Македонија
ЕКОДОМ и ЕКОКАСКО: Еколошки и лесно применливи решенија за следната година

Новогодишните празници се период од годината кога луѓето размислуваат за своите навики и за изборот на начинот на живеење. На почетокот на Новата година многумина од нас размислуваат како да се подобрат себеси и своето влијание врз светот околу себе. Во последните години е зголемен фокусот на еколошки прифатливиот живот и токму поради тоа треба да се размислува да се вклучат и одредени одржливи цели кога носиме новогодишни одлуки за новата година пред нас.
Секој може да има корист од носење еколошки посвесни одлуки. Доколку сакате да заштедите финансии или да ѝ се оддолжите на планетата, постојат многу можности во секојдневниот живот за намалување на личниот јаглероден отпечаток и на отпадот. Со носење и придржување до еколошките новогодишни одлуки можеме да ги промениме своите навики за поздрава иднина. А со носење новогодиши одлуки за својот дом не само што може да си го подобриме животниот простор туку и да ѝ помогнеме на животната средина.
Инвестициите во модерни, енергетски ефикасни технологии и системи за управување со енергијата во принцип имаат голема економска смисла. Најдобар начин за да се намалат трошоците за енергија е да се осигурите дека домот ви е добро изолиран. Со подобрена изолација можете да заштедите пари на сметките за енергија и да создадете поздрав дом, намалувајќи го провевот. Одведете го еколошки прифатливиот начин на живот уште еден чекор понапред и изберете изолација со помош на волна и дрвени влакна наместо коневенционалната плоча од пена. Друг одличен начин да заштедите енергија и да го одржувате домот ладен лете и топол зиме е надградба на енергетски ефикасни прозорци. Според Министерството за енергетика на САД, 25-30% од енергијата за греење и ладење се губи преку нашите прозорци.
Исто така, сѐ поголем број граѓани се одлучуваат на своите покриви да надградат фотоволтаици за производство на електрична енергија со цел да ги намалат сметките за струја, да дејстуваат еколошки и да помогнат колку што можат, како и да дадат придонес во надминувањето на енергетската криза. На краток рок оваа инвестиција претставува свесно пренасочување кон поодржлив, еколошки извор на енергија, но нејзината вистинска вредност е во долготрајната корист од инвестицијата, која ќе овозможи заштедување средства и енергија, а зад себе ќе остави почиста и поздрава околина.
И покрај повисоките стартни трошоци, купувањето ефикасни технологии во најголем број случаи ќе се исплаќа бидејќи ќе се користи помалку енергија од претходно и поради тоа
што ќе бидат пониски трошоците за поправка и за одржување. Во согласност со денешните потреби на корисниците и фокусирајќи на се трендовите што го диктираат развојот на пазарот, компанијата Кроација осигурување – неживот воведе две новини во вид на промотивни акции за корисниците, кои во своите домови имаат имплементирано обновливи извори на енергија – Екодом и Екокаско.
ЕКОДОМ овозможува со секое осигурување стан или куќа (домаќинско или пожарна полиса), под услов да има инсталирано систем за обновлива енергија (соларни панели за производство на електрична енергија, соларни колектори за затоплување санитарна вода при користење клима-уред, инвертер или при греење со парно), осигуреникот/договарачот се стекнува со 50 отсто попуст на полисата за семејно осигурување од незгода – Blue Family.
Во рамките на ЕКОКАСКО, со секоја каско полиса за хибридно или електрично возило, осигуреникот/договарачот се стекнува со 50 отсто попуст на полисата за семејно осигурување од незгода – Blue Family.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски: Владата работи на европската интеграција, ред е и ЕУ да покаже посветеност

