Македонија
Доделени наградите за најдобри ученици од средните стручни училишта

Министерката за образование и наука, Рената Дескоска ги додели наградите од изборот за најдобар ученик по струки од завршните години –„ЛИДЕР“ од средните стручни училишта во земјава во оваа учебна година, кој четврта година по ред го организира Министерството за образование и наука во соработка со Центарот за стручно образование и обука, и со несебична поддршка на професори од високо образовните установи во државата и претставници на бизнис заедницата.
Натпреварот имаше една единствена цел, а тоа да се поврзат теоријата и практичната работа, за учениците да можат своето знаење да го преточат во изуми, кои подоцна ќе ги користат во наставата. Оваа учебна година за учество во натпреварите се пријавија средношколци од 21 образовен профил од осум струки, односно машинска струка, електротехничка струка, сообраќајна струка, економско – правна и трговска струка, земјоделско – ветеринарна струка, хемиско – технолошка струка, угостителско – туристичка струка и струката лични услуги.
Министерството за образование и наука ги поддржува ученичките активности кои придонесуваат за унапредување на знаењата на учениците и го поттикнуваат натпреварувачкиот дух кај младите. Годинешни добитници на наградите се: Тијана Крстевска СЕПУГС „Васил Антевски Дрен“ Град Скопје економско – правна и трговска, Сања Георгиева СУГС „Димитар Влахов“ Град Скопје лични услуги, Никола Стоименов ССОУ „Коле Неделковски“ Велес електротехничка, Ребека Колевска СОУ “Димитар Влахов“ Струмица хемиско – технолошка, Стефан Делев СОУ „Никола Карев“ Струмица машинска, Антонио Тренески ОЕМУЦ „Св. Наум Охридски“ Охрид сообраќајна, Камелија Илиева СОУ „Кочо Рацин“ Св.Николе земјоделско – ветеринарна и Кристијан Стоимов СОУ „Коле Нехтенин“ Штип угостителско – туристичка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Кичево, поставен првиот млекомат за свежо млеко во државата

Во центарот на Кичево денеска официјално беше ставен во употреба првиот млекомат за свежо млеко во Македонија.
Жителите на Кичево и околината имаат модерен пристап до свежо кравјо млеко произведено од Земјоделската задруга „Крнино“ составена од членови од Манастирот „Св. Богородица Пречиста“.
Млекоматот е обезбеден со средства од Европската Унија преку проектот АгроСмарт, спроведуван од МРФП – Македонската развојна фондација за претпријатија, Хемера и ЦЕП Можности.
„Млекото што се нуди преку млекоматот е свежо, со зачувани природни хранливи својства, без додатоци и конзерванси и во контролирани хигиенски и температурни услови, а освен млеко, потрошувачите имаат можност да си купат и сирење“, рече Станоја Станојовски од Манастирот „Света Богородица Пречиста“, која е дел од Земјоделската задруга Крнино.
„Млекоматот е пример како треба да се одвива модернизацијата на македонските фарми и да се осовременува продажбата на локалните земјоделски производи со достапните средства од Европската Унија“, рече Лазар Неданоски од Македонската развојна фондација за претпријатија, која го спроведува проектот АгроСмарт, финансиран од ЕУ.
На настанот присуствуваше и Цветан Трипуновски, министер за земјоделство, шумарство и водостопанство, кој рече дека модернизацијата на земјоделството е во фокусот и на политиките и програмите на Министерството.
Дел од промоцијата беше и посета на фармата со крави во близина на манастирот „Света Богородица Пречиста“, каде е инсталирана линија за молзење крави и млекарата за производство на млечни производи.
Македонија
„Мицкоски му дели задачи на Орце како што ѝ делеше и на Арсовска“, велат од СДСМ

„Христијан Мицкоски повторно сака да биде во улога на шпицен градоначалник и им дели задачи на кандидатите за градоначалници на ВМРО-ДПМНЕ. Овој пат на Орце Ѓорѓиевски, исто како што беше случајот со Данела Арсовска“, велат од СДСМ.
„Скопјани добро се сеќаваат: кога Мицкоски и Арсовска делеа задачи и бизниси, сè им функционираше. Заедно ветуваа бесплатен превоз, а Мицкоски највуваше 100 нови електрични автобуси, па дури и фабрика за производство.
Но, се скраа за рацете во медот и го заглавија главниот град во хаос.
Последниве четири години со ВМРО-ДПМНЕ на власт во Скопје видовме што значи тоа, целосно игнорирање на интересите на граѓаните. Видовме што значи партијата и партиските интереси да се стават пред здравјето на луѓето, видовме што значи заради политички инает да се уништи градот, претпријатијата и со тоа животот на граѓаните.
Денеска ја гледаме истата шема. Со Мицкоски и Ѓорѓиевски скопјани може да очекуваат нови разочарувања, нов хаос и нови бизнис-договори на грбот на граѓаните.
Скопје заслужува повеќе. Скопјани очекуваат решенија, искреност и политики што носат резултати. Очекуваат чист, уреден, културен град со градоначалник што ќе работи со визија и план, а не нова Арсовска по диктат на Мицкоски“, соопшти СДСМ.
Македонија
Минатата недела „пајакот“ кренал 99 возила во општина Центар

ЈП Паркинзи на Општина Центар во соработка со Сообраќајната полиција-Скопје во периодот од 17.08.2025 до 24.08.2025 година, со помош на специјалните возила „Пајак“ отстранија 99 непрописно паркирани возила кои го попречувале нормалното и безбедно одвивање на сообраќајот.
ЈП ПОЦ и Општина Центар континуирано ќе ја спроведуваат оваа мерка и апелираат до граѓаните да ги почитуваат правилата и прописите и да ги оставаат своите возила само на пропишаните места за да им се овозможи на пешаците и велосипедистите нормално движење по тротоарите и велосипедските патеки, а на возилата безбедно движење по улиците.