Македонија
Едногласно изгласан Деловникот за уставните измени, рокови нема, но треба да биде бргу

Работната група што треба да ја подготви предлог-иницијативата за измени на Уставот денеска одржа седница на која едногласно бил усвоен деловникот за работа.
Претседателката на работната група за уставни измени, Маргарита Цаца-Николовска, рече дека Деловникот ќе биде објавен утре на страницата на Министерството за правда.
Од страна на претседателката Деловникот беше оценет како добар. Рече дека тој претставува добра основа што дава можност за работа, без навлегување во дискусии, што ќе ја одолжат работата.
„Рокови немаме зацртано, но немаме многу време“, рече таа.
Како што беше посочено, работната група ќе се состанува многу почесто, генерално, еднаш во неделата. Не можеше да каже колку амандмани може да се изработат бидејќи, како што рече, групата треба да има одредени аргументи за нивните одлуки.
„Приоритет во работата е да се стигне со време за да може колку е можно побргу државата да ги презентира резултатите што ги има од меѓународниот договор“, рече Цаца-Николовска.
Следната седница ќе се одржи за една недела, в петок, 26 мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.