Македонија
Едукативен проект на рудникот „Саса“ за запознавање на најмладите со природните вредности и нивната заштита

Рудникот Саса, со група независни автори, издаде книга за најмладите членови на заедницата наменета за нивно запознавање со природните убавини. Целта на книгата „Јасмина низ Осоговските Планини – приказна за запознавање на природните вредности и како да ги заштитиме“ е да се збогати литературата за деца на македонски јазик посветена на проучување на природата, како и да се даде придонес кон градењето на свесноста за потребата од зачувување на животна средина.
Книгата, која првенствено е наменета за деца и ученици до петто одделение, претставува едукативно еколошко четиво, кое преку автентичен стил на раскажување и градење на приказната го води читателот низ природните карактеристики на околината на рудникот Саса и Осоговските планини, нивните природни убавини и биолошка разновидност.
Книгата содржи и насоки за безбедно движење и правилно однесување во природа, а во неа, на соодветен начин, е опишана и симбиозата помеѓу рударството и природата, која со векови постоела во овој регион, како и активностите што ги презема рудникот Саса за одржување на ваквата рамнотежа.
Автор на текстот на книгата е биологот и едукатор Кирил Арсовски-Пржо, а цртежите се на младата наградувана илустраторка Софија Ситновска.
Упатувајќи благодарност до целиот тим кој работеше на реализацијата на овој едукативен проект, раководителот на службата за заштита на животната средина во Рудник Саса, Марија Стојановска изјави: „Идејата за реализацијата на овој проект произлезе од фактот дека свесноста и љубовта кон природните убавини започнува да се создава уште од најмала возраст. Затоа ние во рудникот Саса со посебно внимание и посветеност се ангажиравме во изработката на оваа прекрасно илустрирана книга која веруваме дека децата ќе ја засакаат и ќе придонесе за збогатување на нивите познавања за природата во која живеат и ги опкружува и која ќе биде еден вид патоказ за тоа како треба да се однесуваат кон неа“.
Најголем дел од тиражот на книгата рудникот Саса ќе им го отстапи на општинското основно училиште, детската градинка и општинските и градски библиотеки низ источниот регион, како и во други делови од земјата, а примероци од книгата ќе бидат доставени и во дневниот центар за лица со посебни потреби во Македонска Каменица.
Ова едукативно издание е уште една од низата општествено одговорни активности што ја спроведува Рудник Саса, во рамки на својата долгорочна стратегија за одржлив развој и просперитет на заедницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Влада: Усвоена информација за склучување на договор за соработка помеѓу Железници инфраструктура и Јавното тело на Министерството за транспорт на Обединетото Кралство

Владата на денешната 114 редовна седница ја разгледа и усвои информацијата за склучување на договор за соработка помеѓу Јавното претпријатие за железничка инфраструктура- Скопје и Јавното тело на Министерството за транспорт на Владата на Обединетото Кралство Кросрејл Интернешнал Лимитед (Crossrail International Limited (CI)).
Со овој Договор за соработка се воспоставува рамка со која страните ја потврдуваат својата подготвеност и посветеност да соработуваат преку споделување на експертиза, искуства, добра практика и научени поуки во поддршката на проектите на ЈП ЖРСМ Инфраструктура- Скопје, со посебен акцент на брзата железница, како и товарен железнички сообраќај, сигнални и контролни системи, надградба на инфраструктурата, депоата и железничкиот возен парк. Договорот за соработка е во важност од 5 години со можност за продолжување од дополнителни пет години. Овој Договор произлегува од досега воспоставената соработка помеѓу македонската Влада и Владата на Обединетото Кралство на Велика Британија и Северна Ирска, во врска со партнерството за реализација на приоритетни инфраструктурни проекти.
Дополнително, Владата на денешната седница ја разгледа информацијата за потребата од субвенционирање на филтри на оџаци на домаќинствата и ја задолжи Канцеларијата на Претседателот на Владата во следниот период да подготви детална анализа која ќе ги предвиди условите, времетраењето и процедурата за објавување на оглас за субвенции на филтри за оџаци на домаќинствата кои користат греење со фосилни горива односно дрва.
Македонија
Николоски: Бележиме раст од 6,1 процент во транспортниот сектор

