Македонија
Дојави за бомби по 15 минути настава, учениците се вратија дома

До неколку основни и средни училишта во Скопје и денеска пристигнаа дојави за наводно поставени експлозивни направи.
Наставата траела само 15 минути. По дојавите, објектите се евакуирани, а учениците испратени дома за онлајн да ја продолжат наставата.
Пријави за наводно поставени бомби има и во гимназиите „Јосип Броз Тито“, „Раде Јовчевски-Корчагин“, „Никола Карев“, „Орце Николов“.
Во тек се безбедносни проверки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осомничени уште три лица во предметот „Адитив“: меѓу нив и претседателката на Антикорупциска

Во рамките на постапката што се води за предметот Адитив, како резултат на екстрахираните електронски докази обезбедени во досегашната постапка, предметните обвинители донесоа наредба за спроведување на истражна постапка против три лица, соопшти обвинителството.
До денес обезбедените докази укажуваат дека првоосомничениот бил член на групата што имала за цел вршење на кривични дела Злоупотреба на постапката за јавен повик, доделување на договор за јавна набавка или јавно – приватно партнерство, Злоупотреба на службена положба и овластување и Перење пари и други приноси од казниво дело. Како вработен во едно од обвинетите правни лица, од месец јули 2022 до октомври 2024, со умисла извршил две или повеќе временски поврзани дејствија што претставуваат повеќекратно остварување на исто дело. Искористувајќи ист траен однос и исти прилики и околности, на управителките на обвинетите правни лица им ставил на располагање средства и ги отстранил пречките за кривичното дело, со што им помогнал свесно да ги повредат прописите и да ги изиграат постапките за доделување на договори за јавни набавки. Во периодот од месец декември 2023 до ноември 2024 година од правното лице во коешто бил вработен во 84 наврати примил парични средства на име трошоци за службени патувања од значителен износ, средства кои правното лице ги прибавило со сторување на кривичното дело Злоупотреба на постапка за јавен повик, доделување на договор за јавна набавка или јавно приватно партнерство. Овие средства со цел да го прикрие понатамошниот нивен тек, ги пуштил во оптег и ги подигнувал во готово.
Второосомничената во септември 2024 година, како службено лице вработено во Подружница ТЕЦ Неготино АД ЕСМ Скопје на неповикано лице обвинето во предметот Адитив, на друг начин му сторила достапни податоци што во согласност со чл. 289 од ЗКП претставуваат службена тајна. Имено, откако од Одделот за криминалистичка полиција кој постапувал по наредба на ОЈОГОКК, било доставено Барање за доставување на документацијата која се однесува на спроведена постапка за набавка на мазут за периодот од 2021-2023 година, таа преку апликација WhatsApp на телефонски број на обвинетиот му испратила фотографија од Известувањето.
Третоосомничената со умисла извршила две или повеќе временски поврзани дејствија што претставуваат повеќекратно остварување на исто дело искористувајќи ист траен однос, исти прилики и други слични околности. Како службено лице, претседател на ДКСК од месец мај до месец декември 2024 година на неповикано лице обвинето во предметот Адитив на друг начин му сторила достапни податоци кои согласно чл. 25 и чл. 50 од Законот за спречување на корупција и судир на интереси, како и чл. 289 од ЗКП претставуваат службена тајна. Таа преку својот службен телефон и апликациите Viber и WhatsApp му давала податоци на обвинетиот за поведени постапки, за отворање на предмети против сега обвинетите правни и физички лица во предметот Адитив и одлуки по истите, како и податоци за проверка на имот и неговото семејство. Со своите дејствија таа открила податоци што согласно закон се сметаат за службена тајна и чие откривање може да има штетни последици како за службата, така и за постапките што се водат пред ОЈОГОКК.
Со опишаните дејствија во диспозитивот од Наредбата и до денес прибраните докази, на првоосомничениот, како што појаснуваат надлежните, му се става на товар дека сторил кривично дело Злосторничко здружување, како помагач сторил продолжено кривично дело Злоупотреба на постапка за јавен повик, доделување на договор за јавна набавка или јавно приватно партнерство и кривично дело Перење пари и други приноси од казниво дело. Останатите две осомничени сториле кривично дело Одавање службена тајна.
Според соопштението, обвинителството од денес обезбедените докази во корелација со другите прибрани докази ја продолжува постапката во насока на утврдување и на евентуални други кривични дела и сторители.
Македонија
Муцунски на средба со Рокфеј и Троказ: изразена благодарност за понудената помош од страна на Франција по пожарот во Кочани

