Јавен обвинител од Основното јавно обвинителство Скопје ја заврши истражната постапка и денеска поднесе Обвинителен акт против три лица за кривично дело – Загрозување на животната средина и природата со отпад од член 230 став 1 од Кривичниот законик.

Тројцата обвинети, на ул.„Зендел Џемаил“ во Скопје, од 2020 година до 02.09.2025 година вршеле дејност – откуп на старо железо, метални производи, стари акумулатори и други обоени метали на импровизирани пунктови – отпади, без означена фирма, без да регистрираат правно лице и без да поседуваат соодветна дозвола за вршење дејност за управување со отпад.

Согласно обезбедените докази, тие вршеле оставање, фрлање и непрописно транспортирање на отпадот, со што создале диви депонии, кои биле констатирани при настанат пожар на дел од локацијата. Со ваквите незаконити дејствија обвинетите влијаеле врз квалитетот на почвата и воздухот и предизвикале опасност по животот и здравјето на луѓето.

Јавниот обвинител до Основниот кривичен суд Скопје достави и предлог за продолжување на претходно определената мерка притвор за тројцата обвинети.

Во врска со причините за настанување на пожарот на Вардариште, ОЈО Скопје издава и повеќе наредби со цел откривање на други сторители на кривични дела.

По наредба на Основното јавно обвинителство Скопје во финална фаза се и вештачењата во однос на сомненијата за загрозување на животната средина со отпадни материи во постапката која се води против сопственичката и неформалниот сопственик на правно лице од Шуто Оризари. Тие подолг временски период, спротивно на законските одредби од Законот за управување со отпад и спротивно на прописите за заштита на животната средина, складирале поголемо количество отпадно железо, електронски отпад, делови од стари автомобили, шасии од стари отпадни возила и друго на локација за која немале соодветна дозвола за управување со отпад.

На 9 јули, на таа локација беше предизвикан неконтролиран пожар на целата маса од складираниот отпаден материјал, а поради обемот и опасноста пожарот не можеше веднаш да биде ставен под контрола. При согорувањето на отпадниот материјал беа испуштени чад, пепел и штетни гасови во амбиенталниот воздух и беше предизвикана опасност за животот и здравјето на луѓето од поголеми размери. По анализа на вештачењата во корелација со сите други прибрани докази, јавниот обвинител ќе донесе одлука и во однос на овој предмет.

За настанатиот пожар на депонијата „Дрисла“ до овој момент до Основното јавно обвинителство Скопје не е поднесено известување или кривична пријава од надлежните органи. Сепак, обвинителството ја следи состојбата и доколку утврди дека со кривично-правни дејствија била загрозена животната средина, ОЈО Скопје веднаш ќе постапи.

На депонијата Дрисла се уште има чадење, информира директорот на ДЗС, Стојанче Ангелов кој појасни дека депониите тешко се гаснат со вода бидејќи внатре се одвиваат хемиски и биолошки процеси кои предизвикуваат појава на запиливи гасови.

На терен, како што рече Ангелов, дејствува ер-трактор кој со посебна пена ќе се обиде да ја ублажи состојбата. Во однос на чадот, Ангелов уверува дека тој е помал во однос на вчерашниот ден и очекува во вечерните часови истиот да биде сосема намален или дека ќе прекине.

Во врска со депонијата Вардариште, Ангелов информира дека на неа нема ниту горење, ниту чад.

„Депонијата Вардариште ќе биде детално обезбедена и веќе е анганжирана агенција за обезбедување а нејзина екипа веќе е на терен на депонијата“, кажа Ангелов.

Најави и дека ќе биде изработен детален план за да се спречи непосакуван влез во неа, и обиди за повторно потпалување, бидејќи како што потсети Ангелов, постојат сомненија дека и Вардариште и Дрисла се намерно потпалени.

Ангелов потсети дека веќе има кривична пријава и притвор за три лица кои користеле диви отпади, а откупувале материјали од оние што палат кабли за да дојдат до металот во нив.

„Со нивното отстранување ќе се обесхрабрат сите што го правеле тоа, затоа што веќе нема да има кој да откупува“, кажа Ангелов.

Сомнителни, незаконски и астрономски скапи набавки правел МНР за време на Бујар Османи, велат од „Вреди“.

„Документите до кои дојдовме јасно укажуваат на сомнителни, незаконски и астрономски скапи набавки при организацијата на министерскиот совет на ОБСЕ во Скопје, во декември 2023 година.
Министерството за надворешни работи склучило договор вреден 56.640.000 денари за изнајмување возила за дводневна конференција. Во договорот, намерно или свесно, не било предвидено внатрешно контролно тело кое ќе потврди колку возила навистина биле користени, кој тип возила бил ангажиран и колку денови“.

Ова, според „Вреди“ отвора сомнежи за класичен модел на злоупотреба и корупција.

„Според документите, цените за изнајмување на возила биле:
• VIP автомобил: 29.000 денари на ден (без ДДВ)
• Возило од средна класа: 23.000 денари на ден (без ДДВ)
• Миниван 8+1: 19.200 денари на ден (без ДДВ)
Да споредиме: само еден месец претходно, МНР склучило друг договор со истиот оператор за редовни потреби на Министерството. Таму, истиот тип VIP автомобил чинел само 9.500 денари со возач, што е три пати пониска цена од цената што Бујар Османи ја одобрил за конференцијата.
Ова е скандалозна злоупотреба – државата плаќала трипати поскапо за исти возила, од истата компанија, во исто време“.

Како што велат од „Вреди“, не станува збор за политички напад но граѓаните мора да знаат какви се политичарите кои лажно им се претставуваат за безгрешни.

Ккао што нагласуваат од таму, Државниот завод за ревизија веќе има нотирано сериозни неправилности во работењето на МНР под водство на Бујар Османи и предметите се доставени до Јавното обвинителство.

„Ова е јасен доказ дека не станува збор за административни грешки, туку за системска корупција на највисоко ниво.
Имаме неколку прашања до Бујар Османи:
Кој го потврдил бројот на возила и реализацијата на договорот?
Зошто цените биле три пати повисоки за исти услуги и од ист оператор?
Кој профитирал од ваквите криминални набавки?
Бујар Османи мора да даде одговори. Ваквиот начин на работење е класичен пример на политичка корупција, расфралње и трошење на државни пари за приватни интереси“.