Македонија
Жерновски на конференција на ОБСЕ во Малага и билатерални средби со колеги од регионот и Европа

Заменик-министерот за надворешни работи, Андреј Жерновски, во наредните неколку дена ќе учествува на медитеранската конференција (ОБСЕ 2018) со наслов „Важноста на енергијата за економски развој и соработка на Медитеранот“.
Како што соопшти МНР, конференцијата се одржува во Малага, Шпанија.
Конференцијата на ОБСЕ е организирана во соработка со словачкото претседателство со ОБСЕ-медитеранската контакт-група и со Шпанија како земја домаќин, односно со словачкиот и шпанскиот министер за надворешни работи, Мирослав Лајчак и Јосеп Борел Фонтелис, додаваат од македонското МНР.
Во сооопштението се посочува дека оваа конференција ќе ги обедини клучните експерти од енергетскиот јавен и приватен сектор од Европа и Медитеранот, а во фокусот на дискусиите ќе бидат повеќе економски и енергетски области, меѓу кои поврзаноста, развојот и соработката меѓу земјите и улогата на енергетиката, понатаму заштита на критична енергетска инфраструктура, обновливи извори на енергија и многу други.
Заменик-министерот ќе има свое обраќање на панелот на тема „Енергијата како предуслов за економски развој и соработка на Медитеранот“, соопшти МНР.
На маргините на конференцијата предвидено е Жерновски да оствари и повеќе билатерални средби со колегите од регионот и Европа, на кои ќе се разговара за евро-атлантските перспективи на земјата, почнувањето на процесот на уставните измени со цел имплементација на договорот со Грција, како и за актуелните политички состојби во Република Македонија и регионот, посочуваат од Министерството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.
„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада“, наведува Битиќи.
И затоа, додаде тој, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност.
„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“, стои во објавата на Битиќи.
Македонија
Поради пожарот кај Јасен, затворен за сообраќај патот Македонски Брод – Скопје

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, информира АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути, додека на останатите гранични премини од македонска страна нема подолги задржувања при влез или излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Меџити: 65 милиони евра за Универзитетскиот кампус и подземниот паркинг на Плоштад Скендербег во Скопје

Изградбата на Универзитетскиот кампус „Мајка Тереза“ и подземниот паркинг на Плоштад Скендербег стануваат реалност. За овие крупни проекти се обезбедени 65 милиони евра од државниот буџет, соопшти првиот вицепремиер Изет Меџити.
Според него, реализацијата на овие проекти ќе започне многу скоро.
„Сè е подготвено за нивниот почеток. Овие инвестиции ќе донесат долгорочни придобивки за студентите, граѓаните и економскиот развој на Скопје. Во таа насока, денес остварив значаен состанок со министерот за транспорт, Александар Николовски, директорот на Инспекторатот за градежништво и претставници на Општина Чаир, каде што се договоривме за конкретните чекори што ќе го обезбедат итното започнување на овие проекти. Овие инвестиции поставуваат нови темели за урбаното и образовното модернизирање на нашиот град, означувајќи клучен момент за стратешкиот развој на Скопје. Со оваа посветеност, отвораме нова фаза, каде визијата за функционален, иновативен и развоен град се претвора во реалност. Благодарение на меѓуинституционалната координација и заедничката посветеност, многу брзо ќе започне теренската реализација на овие проекти од национално и стратешко значење. Ние ги исполнуваме ветувањата и ја претвораме визијата во реалност!“, напиша Меџити.