Македонија
Европска куќа отворена во Битола

Евроамбасадорот Дејвид Гир и градоначалникот на општина Битола, Тони Коњановски, денес во Офицерскиот дом официјално ја отворија Европската куќа (Europe House) во Битола. Со отворањето се означува почетокот на активностите на Денот на Европа 2023 на Делегацијата на Европската унија. Градоначалникот Коњановски, нагласи дека на овој начин се создаваат подобри можности за развој на креативниот потенцијал на младите луѓе, преку стекнување на европски искуства и континуирана соработка:
„Европската иднина на нашиот град можеме да ја изградиме само преку создавање на подобри услови и нови можности во кои креативниот потенцијал на младите луѓе ќе продолжи да се развива, надградува и насочува кон реализација на нови идеи и проекти значајни за Битола. Во пресрет на Денот на Европа, како што најавивме пред неполни 3 месеци, денес ја отвораме „Куќата на Европа“ во Битола, затоа што веруваме во потенцијалот на нашите млади, во нивниот ентузијазам со кој ќе продолжат да ги градат вредностите, донесувајќи ја Европа во Битола, собирајќи го европското искуство, без да заминуваат низ европските земји.
Благодарни сме, што Европската унија е наш поддржувач во реализацијата на многу европски проекти и верувам дека ова е уште еден начин, на кој што сите заедно ќе продолжиме да чекориме кон иднината, преку поврзување на минатото и сегашноста во функција на денешните потреби на нашите граѓани.
„Europe House”, очекувам да биде новиот дом од кој ќе произлезат многу дискусии и идеи кои ќе гарантираат напредок за младите генерации.
Со многубројните културни настани, докажавме дека, Офицерски дом, може да биде успешна приказна за промоција и развој на културното наследство.
Преку „Куќата на Европа“ очекувам нашите заеднички заложби и соработка да се претворат во успешни придобивки за младите генерации, кои ќе продолжат да ја градат Европската перспектива на Битола.
Посакувам успешна работа на „Europe House“ во Битола.
Нека ни биде среќно и успешно!“, рече градоначалникот Коњановски во своето обраќање пред медиумите.
Отворањето на Europe House вклучува повеќе активности. Започна со работен состанок и дебата со студентите од Правниот факултет при Универзитетот „Св.Климент Охридски“, а продолжува на Широк Сокак, Магаза и Пацио каде што ќе бидат отворени две изложби. Програмата завршува со концерт на локални бендови на платото на Офицерскиот Дом и диџеј сет во Бар Јагода.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре, без вода делови од скопски Аеродром

Од ЈП Водовод и Канализација известуваат дека утре ( Вторник ) поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд.
Водоснабдувањето ќе биде прекинато од 08:00 часот до завршување со санација на дефектот. (општина Аеродром )
Македонија
Азири: Дали Османи прави било што во својата политичка кариера ако нема личен ќар за себе или за неговите најблиски

На денешната прес-конференција, портпаролот на Локалниот штаб на „Вреди“ во Чаир, Сабри Азири, беше пред гинеколошката болница “Мајка Тереза“ во Чаир.
„На минатата прес конференција објавивме дека Бујар Османи, на државни функции поминал вкупно 3.672 дена или 10 години и 22 дена. Во тој долг период, учинокот на Бујар Османи за жителите на Чаир изгледа вака: Нула денови за чаирчани, но два дена со Сергеј Лавров во Скопје. Нула денови за чаирчани, но цела недела со Никола Груевски во Будимпешта. Нула вработувања за чаирчани, но затоа сопруга вработена во АЕК, сестра во М-НАВ и развиен бизнис за неговиот брат“.
Според Азири иронијата е во тоа што, наместо чаирани да добијат модерна гинеколошка болница и подобра здравствена услуга, тие добија уште еден симбол на корупцијата.
„Меѓутоа, на таа прес-конференција испуштивме еден проект кој е заштитен знак на неговата кариера како министер за здравство, а е директно поврзан со Чаир. Тоа е фамозниот проект за реконструкција на гинеколошката болница „Мајка Тереза“, во Чаир, чиј епилог заврши со коруптивен скандал познат како “Пациент“, за злоупотреби во вредност од над 21,6 милиони денари или околу 350 илјади евра. Иронијата е што наместо Чаирчани да добијат современа гинеколошка болница и подобра здравствена услуга, тие добија уште еден симбол на корупција. Наместо објект што ќе им служи на мајките и децата, Чаир остана со недовршен проект и со дамка која до денес го следи”, истакна Азири.
Тој постави и дилема дали Бујар Османи направил нешто во неговата кариера, имајќи предвид дека со децении не ветил ништо, а денес им ветува проекти на жителите на Чаир.
„Само од овој предмет логично се наметнува дилемата – Дали Бујар Османи прави било што во својата политичка кариера ако нема личен ќар за себе или за неговите најблиски? Со кој образ денес Бујар Османи им ветува проекти на жителите на Чаир, кога тогаш, кога имаше цела деценија во централната власт, буквално не мрдна со прст за своите сограѓани?
Жителите на Чаир не забораваат. Точно знаат кој е навистина со нив цело време, а кој доаѓа кај нив само пред избори. На 19 октомври Бујар Османи ќе биде пациентот на гласачите на Чаир, кои масовно ќе му ја отворат излезната врата од политиката”, нагласи Азири.
Македонија
Сиљановска-Давкова: Цинизам и хипокризија е да барате од некого да биде отпорен на трети влијанија, оставајќи го пред портите на Европската Унија

Претседателката Гордана Сиљановска-Давкова денеска се обрати на годинешната средба на земјите учеснички во „Процесот Брдо-Бриони“, којашто се одржа во Драч, Република Албанија.
Укажувајќи на неодржливоста на предолгото чекање на Западен Балкан пред портите на Брисел, заради насушната потреба од проширување на ЕУ со сите европски држави во функција на зајакнување на нејзината улога, како и заради зголемување на отпорноста на трети влијанија, Сиљановска-Давкова истакна дека е цинизам и хипокризија да барате од некого да биде отпорен на трети влијанија, оставајќи го пред портите на Европската Унија.
Претседателката потенцираше дека годинава, за разлика од лани, Декларацијата е усвоена со консензус на лидерите на земјите учеснички во „Процесот Брдо-Бриони“.
За неа, соработката е неопходна заради решавање на заедничките проблеми, како: егзодусот на младите, опасноста од стагнирање на економијата и надминување на безбедносните предизвици.
„Верувам во добрата волја, верувам во добрите намери, верувам во посветеноста на Хрватска и Словенија на процесот и нивната посебна одговорност кон регионот и неговото забрзано чекорење кон ЕУ“, заклучи претседателката Сиљановска-Давкова.
Иницијатори на „Процесот Брдо-Бриони“ се Република Хрватска и Република Словенија. Во процесот, покрај нас, вклучени се и: Република Црна Гора, Република Србија, Република Албанија, Босна и Херцеговина и Косово.
Претседателите на овие земји се состануваат најмалку еднаш годишно. Следниот состанок ќе се одржи во Република Хрватска.