Во интервју за NewsMax Balkans, министерот за надворешни работи и надворешна трговија, Тимчо Муцунски, зборуваше за европската интеграција на државата, регионалните прашања, членството во НАТО, партнерството со ЕУ во сферата на безбедноста и одбраната, како и за странските инвестиции.
„Подготвени сме да ги завршиме тешките реформи – и веќе тоа го правиме. Со тоа јасно го демонстрираме стратешкиот правец во кој се движиме. Но време е и Европската Унија, нејзините институции и земји-членки, да покажат подеднаква посветеност на нашиот европски пат,“ изјави министерот Муцунски.
Тој нагласи дека Владата е посветена на европската интеграција преку спроведување на реформи и исполнување на мерливи критериуми што самата Унија ги поставила, но дека е потребна одлучност, фер пристап и предвидлива патека за напредокот на земјата и додаде дека државата црвсто стои на своите стратешки приоритети членството во НАТО, посветеноста на патот кон Европската Унија и стратешкото партнерство со САД.
Министерот се осврна и на членството во НАТО и придонесот на државата кон регионалната, европската и глобалната безбедност, вклучително и преку Партнерството за безбедност и одбрана меѓу Македонија и ЕУ, договорите за стратешко партнерство со Обединетото Кралство и Унгарија.
Во делот на економијата, министерот истакна дека според најновите статистики, Северна Македонија е лидер во регионот и во Европа по обем на странски инвестиции во однос на БДП.
„Граѓаните и бизнисите сакаат резултатите да ги почувствуваат и на терен. Најчесто бенефитите од големите инвестиции се видливи по шест месеци до една година, преку нови и подобро платени работни места, зголемена продуктивност и соработка со домашни компании,“ додаде Муцунски.
Тој посочи дека Министерството за надворешни работи и надворешна трговија, во координација со Дирекцијата за ТИРЗ, работи на обезбедување сигурност и поддршка за странските инвеститори, со крајна цел граѓаните да го почувствуваат ефектот на инвестициите во нивниот животен стандард.
„Ветувам дека ќе работиме уште посилно за да се позиционираме уште подобро во следното мерење наредната година,“ заклучи министерот Муцунски во интервјуто за NewsMax Balkans.
Македонија
Градинките во Аеродром добија прочистувачи за воздух

Општина Аеродром направи значаен чекор кон побезбедна и поздрава средина за децата во детските градинки на нејзината територија, поставувајќи прочистувачи на воздух со највисоки стандарди.
Станува збор за висококвалитетни прочистувачи кои користат Х14 ХЕПА филтри што задржуваат над 99.995% од вирусите, бактериите и други микроорганизми, обезбедувајќи квалитет на воздух споредлив со стерилни простории, поставени во градинките „Срничка“, „Калинка“, „Црвенкапа“, „Лале“, „Чекорче“, „Бамби“, „Буба Мара“, „Сонце“, „Пчелка 1 и 2“ и „Лавче“.
Дополнително, прочистувачите имаат и префилтер со активен јаглен кој ја намалува непријатната миризба, а ја редуцира и концентрацијата на озон, азотни оксиди (NO₂) и летливи органски соединенија (VOCs). Прочистувачите имаат капацитет за проток на воздух од 2500 кубни метри на час, овозможувајќи петкратна размена на воздух во просториите на час.
Овој проект е резултат на договорот што неодамна го потпиша в. д. градоначалникот на Општина Аеродром, Дејан Митески, со Владата, со цел значително да се намалат негативните влијанија од аерозагадувањето, проблем кој за жал ги засега многу општини во Македонија, особено во зимскиот период.
„Здравјето и безбедноста на нашите најмали се врвен приоритет за Општина Аеродром. Со овие современи прочистувачи на воздух обезбедуваме чист и свеж воздух во сите детски градинки и создаваме побезбедна средина за децата да можат да растат и да се развиваат здраво“, изјави Митески, потенцирајќи дека е тоа дел од долгорочната посветеност за подобрување на квалитетот на животот и заштита од сите видови загадувачи што влијаат врз здравјето.
Македонија
(Видео) По десет дена борба, дождот го изгасна пожарот кај Јасен

Дождот кој заврна пред 7.00 часот утрово и врнеше нешто повеќе од два часа на подрачјето на ловиштето Јасен, помогна пожарот кој трае повеќе од десетина дена, да биде изгаснат, извести директорот на Дирекцијата за заштита и спасување, Стојанче Ангелов.
Но, додава тој, и покрај поголемата количина на заврнат дожд, на некои места од пожарната линија се уште може да се забележи чадење поради што по кревањето на маглата и чадот ќе продолжи пешадиско дејствување врз жешките точки кои покажуваат знаци на горење. Овој терен ќе биде пребаран и со дронови со термални камери.
Екипи на ЈП Јасен продолжуваат со патролирање се додека не се потврди дека пожарот е целосно изгаснат.
Дожд заврна претежно во северните и северозападните делови на државата додека во источните, југоисточните, централните и југозападните делови досега немаше врнежи.
Според прогнозите на УХМР денес се очекува силен ветар до 60 км на час кој значително ќе го зголеми ризикот од појава на пожари на отворен простор и нивно брзо ширење поради што апелирам до граѓаните да бидат исклучително внимателни за да не предизивикаат пожар но и да го лријават секое сомнително однесување.
Ангелов апелира доколку граѓаните забележат електрични жици кои се допираат или искрат веднаш да пријават во ЕВН или на бројот 112.