Македонија
Договорени активности за уште поголема афирмација и развој на македонистиката во Полска

Веќе од следната година ќе започнат нови заеднички проекти за уште поголема афирмација на македонскиот јазик, литература и култура во Полска. Цврста е взаемната решеност за поголеми вложувања во развојот на македонистиката на Шлезискиот универзитет во Катовице. Заеднички ќе се работи на остварување веќе конкретни планови за натамошно зголемување на интересот за македонистиката на Факултетот за хуманистика во Сосновјец. Традицијата од 35 години изучување на македонскиот јазик на овој реномиран универзитет обврзува заеднички да се создадат и нови перспективи за полската македонистика.
Ова меѓу другото беше договорено и истакнато на работниот состанок на директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ), проф. д-р Весна Мојсова-Чепишевска со делегација на Факултетот за хуманистика при Шлезискиот универзитет, предводена од директорката на тамошниот Институт за русистика и славистика, проф. д-р Мирослава Михалска-Суханек. На состанокот учествуваа и проф. д-р Роберт Боњковски од Одделот за јужнословенски јазици при Институтот за славистика и доц. д-р Уршула Михалик од Институтот за англистика од Факултетот за хуманистика во Сосновјец, како и проф. д-р Лидија Танушевска и лекторката по полски јазик, Наталија Лукомска од Катедрата за славистика на Филолошкиот факултет „Блаже Конески“ при УКИМ.
Во разговорот на професорите од двете земји беа разменети идеи и беа договорени конкретни активности за натамошно развивање на македонистиката на Шлезискиот универзитет и воопшто во Полска. Особено значајно е што беа договорени активности за поттикнување поголем број нови студенти на Шлезискиот универзитет да се посветат на изучувањето на македонскиот јазик уште во првиот циклус студии, за што клучен ќе е придонесот и на Лекторатот по македонски јазик, кој е темел на изучувањето на македонистиката на Универзитетот. Како што посочија соговорниците, со договорените активности ќе се оствари влог во нови генерации афирматори на македонистиката во Полска, кои во следните децении преку наставата, научната работа и книжевниот превод ќе ги промовираат македонскиот јазик, литература и култура во полската културна средина.
Но, како што беше истанато, исто толку важно е што на Факултетот за хуманистика во Сосновјец има и докторанти по македонски јазик и што полски студенти, македонскиот јазик, мошне интензивно го изучуваат и на вториот циклус, магистерски студии, а како резултат на проектот за модерни славистички студии во кој се вклучени двата универзитета, веќе може да се очекува уште поголем интерес за македонистиката и на овие повисоки академски рамништа. Заради тоа, на состанокот беа прецизирани и активности за заеднички залагања со кои ќе се создадат и нови перспективи за студентите на Шлезискиот универзитет кои македонскиот јазик го изучуваат на повисоко академско рамниште уште повеќе да се вложат во натамошната афирмација на македонистиката во Полска.
Меѓу другото, на состанокот се разговараше и за унапредувањето на наставата по македонски јазик, литература и култура на Шлезискиот универзитет, при што беше посочено дека клучни се учебниците и воопшто материјалите кои ги овозможува МСМЈЛК при УКИМ.
Во текот на следниот семестар од оваа академска година, достојно ќе биде одбележан значајниот јубилеј 35 години македонистика на Шлезискиот универзитет во Катовице. Како што беше истакнато и на состанокот, важно е што одбележувањето на јубилејот ќе се оствари не само со пригодна свеченост, туку и со низа активности кои ќе придонесат за нови научни потфати на полските слависти и македонисти посветени на македонскиот јазик, литература и култура, значајни за натамошниот развој на полската македонистика. Професорите од двете земји разговараа за голем дел од активностите кои по повод јубилејот ќе се остварат на Шлезискиот универзитет, во содејство со МСМЈЛК при УКИМ.
На Шлезискиот универзитет, македонистиката е присутна од академската 1987/88 година, кога започнува со работа Лекторатот по македонски јазик. На Факултетот за хуманистика при Универзитетот има неколку реномирани професори кои се големи посветенци и познавачи на македонистиката, кои и ја држат наставата по македонска литература и по превод од и на македонски јазик. На состанокот беше нагласено дека договорените проекти кои ќе започнат да се остваруваат следната година и воопшто планираните заеднички активности ќе бидат влог и во перспективите на следбениците на овие професори – идните културни амбасадори на нашата земја во Полска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити во Чаир, Касами во Тетово, Бакиу во Скопје – ВЛЕН ги објави кандидатите за градоначалници

