Македонија
ДУИ: Албанската опозиција врши поделба на Албанците од Косово, Албанија и Македонија и ги напаѓа медиумите и новинарите

Албанската опозиција конечно сфати дека на 24 април и 8 мај ќе доживее длабок пораз од Демократската унија за интеграција. Ако досега меѓусебно се обвинуваа за поразот од ДУИ, сега обвинуваат и медиуми и новинари од Албанија и Косово.
Дури и ги клевети дека се продадени за да ја заштитат ДУИ и обвинуваат опозицијата, се вели во соопштението од ДУИ.
Оттаму велат дека Аднан Азизи, организационен секретар на Движењето Беса и висок експонент на албанската опозиција, клевети дека „ДУИ троши милиони евра, пари од даноците на граѓаните, за поткуп на аналитичари и новинари од Косово и Албанија, за поткуп на локални медиуми, само за да ја спасат катастрофалниот пораз што ќе и се случи на 8 мај“.
– Демократската унија за интеграција со длабока загриженост ги следи клеветите и неоснованите обвинувања на опозицијата кон секој што размислува поинаку од неа(опозицијата), притоа повикувајќи ги нив да не вклучат структури, личности, новинари и медиуми од Албанија и Косово во предизборната кампања во Северна Македонија и да не се навредуваат медиумите и новинарите, велат од ДУИ.
Воедно, тие ја информираат јавноста дека Демократската унија за интеграција ја почитува слободата на говорот, бидејќи сметаат дека главен демократски коректор на власта се слободните и независни медиуми кои ја кажуваат вистината и само вистината. – И ставаме до знаење на опозицијата дека со клеветење на албански медиуми и новинари од Косово и Албанија, никому не му прави чест , освен на газдите со седиште во Москва и Белград. Хибридната војна координирана со ВМРО-ДПМНЕ и Левица веќе ги надминува сите предвидувања на валканата кампања на опозицијата, па ја повикуваме јавноста да ја провери секоја вест и информација што доаѓа од таканаречената „Коалиција Вреди“, велат од ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Кашиковски од ССМ со плата од над 50.000 денари, Трендафилов и луѓето околу него со енормни примања

Кашиковски од ССМ со плата од над 50.000 денари, Трендафилов и луѓето околу него со енормни примања. Според информациите кои стигнаа до нас од свиркачи од ССМ, Стојанче Кашиковски, претседател на синдикатот на работниците од угостителството, туризмот и комунално-станбено стопанство остварува и дополнителни годишни примања покрај платата. Вкупните примања на Кашиковски во 2023 година, во кои влегува неговата плата и примања по други основи, биле над 810.000 денари, изјави
Бране Петрушевски, пратеник на ВМРО-ДПМНЕ.
– Ова се синдикалците на Трендафилов и ССМ, не се знае кој од кој поголеми примања има. Според свиркачите од ССМ, кои се разочарани од актуелното раководство, Трендафилов и луѓето околу него го претвориле синдикатот во приватна фирма. Трендафилов и луѓето околу него одработуваат за нивните позиции по ноти на СДС, кои и ги поставија на нелегитимен начин. Ова се луѓето кои додека ги лажат работниците за минималец, тие земаат плати неколку пати поголеми од тоа од синдикатот, рече Петрушевски.
Македонија
Илиевски: Нов скандал во министерството на Андоновски, тендер добиле родители на негов вработен

По објавувањето на скандалот за судир на интереси во Министерството на Стефан Андоновски, каде тендер доби сопругот на Државната секретарка, ДКСК отвори предмет. Граѓаните сеуште чекаат да постапи Јавното обвинителство за случајот, за истиот да добие разрешница. Додека целата јавност беше во тага и болка за несреќата во Кочани, каде што загинаа 59 млади луѓе а речиси 200 беа повредени, на само три дена по трагичниот настан Андоновски побара извинување од СДСМ, изјави Методија Илиевски, потпретседател на СДСМ.
– Шокантно е што барањето за извинување пристигна на 19 март на самиот ден на погребот на загинатите од несреќата кога целата нацијата беше во шок. Тоа го покажува степенот на загриженоста на министерот за трагичниот настан. СДСМ е одговорна партија која се бори секогаш да излезе вистината на виделина, и да зборува во насока на заштита на јавниот интерес пред се!
Токму затоа, наместо извинување До Министерот Андоновски, денес ќе објавиме индиции за уште еден скандал. Се работи за тендер од 600.000 денари за набавка на систем за контрола на пристап, добиен од фирмата „БОКИ СИМПЛ ТЕК СОЛУШНС“ ДОО Скопје. Според информации од свиркачи кои ги добивме, сопственици на оваа фирма се родителите на Борче Младеновски, инаку вработен во ИТ секторот на истото министерство. Го повикуваме Андоновски да излезе и да одговори дали е ова точно?
Дали тендерот тежок 600.000 денари завршил кај родителите на вработен во министерството? Индикативен е називот на меилот кој правното лице го има дадено во доставената документација за контакт со министерството кој гласи [email protected]. СДСМ се обиде го најде список на вработени во Министерството за дигитална трансформација, но на сајтот на министерството тој податок не е достапен, таму стои дека сеуште тој документ е во изработка.
Дали на повидок е уште еден скандал на непотизам и конфликт на интереси во министерството на Андоновски? Селективноста и селективната правда е потребна за сите други случаи на власта кои ги прави, а не само за трагедијата во Кочани. Институциите не смеат да молчат за тендерските мрежи на ДПМНЕ бидејќи станува збор за пари на граѓаните, рече Илиевски.
Македонија
Момчето херој Јован Костадинов во посета на Бигорски манастир

Јован Костадинов, момчето кое спаси 21 живот од пожарот во дискотеката „Пулс“ во Кочани на 16 март, е во посета на Бигорскиот манастир.
Во објава на Фејсбук стои дека Јован не е само херој на Кочани, туку е „херој на целата наша држава Македонија”.
-Симбол на тоа што значи да се стави човечноста над стравот. Потсетник за сите нас колку многу може да направи едно дете со големо срце, се наведува во објавата.