Македонија
„ЕУ – Владеење на правото“ – работен состанок на истражителите од сите истражни центри во јавните обвинителства

Во организација на проектот „Поддршка на ЕУ за владеење на правото“, во Јавното обвинителство денеска се одржа работен состанок на истражителите од истражните центри формирани во Основното јавно обвинителство за гонење на организиран криминал и корупција и во основните јавни обвинителства во Скопје, Куманово и во Тетово.
На состанокот се анализираше функционалноста на истражните центри, се разменија искуства од досегашното работење и се дискутираа препораки за натамошен развој.
Во своето обраќање, Јавниот обвинител нагласи дека и покрај заложбите за јакнење на капацитетите на истражните центри, а со самото тоа и за осамостојување на јавните обвинителства во водењето на истрагите, финансиските ресурси кои државата ги издвојува за оваа намена сепак не се доволни.
„Зборуваме за истражни центри, а ниту еден истражен центар не може да функционира и да одговори на задачите без современа опрема, без средства за преземање на истражните дејствија, за што сега во главно се потпираме на донации. Правдата е инвестиција на целата држава“, рече Коцевски.
Тој најави дека ќе ги посети сите основни јавни обвинителства во државава, а едно од прашањата кое притоа ќе го испита е потребата за формирање истражни центри и во други обвинителства со проширена надлежност.
„Доколку таква потреба биде препознаена, ќе ве повикам да ги споделите своите искуства и да го пренесете начинот на функционирање кој веќе дава резултати. Исто така, ќе ве охрабрам да ги користите и сите можности и канали за меѓуинституционална, но и меѓународна соработка кои дополнително ќе ви ја олеснат вашата работа и ќе придонесат за вашата ефикасност“, додаде Коцевски.
Во однос на меѓународната соработка, свое излагање имаше Ленче Ристоска, јавен обвинител за врски со Европравда, која ги презентираше можностите за институционална поддршка од меѓународен карактер. Имајќи го предвид значењето на финансиските истраги, полициски службеници од Република Словенија споделија компаративни искуства околу начинот на спроведување на финансиските истраги.
Истражителите самостојно преземаат голем број различни дејствија – прибирање документација, барања до институции, учествуваат при претреси и лишување од слобода на лица, а се ангажирани и во дејствија на меѓународна соработка со истражни органи од други земји. Во 2023 година бројот на предмети во кои постапувале истражителите од истражниот центар на Основното јавно обвинителство Скопје е практично речиси удвоен – од 150 предмети во 2022 на 287 предмети во текот на 2023 година. Вкупниот број на оперативни истражни дејствија преземени преку овој истражен центар е неколкукратно зголемен во однос на претходната година. Воспоставено е поврзување со базите на податоци на Централниот регистар, на МВР, со базите на податоци на Агенцијата за катастар на недвижности и Агенцијата за вработување, со што практично се зголеми ефикасноста на постапувањето.
По целосното опремување на новите простории на Основното јавно обвинителство за гонење на организиран криминал и корупција значително се подобрија условите за функционирање и на тој истражен центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) „Избери време и место, избери и новинари, донеси и публика, излези да се соочиме, јас ќе дојдам сам“, му порача Максим Димитриевски на Филипче

Лидерот на Движењето ЗНАМ – за наша Македонија Максим Димитриевски денеска возврати на синоќешната изјава лидерот на опозицијата Венко Филипче.
„Првиот соработник на министерот за смрт во владата на Груевски од позиција на самопрогласен лидер на СДСМ обвинува за соработка. Човек кој во себе нема никакви социјалдемократски вредности, бидејќи времето го поминува во луксуз, раскош на јахти и во скапи автомобили.
Во континуитет поддржан од неговиот политички гуру – Зоран Заев, не може да биде човек што ќе ја претствува социјалдемократијата. Истиот ниту знае со колкав имот располага, ниту може самиот становите да си ги преброи, па оставам на јавноста да процени дали тој е вистински социјалдемократ“, изјави Димитриевски.
За жал, рече тој, една некогаш државотворна партија каква што беше СДСМ денес се сведува под 100 илјади гласови и неа секојденвно ја напуштаат сите нејзини вистински членови и се придружуваат на ЗНАМ, бидејќи препознаваат дека нашето Движење е политичка партија која се создаде од обичните луѓе и ги држи крушевските и асномските идеали.
„Бидејќи колку што гледам, неговото време поминува, претежно во Дубаи, ќе треба да даде објаснување за многу отворени прашања. На пример, како се добива златна виза и дополнително за сите инвестиции со кои средства се прават и пласираат таму. Бидејќи за да добиеш таква виза првенствено треба да бидеш инвеститор. Како тоа еден човек, во овој случај со докторска плата поседува толкав имот“, потенцираше Димитриевски и дополни.
„Јас и денеска ќе повторам. Нека избере и време и место, нека избере новинари, дури и оние апологети што му се на платен список и нека се одважи да дојде на ТВ дуел пред лицето на јавноста да ги соочиме аргументите и фактите. Па да видиме кој е подизведувач. Ете Венко, одважи се и излези да се соочиме, верувам дека ќе смогнеш храброст, ако сакаш поведи и публика со себе. Јас ќе дојдам сам“.
Македонија
(Видео) Бујар Османи: Предвремени избори ќе има во март или април

