер, попладне врнежи од дожд

Променливо облачно со слаб до умерен ветер претежно од северен правец. Попладне ќе има локални врнежи од дожд, кои во текот на ноќта ќе се прошират насекаде и наместа ќе бидат пообилни. Минималната температура ќе биде во интервал од 4 до 14, а максималната ќе достигне од 15 до 20 степен.
Во Скопје, променливо облачно со слаб северен ветер. Кон крајот на денот, а особено во текот на ноќта ќе има врнежи од дожд. Минималната температура ќе се спушти до 10, а максималната ќе достигне до 19 степени.
Времето во наредните денови
До петок под влијание на влажен бран ќе има врнежи од дожд, кои наместа ќе бидат обилни. Вкупно од овој бран се очекува на повеќе места да наврнат над 30 l/m², а локално и над 50 l/m². Поради продор на постудена воздушна маса од север и засилен северен ветер, во четврток на повисоките планини врнежите ќе преминуваат во снег, а поради натамошно спуштање на студен воздух, во петок ќе има услови да преминуваат во снег и на некои од повисоките места. На повисоките планини ќе се формира снежна покривка.Температурата на воздухот значително ќе опадне. Во деновите од викендот ќе има стабилизирање на времето со пораст на дневната температура
Македонија
Дел од Карпош денеска без вода

Од ЈП Водовод и Канализација известуваат дека денеска поради дефект на приклучна цевка на булеварот Партизански Одреди бр. 59а, без вода ќе останат корисниците лоцирани на десната страна на потегот од булеварот 8-ми Септември до Франклин Рузвелт. (општина Карпош)
Водоснабдувањето ќе биде прекинато во периодот од 09.00 часот па се до отстранување на дефектот.