Градоначалникот на општина Центар, Саша Богдановиќ, преку презентација ги образложи одлуките што минатата недела беа донесени во врска со ДУП Градска четврт И 06 – Пролет од страна на Советот.

„Ова претставува четврти ДУП од вкупно 31 за кои допрва Советот ќе треба да расправа. За разлика од минатата општинска администрација, пред 2012 година се трудиме овие расправи и одлуки да ги носиме јавно и транспарентно, преку јавна анкета, каде што граѓаните ќе може да учествуваат со сугестии и коментари“, рече Богдановиќ.

Државното земјиште што било предвидено за градба во општина Центар, ќе се пренамени во зеленило. „Нема да има зграда до зграда и да си гледаат соседите дома, туку има значително растојание меѓу зградите. Новата градинка е во склоп на училиштето и се работи за убава површина во согласност со параметрите за градинка. Површината е на 1.992  квадратни метра. Висината е според прописите, а има предвидено и двор“, изјави градоначалникот Богдановиќ.

По две години, градоначалникот соопшти дека општинската администрација дала максимални напори да се измени она што може бидејќи досега деталните урбанистички планови биле ревидирани. Следниот ДУП што ќе биде презентиран, петти од 31 ревидиран, ќе биде кај Тасино Чешмиче.

„Целта е да покажеме друга слика од претходно кога планови се носеле без јавност, во 3 часот наутро, се заради нечии интереси. Наша задача како општинска администрација е да придонесеме за непречени услови за да се направат измените“, додаде Богдановиќ.
Меѓу другото, извршена е пренамена на парцелата 1.02 покрај основното училиште „11 Октомври“, од објект на локална самоуправа во објект со намена в2: здравство и социјална заштита, поточно детска градинка.

На местото на постојната Месна заедница Корчагин ќе може да се изгради детска градинка со површина на парцела од 1.992 m2 и површина за градба од максимум 1.334 m2, а развиена површина од 2.668 m2. Постојната кула, на местото на денешниот паркинг, на парцелата 1.27, ќе може да се изведе паркинг со 2 нивоа: едно полуподземно и едно полунадземно ниво, со цел да не се нарушуваат видиците на станарите. Овој паркинг со површина од 1.635 m2 (од ниво) се предвидува со цел да се решат проблемите со паркирање на постојните објекти, а притоа да не се уништува зеленилото, како што се предвидувало во претходните варијанти на плановите.

„Сите уредени зелени површини се зачувуваат. Површината под јавно зеленило е тројно зголемена, односно од постојните 4.283 на 12.811 m2 во однос на претходните планови.
 Toa зеленило го опфаќа постојното зеленило меѓу постојните станбени згради, заштитното зеленило, но и неколку нови помали површини, кои не биле предвидени како јавно зеленило во претходните планови, а во стварноста се зелени. Зачувано е детското игралиште, кое заедно со најголем дел од зеленилото меѓу станбените објекти ќе беше уништено доколку се дозволеа надградби на постојните станбени згради и не се решеше проблемот со паркирањето“, додаде Богдановиќ.