Македонија
Еколозите бараат решенија за заштита на Дримскиот басен, а со тоа и на Охридското Езеро
Денес и утре, во Охрид, се одржува 6. годишна дримска конференција, на која учество зедоа околу 120 учесници – претставници на надлежните институции во Дримскиот басен од Македонија, Албанија, Црна Гора, Косово, како и претставници од меѓународните организации и донатори.
Конференцијата се организира во рамките на Дримската координирана акција (CORDA) за имплементација на меморандумот за разбирање за Дрим (MoU) и поддржувачкиот проект на ГЕФ/УНДП: „Овозможување прекугранична соработка и интегрирано управување со водните ресурси во проширениот басен на Дрим“.
На отварањето на настанот присуствуваше и Ана Петровска, државен секретар во Министерството за животна средина и просторно планирање. Во воведното обраќање Петровска ги поздрави напорите за одржување на ваков комплексен форум на кој ќе се дискутира за проблемите и решенијата за заштита на Дримскиот басен, а со тоа и на Охридското Езеро, особено што во последно време тоа е една од жешките еколошки точки.
Според неа, особено важни се наодите на дијагностичката анализа на Басенот направена со поддршка на ГЕФ, кои укажуваат дека контролата на протоците на водата во низводните држави во зависност од работата на хидроенергетските проекти, потоа транспорт на седиментите и пливачкиот отпад и поплавите се главните идентфикувани заеднички проблеми на засегнатите држави. Посакувајќи им успешна работа на учесниците, Петровска го искажа задоволството од високиот степен на соработка и посветеност на државите во решавање на заедничките проблеми.
Настанот го отвори Дејан Пановски, програмски директор на проектот, а воведни обраќања имаа и Анита Коџоман, раководител на одделението за енергетика, животна средина и управување со ризици од катастрофи во УНДП, која образложи во која фаза е проектот со наговестување дека во иднина следува утврдување акциски план и спроведување преговори меѓу државите и новиот регионален советник во Економска комисија на Обединетите нации за Европа, Сарангу Раднарагча, која истакна дека УНЕЦЕ-конвенцијата е меѓу првите со фокус на водата – енергетиката, храната и екосистемите.
На конференцијата, покрај нацртот на прекуграничната дијагностичка анализа на Басенот, се преставени и извештаите за работата на ГЕФ-дримскиот проект, посебните изготвени извештаи за хидрологијата и за загадувањето на Басенот, а главна тема на која панелистите дискутираат денес и утре е поврзаноста помеѓу водата-храната-енергијата и екосистемот во Дримскиот басен и интерсекторската координација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).
Македонија
Евроинтеграцијата е дијалог, а не диктат: Сиљановска-Давкова се обрати на Парискиот мировен форум
Претседателката Гордана Сиљановска-Давкова во рамки на учеството на осмиот Париски мировен форум, се обрати на сесијата посветена на младите и европската перспектива на Балканот.
Таа укажа на суштинската важност на регионалната соработка и повика на разбирање и дијалог потенцирајќи дека евроинтеграцијата не може да биде диктат, туку е дијалог.
„Регионалната соработка за мене е неверојатно важна. Не може да избегаме од регионот, тој ни е судбина, ова важи не само за нас кои се уште чекаме да станеме кандидати или да ги завршат некои држави преговорите со ЕУ, но и за оние коишто веќе се во ЕУ, а припаѓаат на нашиот регион“, изјави таа по завршувањето на сесијата, со којашто модерираше Мишел Дикло од „Институтот Монтејн“.
На сесијата таа говореше и за безбедносната состојба во Европа поради која не смееме да бидеме оставени во геополитички вакуум и го реафирмираше ставот дека проширувањето на Унијата е безбедносно, а не само прашање на проширување.
„Она што е чудно е што во 2019 година беа сменети правилата на играта среде игра, што е невообичаено ни за спортски натпревари, ниту пак во политички преговори, бидејќи беше воведена нова методологија“, вели Сиљановска-Давкова во изјавата.
Според неа од интерес за регионалната стабилност, регионалната демократија, но и за Европската Унија е, да гледа на регионот како на систем на врзани садови и да направи храбар чекор како оној во 2004 година, односно да покаже иновативност во креирањето на конечни решенија за т.н. Западен Балкан, како неразделен дел од Европа.

