Енормната количина собран отпад во општина Кисела Вода во низата акции спроведени годинава укажува на пропусти во системот за управување со отпадот на локално ниво, рече Христина Оџаклиеска, советничката од ДОМ, на дебатата што вчера се одржа во просториите на оваа скопска општина.

Таа ја истакна потребата од почитување на законската регулатива за постапување со отпад и одржување на јавната чистота од сите засегнати страни.

Воведно обраќање на дебатата имаше и Филип Темелковски, градоначалникот на Кисела Вода, кој ја поздрави иницијативата на граѓанскиот сектор и изрази желба за соработка со сите засегнати страни во процесот на справување со дивите депонии.

Во дискусијата учество зедоа граѓани, претставници од невладини организации, инспектори од Град Скопје, претставници од „Комунална хигиена“, правните субјекти лоцирани во близина на дивите депонии, како и лица вработени во Општината, кои работат на оваа проблематика.

Учесниците во дебатата дадоа предлози за: мапирање на сите диви депонии на територијата на Кисела Вода, санирање на дивите депонии и нивно уредување во зелени површини, одредување локација на територијата на општината за одложување градежен шут, набавка на повеќе возила за собирање отпад и зачестена контрола на терен и казнување на лицата што неодговорно постапуваат со отпадот и придонесуваат за создавање на дивите депонии.

Настанот беше организиран во рамките на проектот „План за комуникација и кампања против дивото депонирање отпад“, организиран од НВО „Зелен институт“ – Скопје, со поддршка на Општина Кисела Вода и Министерство за животна средина и просторно планирање.