Македонија
Европската народна партија повика на започнување разговори за пристапување на Северна Македонија и Албанија
Следната недела, земјите-членки на Европската унија (ЕУ) ќе се соочат со стратешки избор во врска со започнувањето на пристапните преговори со Северна Македонија и Албанија.
Пред овие клучни одлуки, претседателот на Европската народна партија (ЕПП), Жозеп Дол, изрази поддршка за започнување на разговорите за пристапување во ЕУ за Северна Македонија и Албанија:
„Политиката за проширување на ЕУ е една од најуспешните алатки за воспоставување стабилност и мир на нашиот континент. Одлуките што треба да ги донесат земјите-членки нема да влијаат само на стабилноста, безбедноста и просперитетот на Западен Балкан, туку и на нашиот континент како целина. Време е да испратиме силен сигнал и да останеме верни на нашите обврски кон регионот“, вели Дол.
Во соопштението на ЕПП се наведува дека Северна Македонија и Албанија постигнале напредок во согласност со барањата за отворање на овој процес, па иако останува да се направи многу, отворањето на разговорите за пристапување е природен следен чекор.
„Граѓаните, а особено младите, од Северна Македонија и Албанија, заслужуваат европска перспектива, бидејќи останува извор на мотивација и решеност тие земји и поширокиот регион да продолжат со потребните реформи за понатамошно спроведување на владеењето на правото, зајакнување на судството , борбата против корупцијата, подобрувањето на соседските односи и гарантирањето независност на медиумите“, се наведува во соопштението.
ЕПП оценува дека одлуката следната недела е историска и одлучувачка за иднината на нашиот континент.
„Патот за членство за Северна Македонија и Албанија ќе биде долг, но тоа е патека што треба да ја градиме заедно и не смееме да изгубиме динамика. Западен Балкан се наши најблиски партнери; историски, географски и економски. ЕУ нема да биде целосна додека регионот не биде дел од нашата унија “, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Коце Трајановски ја презеде директорската функција во „Државни патишта“
Во просториите на Јавното претпријатие за државни патишта беше извршено примопредавање на директорската функција.
Новиот директор Коце Трајановски ја презеде функцијата од Ејуп Рустеми.
Рустеми го запозна Трајановски со состојбите и функционирањето на претпријатието.
„Денес ја превземав функцијата директор на Јавното претпријатие за државни патишта.
Благодарам за дадената доверба од Претседателот на владата Христијан Мицкоски за да го водам ова јавно претпријатие.
Ќе работам чесно и посветено се со цел да се реализираат што повеќе проекти, кои ќе ги подобрат условите за живот на граѓаните“, напиша Трајановски на социјалните мрежи.
Македонија
Љутков од Велес: Фолклорот нè идентификува и нè поврзува со светот
Во Младинскиот парк во Велес, вчеравечер свечено беше отворено 19. издание на Интернационалниот фолклорен фестивал „Велес 2024“.
Во присуство на многубројни гости, Фестивалот за отворен го прогласи министерот Зоран Љутков, кој изрази задоволство што низ годините овој фестивал прерасна во вистински репрезент на фолклорната традиција на народите од повеќе држави во светот, потенцирајќи дека Министерството за култура и туризам останува отворено за поддршка на сите проекти што ја афирмираат културната традиција и посебноста на сите чинители.
– Нема ништо поубаво од тоа од генерација на генерација да се пренесува сето она културно наследство што нè идентификува, што нè прави посебни и препознатливи во европскиот, но и во светскиот културен мозаик. Секоја држава, секоја култура е посебна токму поради шаренилото на културните вредности што имаме обврска да ги чуваме, да ги негуваме и да ги пренесеме на идните генерации – рече Љутков.
Преку настапите на младите уметници, како што рече министерот за култура и туризам, ќе се запознаеме со убавината на фолклорната традиција, музиката, песната и сето она што е обележје на земјите од кои доаѓаат, збогатувајќи го на тој начин културното живеење во Велес.
Честитајќи им на организаторите за посветеноста во реализацијата на Фестивалот, Љутков им посака убав престој во Македонија и во Велес на учесниците, а на посетителите незаборавни мигови со музиката и ората од земјите учеснички.
Љутков изрази уверување дека Меѓународниот фолклорен фестивал „Велес 2024“ и во иднина ќе биде настан на радост и среќа каде што ќе се создаваат спомени кои ќе останат траен запис во историјата на манифестацијата.
Македонија
Средба на претседателот Гаши со посебниот советник за Западен Балкан: Влезот на Западен Балкан во ЕУ треба да се случи што поскоро
Претседателот на Собранието, Африм Гаши, оствари средба со посебниот советник за Западен Балкан, Анжеј Франгеш.
Гаши изрази благодарност за заложбите на Словенија да назначи специјален претставник за Западен Балкан, со што ја потврдува својата посветеност на европската перспектива на земјите од Регионот, вклучително и нашата земја.
Словенија е искрена, пријателска земја, силен поддржувач на евроинтеграциите. Особено се ценат нејзините заложби за одржување на прашањето за проширувањето високо на агендата на Европската Унија.
Влезот на Западен Балкан во ЕУ треба да се случи што поскоро, затоа што и Балканците се Европејци и тоа е во корист не само на овие земји, туку и на самата Унија.
Во таа насока, прашањето за уставните измени како пречка за влез во големото европско семејство треба да се реши што поскоро, а реформскиот процес да продолжи. Помошта и поддршката од посебниот советник Франгеш е добредојдена како одличен познавач на Регионот.
Франгеш на претседателот Гаши му посака успешна работа во новиот мандат, истакнувајќи дека парламентарната демократија е многу важна.
Соговорниците оставија отворена врата за соработка, со почести средби и поактивна улога во наредниот период.