Кандидатот за градоначалник на Општина Чаир, Бујар Османи, ја коментираше изјавата на премиерот Христијан Мицкоски дека по локалните избори е можно одржување предвремени парламентарни избори, потврдувајќи дека според неговите сознанија и проценки, таквите избори ќе се одржат во март или април следната година.
„Тоа е всушност тоа што го кажувам јас и ние од почетокот, дека да, ќе има предвремени парламентарни избори некаде во март или април. И ова го кажувам најаргументирано, врз основа на сите разговори и договори што ги има на политичката сцена“, изјави Османи.
Тој додаде дека изјавата на премиерот само го потврдува она на што ДУИ и другите опозициски политички сили укажувале со месеци, дека сегашната влада е нестабилна и неодржлива.
„Се разбира дека на премиерот веројатно му требаа дополнителни аргументи, коишто сега ги гледа на терен, во односот на силите и тоа што се случува. Ситуацијата е неодржлива, и затоа веќе почна и тој да го спрема теренот“, рече Османи.
Тој истакна дека најавените избори ќе бидат можност да се избере нова влада со јасен европски и економски фокус.
„Јас ви тврдам дека предвремени парламентарни избори ќе има во март–април и ќе има нова влада која ќе го откочи европскиот процес, ќе го врати соживотот и економскиот просперитет на земјата“, порача Османи.
Македонија
Герасимовски и советниците спречија изградба на зграда: „Безбедноста на граѓаните на прво место“

На предлог на градоначалникот на општина Центар, Горан Герасимовски, Советот на општина Центар со 19 гласа „за“ и и еден воздржан донесе одлука за суспендирање на примената на градежна парцела во рамки на ДУП „Буњаковец 1.
Причината за суспензијата е изградба на објект чија реализација може да предизвика сериозни безбедносни и правни импликации. Градежната парцела се наоѓа на аголот на булеварите Климент Охридски и Митрополит Теодосиј Гологанов, а единствениот пристап до неа минува покрај студентскиот дом „Кузман Јосифовски-Питу“, каде се наоѓа резервоар со запаллива материја која се користи за греење, што претставува ризик од пожар и бара изработка на посебен елаборат со еколошки анализи и согласности, известува Општината.
Пристапот исто така минува преку подземни инсталации кои ја снабдуваат целата населба и студентскиот дом, како и преку објекти легализирани во минатото, пред повеќе години, за кои е потребна постапка за нивно отстанување , процес кој може да предизвика долги и комплексни правни последици.
Општината повеќе од две години работи на соодветно решавање на овој случај, но досегашните барања за соодветен сообраќаен проект не беа уважени од соодветните институции.
Поради тоа, се предлага суспензија за градење на конкретната градежна парцела се додека не се обезбедат безбедносни и правно сигурни услови за пристап и реализација на објектот, се наведува во соопштението на Општината.
„Мојот приоритет е безбедноста на граѓаните и инфраструктурата. Нема да дозволам да се загрози безбедноста на жителите на Центар, но истовремено ќе внимаваме да се заштитат интересите на сите инволвирани страни. Важно е да бидеме целосно сигурни дека сите услови се исполнети за да може да се гради објектот.Во меѓувреме, подготвуваме нов ДУП кој ќе ги реши овие прашања и ќе овозможи безбеден и законит пристап до парцелите“, истакна Герасимовски.