Македонија
ДС: Врховниот суд во Грција одлуката за екстрадиција ја заснова на поништена одлука за аболиција

Демократскиот сојуз укажува на тоа дека Врховниот суд во Грција, својата одлука за одбивање на барањето за екстрадиција за Бошковски и Грујевски ја заснова на поништена одлука за аболиција. Како што е познато во почетокот на 2016 година Ѓорге Иванов донесе одлука за аболиција на 56 лица, повеќето од нив носители на високи државни и политички функции. Меѓу аболицираните беа и Бошковски и Грујовски, соопшти партијата.
Под притисок на јавноста, во јуни 2016 година, оваа одлука Ѓорге Иванов, ја повлече односно ја поништи, со што истата не може да се користи како основ за ослободување од кривична одговорност или за одбивање на барање за екстрадиција.
„Одлуката на Врховниот суд во Грција отвора дилеми дали надлежните институции (Министерството за правда, Кривичниот суд што ја води постапката против Бошковски и Грујовски и др.) во Република Македонија ги презентирале сите факти пред судовите во Грција. Овој случај само ја потврдува потребата од итни, сериозни и длабински реформи и во судскиот систем и државната администрација. За овој и за многу други случаи треба детална анализа и утврдување на одговорноста на сите кои го кршат уставот и законите“, велат од ДС.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.