„Ме радува фактот што изминатиот период интензивните реформски зафати во македонската полиција во сите сегменти од нејзиното функционирање во голема мерка се должат на партнерството и помошта што Министерството за внатрешни работи на Република Северна Македонија во континуитет ја добива од своите меѓународни пријатели и партнери, меѓу кои несомнено, особено по својот обем и квалитет, би сакал да ја потенцирам поддршката од Сојузното министерство за внатрешни работи и татковина на Сојузна Република Германија“, рече министерот за внатрешни работи Оливер Спасовски на денешното примопредавање на донацијата од возила и опрема од Амбасадата на Сојузна Република Германија, вредна 675.000 евра, наменета за Одделот за гранични работи и миграција при Бирото за јавна безбедност на МВР на Република Северна Македонија, а донирани од страна на Канцеларијата за врски на германската Сојузна полиција при Амбасадата на Сојузна Република Германија.

Пред платото на МВР, каде што беше врачена донацијата, министерот Спасовски потенцира дека целокупната донација е опрема од разновиден карактер и има цел во повеќе сегменти да ги подигне капацитетите за работа на граничната полиција за зајакнување и надополнување на техничките аспекти на граничната полиција, со цел нејзино полесно и поефикасно функционирање според современите професионални стандарди и полесно справување со предизвиците во борбата против меѓународните закани и прекуграничниот криминал во согласност со позитивната пракса на ЕУ.

Во делот на подобрување на мобилноста на граничната полиција донирани се: 17 возила, од кои 10 теренски, 3 комби-возила и 4 специјални возила за транспорт на шверцери на мигранти. Во делот на граничниот надзор донирани се термални камери со краток и долг дострел, дневни и ноќни двогледи за зголемена ефикасност и безбедност во постапувањето на припадниците на граничната полиција, уреди за присилно запирање возила – СТИНГЕР и тактички елечиња, а во делот на подобрување на можностите за следење онлајн-обуки – лаптопи и проектори.

„Во име на Министерството за внатрешни работи на Република Северна Македонија да изразам огромна благодарност за несебичните заложби и ангажмани на луѓето од Амбасадата на Сојузна Република Германија и до владата на Сојузна Република Германија, претставувана од амбасадорот во Република Северна Македонија, Анке Холштајн, за оваа за нас мошне значајна помош, но и за континуираната поддршка во нашите зајакнати реформски процеси, со силна увереност дека соработката ќе продолжи и ќе се интензивира и во претстојниот период“, заврши министерот Спасовски.

Амбасадорката на Сојузна Република Германија во земјата, Анке Холштајн, меѓу другото, рече дека соработката меѓу македонските и германските служби се одвива одлично, колегијално и со доверба. „Срдечна благодарност за тоа – нешто на што сите вие може да се гордеете, сега треба таа соработка и понатаму да се надградува“.

„Опремата со која и оваа година сакаме да ја поддржиме и олесниме вашата важна работа до сега беше постојано одговорно и професионално користена. Дополнително, ќе доставиме опрема за присилно запирање возила, која моментно е уште на царина – со тоа би била покриена целата потреба од ваква опрема за присилно запирање возила за граничната полиција во следните години. Благодарение на крајно професионалните обуки, така ми беше кажано, таа беше успешно користена, на пример, минатиот јануари, за време на акција за борба против прекуграничниот криминал“, истакна во своето обраќање германската амбасадорка Холштајн.

Оваа донација е дел од програмата за поддршка од владата на Сојузна Република Германија за МВР – Одделот за гранични работи и миграции, регионалните центри за гранични работи и полициските станици од граничната полиција за 2021 година, но со оглед на отежнатите услови на производство и достава на опремата поради ковид-пандемијата, таа се испорачува денеска.