Министерот за надворешни работи и надворешна трговија, Тимчо Муцунски, попладнево оствари средба со директорот за континентална Европа во француското Министерство за Европа и надворешни работи, Брис Рокфеј, и со специјалниот пратеник за Западен Балкан на Француската Република, Рене Троказ.
На средбата, Муцунски се заблагодари за понудената помош од страна на Франција по пожарот во Кочани, како и за поддршката од Европската Унија, нагласувајќи дека тие претставуваат уште една потврда за европската солидарност која го зајакнува нашето чувство на припадност кон Унијата.
Во рамки на разговорот беше направен осврт на билатералните односи, при што се разговараше за идните чекори за унапредување на соработката. Беше изразена заедничка согласност дека во претстојниот период е потребно интензивирање на контактите и активностите помеѓу двете земји, со посебен акцент на економската соработка.
Муцунски ја поздрави силната и активна поддршка од Франција за процесот на интеграција на Република Северна Македонија во Европската Унија, како и за улогата на Франција и другите европски земји во напорите за зајакнување на кредибилитетот на Унијата во нашата земја и регионот. Потенцираше дека секој чекор напред на земјите од Западен Балкан ја зголемува довербата на јавноста во европската перспектива.
На средбата беше потенцирана и континуираната поддршка за евроинтеграциските процеси на државата, за што сведочи и ангажманот на тројца експерти во македонските институции кои работат на теми поврзани со интеграцијата, како и поддршката на проекти во кои се вклучени млади од земјата и регионот, насочени кон градење меѓусебна доверба и толеранција.
Македонија
Образ ѓон, се уште седат и земаат илјадници евра плата: Мицкоски за членовите на Судскиот совет

„Вие пратениците изгласавте недоверба на членовите на Судскиот совет. Но, и покрај тоа што тие ја добија недовербата од страна на тие кои што ги гласале, и понатаму продолжуваат да бидат дел од Судскиот совет и да земаат илјадници евра месечен надомест, притоа уживајќи помалку од 2 проценти доверба кај граѓаните и никому ништо. И тоа доволно ви кажува за каков профил на личности станува збор и зарем вие очекувате нешто различно од нив да донесат како одлука, посебно за случајот за младата Теодора која е прегазен ана пешачки премин“, истакна премиерот Христијан Мицкоски на денешната собраниска седница за поставување пратенички прашања.
Мицкоски упати остри реакции и за Советот на јавни обвинители.
„Но, не е само тоа. Во случајот има и една друга институција Советот на јавни обвинители, таму има еден замислете еден виш јавен обвинител кој што бара да се намали првостепената пресуда. Затоа што овој случај има прв дел од пресуда од 3 и пол години, се жали обвинителот на ниска казна, неговиот надреден кој што е во Вишото, ја прифаќа одлуката односно прифаќа таа да биде помала од 2 години“, рече Мицкоски.
„Зарем вие очекувате од овие луѓе нешто повеќе. Јас не. Образ ѓон.“, изјави Мицкоски.
„Ако некој мисли дека ние имаме кратко помнење се лаже, нема така едноставно да поминуваат некои работи. Правдата мора да биде неприкосновена и да ја добијат сите,“, дециден е Мицкоски.
Во однос на реформите, истакна дека се во завршна фаза и очекува до крајот на јуни да бидат донесени, но како што рече лично има дилема дека нешто од тоа ќе функционира со вакви судии и обвинители.
„Тие се работат и се во завршна фаза. И се дел од реформската агенда и има јасен датум дека до 30.06 треба да се донесат. Но, искрен да бидам лично мислам и имам дилема дека нешто од тоа ќе функционира со овие вакви судии и обвинители кои се бирани на начин на кој што се бирани. Не сите, туку мала група, но таа мала група го контаминира она поголемо ткиво кое заслужува да биде и судија и обвинител“, појасни премиерот.