Бележиме раст од 6,1 % во секторот транспорт, што говори дека оваа индустрија се развива, но исто така говори дека се уште има простор за раст и развој. Преземаме краткорочни и долгорочни мерки што ја олеснуваат вашата работа, но реализираме и големи крупни капитални проекти кои директно влијаат врз развој на транспортниот сектор, се обрати вицепремиерот и министер за транспорт Александар Николоски, на денешниот состанок со транспортерите.
Планот на Владата, како што потенцираше вицепремиерот Николоски е да се искористи позицијата на Македонија како стратешка крстосница во регионот.
“Идејата е да Македонија да го искористи потенцијалот кој што го има како природна раскрсница на два Пан-Европски коридори, Коридорот 10 север-југ и Коридорот 8 исток-запад. Во таа насока развиеме силна патна и железничка мрежа кои што ќе ги опслужува овие два Коридори. Во делот на патната мрежа, на Коридорот 10 за следната година планираме реконструкција на целиот дел од автопатот кој што не е во состојба во каква што јас би сакал да биде, така што поголем дел од автопатот ќе подлежи на реконструкција со цел да биде во одлична состојба. Исто така следната година ќе одиме со реконструкција на обиколницата на Скопје како природна врска на Коридорот 10 и 8, а продолжуваме и со изведба на Коридорот 10-д кој што оди од Градско преку Дреново-Фариш-Прилеп до Битола и вториот граничен премин со Грција до Меџитлија. Во моментот активно се гради автопатот од Прилеп до Битола, веќе го пуштивме во фунција експресниот пат Градско-Дреново-Фариш, а многу скоро ќе донесеме одлука и за изградба на потегот од Фариш до Прилеп, што значи нашата цел е да имаме целосно или автопатско решенеи или експресен пат кој што ќе оди и ка Коридорот 10-д, односно исклучувањето кај Градско до границата со Грција да е покриено со автопат или експресен пат”- истакна вицепремиерот Николоски и додаде:
Во однос на Коридорот 8, го пуштивме во функција потекот од Страцин до Крива Паланка, во моментот работиме обиколница на Крива Паланка, исто така работиме на проширување на граничниот премин Деве Баир, на западната страна работиме на автопат Тетово-Гостивар, понатаму на автопат Гостивар-Букојчани или популарната Стража. За потегот од Букојчани-Кичево завршува повикот за доставување на понуди на 30 септември, значи за неколку дена, а Кичево-Охрид веќе пополека се става во функција после 11 години одлагање. Првите 34 км се ставени во функција, до крајот на следната година целосно ќе го завршиме и паралелно на тоа работиме на проширување и модернизација на граничниот премин Ќафасан”- потенцира вицепремиерот Николоски.
Тој најави дека Министерството активно работи на проектот за изградба на мултимодалниот јазол во Трубарево.
“Работиме на еден голем проект за мултимодуларен јазол кој што треба да се наоѓа во постојниот јазол кај Трубарево и во продолжение до пресекот на двата Коридори, кои што мислам дека за сите компани кои што се занимаваат со логистика е голема шанса за развој на бизнисот. Очекувам првата фаза да ја започнеме следната година, тоа е изведба на инфраструктура од страна на државата, а втората фаза година дена после тоа што ќе значи целосна реализација на проектот и проширување со цел практично да стане пристаниште на суво, односно целата роба што доаѓа од Атина, Солун кога ќе се реализира Коридорот 8-железнички и од таму, да се претоварат и да го земаме приматот кој што сега го имаат некои соседни држави и тука да биде сувото пристаниште за овој дел на Европа”- рече Николоски.
Средбата со транспортерите е во организација на МАКАМ ТРАНС на која се презентираа условите и критериумите за распределба на транаспортните дозволи.
Македонија
Гаши: Не е потребен глас кога срцата зборуваат на ист јазик

Претседателот на Собранието, Африм Гаши, денеска им се обрати на ученици, педагози и родители по повод Меѓународниот ден на знаковниот јазик, нагласувајќи дека овој ден е потсетник за инклузивност и почитување без бариери.
Гаши потсети дека Собранието од 2023 година организира курсеви за знаковен јазик за вработените и пратениците, со цел да се овозможи подобра комуникација и разбирање.
„Ова не е само технички чекор, туку симболичен чин во обидот да се слушнат и оние кои зборуваат поинаку, но имаат исто толку да кажат,“ истакна тој.
Додаде дека еден од неговите најважни приоритети како претседател на Собранието е изградба на отворена и инклузивна институција која ќе биде дом на секој граѓанин.
„Силата на човекот не се мери со зборовите што ги изговара, туку со срцето и духот што ги вложува секој ден,“ рече Гаши, честитајќи им на сите кои придонесуваат за оваа благородна мисија.
Обраќањето го заврши со убедувањето дека „Не е потребен глас кога срцата зборуваат на ист јазик,“ честитајќи им на присутните и на сите граѓани Меѓународен ден на знаковниот јазик.