Македонија
ДУИ: Локалните избори се и референдум за европската ориентација на државата

Демократската унија за интеграција оценува дека претстојните локални избори не се само натпревар за управување со општините, туку се политички референдум за стратешката иднина на државата и за нејзината ориентација кон европското семејство.
„Денес, повеќе од кога било, јасно е дека битката за општините е битка за државата. Последниот извештај усвоен од Европскиот парламент, со огромно мнозинство од 461 европратеници од сите политички групации, официјално потврдува дека Северна Македонија сè повеќе се изложува на дестабилизирачки влијанија од Србија и Русија – дел од геополитичкиот проект познат како „Српски свет“. Ова е сериозен аларм за сите граѓани кои веруваат во евроатлантските вредности и во демократската иднина на државата. Веќе не станува збор за партиски став или политичка реторика, станува збор за реалност потврдена од нашите европски партнери“, велат од ДУИ.
Дополнително, додаваат од партијата, во овој период на владеење без етнички легитимитет, државата влезе во опасен циклус на институционален регрес и влошување на меѓуетничките односи.
„Меѓуетничките односи се сериозно нарушени, се врати политичката мајоризациза, се укина правичната застапеност, се прекршуваат колективните права на Албанците, а дискриминацијата во државните институции е продлабочена. Оваа состојба не е само чекор назад, туку сериозна закана за уставниот поредок, соживотот меѓу заедниците и европските вредности. Затоа, ДУИ бара итно покренување на институционална истрага и свикување итна расправа во Собранието на Северна Македонија, со цел темелно разгледување на оваа опасност што го загрозува европскиот курс на државата. Како водечка проевропска политичка сила, ДУИ останува цврсто посветена на одбраната на демократијата, стабилноста и евроатлантската ориентација на државата. Овие локални избори се моментот кога се одлучува не само за улиците и училиштата во општините, туку и за патот по кој ќе тргне самата држава: патот кон Европа или патот кон мрачен и опасен источен правец. Секој глас на овие избори е глас за ориентацијата и иднината на државата“, велат од ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нова програма за Тетово на Касами: бесплатен јавен превоз, 100 евра за првачиња, нови училишта, жичница

Кандидатот за градоначалник на Општина Тетово, Билал Касами, денес одржа прес-конференција на која ја претстави својата изборна програма за следниот четиригодишен мандат.
Касами истакна дека изминатите четири години биле посветени на итни интервенции и решавање на основните проблеми со инфраструктурата, финансиската стабилизација и редот во општината.
– „Тетово денес е многу подобро отколку што беше пред 4 години. Успеавме да реализираме стотици проекти и да вратиме долг од 9 милиони евра. Сега сме подготвени да преминеме на ново поглавје – развој и модернизација на градот“, истакна Касами.
Во својата програма за 2025–2029 година, тој предвидува целосно решавање на проблемите со водоснабдување и отпадни води, модерна канализациона и улична инфраструктура, електрични автобуси и бесплатен јавен превоз, дигитализирани јавни услуги и стратегија за паркирање.
Посебен фокус е ставен на образованието со целодневна настава, нови лаборатории, подобрени услови во училиштата и субвенции од 100 евра за секое дете запишано во прво одделение.
Програмата предвидува и урбанистичка трансформација на Тетово со нов Генерален урбанистички план, изградба на Плоштад со подземен паркинг, катни гаражи, пешачки подвозници и жичница Тетово–Лисец–Попова Шапка.
„Вториот мандат ќе биде мандат за брз развој, за европски стандарди во секоја сфера, за заживување на културата, спортот и туризмот, но и за грижа за најранливите категории“, нагласи Касами, додавајќи дека сите проекти се базирани на конкретни стратегии и финансиски планови.
Тој порача дека Тетово не смее да се врати назад во „ерата на хаос, анархија и корупција“ и дека новата програма е „договор за работа“ кој ќе се реализира доследно.
Македонија
Светски ден на срцето: Граѓаните со голем интерес за бесплатните превентивни прегледи

По повод одбележување 29 септември–Светски ден на срцето, денес министерот за здравство, Азир Алиу, заедно со директорката на Институт за јавно здравје, Марија Андоновска го посетија превентивниот пункт во ТЦ „Дајмонд мол“.
-Граѓаните покажаа голем интерес за бесплатно мерење крвен притисок, холестерол и ниво на шеќер во крвта на превентивниот пункт. Здравствените услуги на пунктот ги врши тим од Институтот за јавно здравје. Со ваквите акции заеднички ја подигнуваме свесноста за навремено откривање и превенција од кардио-васкуларни заболувања. Дополнително, присутните добија индивидуални совети и препораки за здрава и урамнотежена исхрана, редовна физичка активност, како и поддршка и мотивација за откажување од пушење – три клучни фактори во заштитата на здравјето на срцето, изјави министерот Алиу.
Директорката на Институтот за јавно здравје, д-р Марија Андоновска ја истакна важноста на примарната превенција и активниот пристап кон сопственото здравје.
-Светскиот ден на срцето е можност да се потсетиме дека здравото срце значи и квалитетен живот. Институтот за јавно здравје ќе продолжи со активности насочени кон унапредување на здравјето на населението и поддршка на здрави животни навики” изјави д-р Андоновска.
Македонија
Шукова најави нов систем за собирање отпад и двојно повеќе контејнери во Скопје

Кандидатката за градоначалник на Скопје од СДСМ, Каја Шукова, денеска најави целосна реформа на системот за собирање отпад во главниот град.
„Ќе воведеме паметен систем по теркот на европските градови – со нова механизација и GPS рутирање на возилата, за точно да се знае каде е полно и каде треба да се собира отпадот. Ова ќе биде систем без импровизации и без доцнења“, порача Шукова.
Дополнително, најави двојно зголемување на бројот на контејнери во сите скопски населби, со цел подобра покриеност и хигиена.
Според неа, хаосот во Скопје е резултат на четиригодишната блокада и саботажа од ВМРО-ДПМНЕ, кои го контролирале ЈП Комунална хигиена и го оставиле градот да „скапува во смет и депонии“.