Институтот „Конфучиј“ при Универзитетот „Св. Кирил и Методиј“ во Скопје по третпат во Македонија ќе организира квалификациски натпревар за учество на Меѓународниот натпревар по кинески јазик „Кинески мост“ за 2018 година. Натпревар кој ќе се одржи денеска од 10 часот во Холот на НУБ „Св. Климент Охридски“ во Скопје.

Централната управа на институтите „Конфучиј“ го организира Меѓународниот натпревар по кинески јазик „Кинески мост“ од 2002 година и досега на него учествувале околу 700 студенти и курсисти од над 60 земји во светот. Во квалификациските натпревари кои се одржале во голем број земји во изминативе 17 години учествувале околу пола милион студенти и куристи.

На квалификацискиот натпревар в сабота ќе учествуваат курсисти и студенти од Македонија кои го изучуваат кинескиот јазик и кои сакаат да го покажат своето знаење, да учат едни од други и да го продлабочат своето познавање на кинескиот јазик и култура. Тие ќе се натпреваруваат во три категории: кинески јазик, општо знаење за Кина и кинеската култура, односно освен своите јазични способности натпреварувачите ќе ја покажат и својата умешност во кинеска калиграфија, сликање, танц, музика, боречки вештини, итн.. Натпреварувачите кои ќе се пласираат на првите две места ќе имаат можност да заминат во НР Кина во јули на финалниот натпревар по кинески јазк „Кинески мост“ за 2018 година. Додека се во Кина тие освен можноста да се натпреваруваат со други студенти и курсисти во познавањето на кинескиот јазик, ќе имаат можност да учествуваа во многу други активности поврзани со јазикот и културата на Кина.

Натпреварувачкиот дел кој ќе заврши во 12:50 часот ќе биде проследен со свечена церемонија која ќе почне во 13 часот и на која ќе бидат доделени потврдите за освоени места и учество.