Најновите трендови и резултати од истражувањата за употребата на канабисот во медицински цели беше тема на вчерашниот едукативен настан, која се одржа со наслов „Клиничката перспектива за медицинската употреба на масло од канабис (ЦБД/ТХЦ) во третман на болка“. Во рамките на настанот, домашни и странски експерти, покрај презентацијата на најновите истражувања, кои во повеќе земји се во напредна фаза, зборуваа и за досегашните клинички искуства од третманот на пациенти во разни медицински области.

Во рамките на едукативниот настан свое излагање имаше и доктор Силвиу Брил, директор на Институтот за третман на болка во Тел Авив во Израел. Д-р Брил е копретседател на работната група за медицина базирана на канабис и претседател на работната група за онколошка болка на Европската федерација за болка.

Едукативниот настан го отвори претседателот на Македонската ревматолошка асоцијација, м-р д-р Мимоза Николовска-Котевска, а е поддржан од „Реплек“ АД Скопје, прва компанија во земјата која почна со производство на препарати што содржат екстракти од канабис (ЦБД/ТХЦ). Доцент д-р Филип Гучев од Универзитетската клиника за ревматологија во рамките на своето стручно излагање се фокусира на клиничката употреба на екстракти од канабис во третманот на ревматолошките болести. За употребата на препарати со екстракти од канабис (ЦБД/ТХЦ) во третман на онколошките пациенти зборуваше д-р Милан Ристески, кој има долгогодишно искуство во клиничката онкологија, бил дел од истражување во областа, а има објавено и низа трудови за унапредување на онколошката нега.

„Реплек“ АД Скопје е пионер во производството на медицински препарати што содржат екстракти од канабис на домашниот пазар правејќи ги достапни и за македонските пациенти. Во своето портфолио компанијата има производи што содржат разни концентрации на ЦБД и ТХЦ, со што се овозможува поширока примена во третманот на разни здравствени состојби.

Во рамките на настанот експертите ги изложија најновите научни истражувања и резултати добиени во рамките на клиничката пракса при третман на хронична болка од разно потекло и улогата на производите што содржат екстракт од медицински канабис (ЦБД и ТХЦ). Канабиноидите, активните соединенија во канабисот, дејствуваат преку ендоканабиноидниот систем на телото, кој игра улога во регулирањето на перцепцијата на болката. Терапевтските својства на канабисот се признаени од многу регулаторни тела вклучувајќи ја и Американската агенција за храна и лекови (ФДА).

(ПР)