Централното претседателство на ВЛЕН ги избра кандидатите за претстојните локални избори. Во Тетово за нов мандат ќе се бори актуелниот градоначалник, Билал Касами. Во Чаир, ќе се кандидира првиот вицепремиер, Изет Меџити, а во Струга, ВЛЕН го поддржува независниот кандидат Менди Ќира.
Во Кичево ќе го кандидира министерот за Социјална политика, Фатмир Лимани, во Дебар кандидат на ВЛЕН ќе биде заменик-директорот на Управата за јавни приходи, Фисник Мела.
Во Градот Скопје, ВЛЕН го предлага директорот на Дирекцијата за општи услуги во Универзитетскиот клинички центар во Скопјe, Башким Бакиу.
Во Сарај, кандидат на ВЛЕН ќе биде директорот на претпријатието „Номагас“, Мухамед Елмази, во Липково директорот на Државните резерви на нафта, Неџмедин Садику, во Арачиново ВЛЕН ќе настапи со Даут Беќири.
Во Желино актуелниот градоначалник на оваа општина, Блерим Сејдиу, во Теарце ќе се кандидира директорот на Бирото за регионален развој, Даут Мемиши, во Боговина, ВЛЕН го кандидира Фети Абази, во Брвеница директорот на Државниот инспекторат за локална самоуправа, Хаќим Рамадани и во Долнени, ВЛЕН ќе се кандидира со наставникот Блерим Ислами од село Цернилиште.
Од ВЛЕН велат дека сè уште нема конечна одлука за кандидатите за општините Гостивар, Врапчиште, Студеничани и Чашка и дека во разговори се со неколку кандидати.
„Тука нагласуваме дека сите овие се кандидати на ВЛЕН и, како што претходно одлучивме, ниту еден од нив не се кандидира под партиско лого. Всушност, освен што се кандидати на ВЛЕН и идни градоначалници на општини, тие ќе бидат слуги на сите граѓани без оглед на етничката, религиозната и политичката припадност“, велат од ВЛЕН.
Македонија
Метеж на границите: на Табановце и Богородица се чека по 45 и 30 минути

Интензитетот на сообраќај на патните правци надвор од градските средини е зголемен, информира АМСМ.
Поради летните одмори се бележи зголемена фреквенција на возила, на ГП Табановце времето на чекање за влез е околу 45 минути додека на ГП Богородица времето на чекање за влез и излез од државата е околу 30 минути.
На останатите гранични премини од македонска страна, нема подолги задржувања за влез и излез од државата.
ВНИМАТЕЛНО: АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делегации на ВМРО-ДПМНЕ во Скопје, Пелинце, Крушево и Ташмаруништа по повод 2 Август, Денот на Републиката

Делегации на ВМРО-ДПМНЕ по повод Денот на Републиката, 2 Август, ќе положат свежо цвеќе на неколку локации низ Македонија, во Скопје, Пелинце, Крушево и Ташмаруништа.
Претседателот на ВМРО-ДПМНЕ, Христијан Мицкоски, ќе ја предводи партиската делегација во Ташмаруништа, каде ќе положи свежо цвеќе заедно со претседателот на ОК на ВМРО-ДПМНЕ Струга и заменик министер за правда, Ален Деребан и пратеникот Јован Јаулески.
Во Скопје на 3 локации, партиската делегација ќе ја предводат градоначалникот на Општина Кисела Вода и кандидат за градоначалник на Град Скопје, Орце Ѓорѓиевски, градоначалникот на Општина Ѓорче Петров, Александар Стојковски и пратеничката, Катерина Димитровска. Тие ќе положат свежо цвеќе пред Споменикот на Претседателот на Крушевската Република, Никола Карев во 10:00 часот, пред споменикот на АСНОМ (парк Жена Борец) во 10:20 часот и пред споменикот на првиот претседател на Президиумот на АСНОМ Методија Андонов-Ченто (плоштад Македонија) во 10:40 часот.
Партиска делегација ќе положи свежо цвеќе и во Пелинце во 11 часот, која ќе ја предводи пратеникот Бране Петрушевски, а во состав на пратеникот и член на ИК, Миле Лефков, како и директорот на Државниот студентски дом Скопје, Александар Каровски.
Во Крушево, партиската делегација ќе положи свежо цвеќе на Споменикот на хероите на месноста „Слива“ во 10 часот и на Мечкин Камен во 12 часот. Делегацијата на ВМРО-ДПМНЕ во Крушево ќе ја предводи Генералниот секретар, Ѓорѓија Сајкоски, а истата ќе биде во состав на претседателот на Унијата на млади сили, Сергеј Попов, претседателката на Унијата на жени, Жаклина Пешевска, членот на ИК, Ристо Симеонов и членот на ИК, Олга Лозановска.
Делегации на Унијата на млади сили, Унијата на жени, Унијата на ветерани и Патриотскиот институт, утре ќе положат свежо цвеќе на бројни локации во општините низ државата.