Македонија
Заев, Анѓушев и Тевдовски работат за интересите на олигарсите, обвинува опозицијата

СДСМ својата неспособност на економски план се обидува да ја прикрие со штетни договори и капитулација на сите страни. Огромната нула на економски план не може ниту еден капитулантски договор да ја прикрие. Нула проценти раст на БДП за 2017 година, и очаен раст од 0,1 процент за првиот квартал од 2018 година е резултатот од неспособноста на црното економско трио Заев, Анѓушев и Тевдовски, се вели во соопштението на ВМРО-ДПМНЕ.
Според опозициската партија, Заев, Анѓушев и Тевдовски работат единствено за сопствените бизнис интереси и интересите на олигарсите кои се стекнаа со огромен капитал на грбот на граѓаните за време на криминалната транзиција повторно дело на СДСМ.
„Стравот кај граѓаните е реален, а се враќаат спомените од мрачните 90-ти кога илјадници граѓани остана без работни места и беа доведени на работ на егзистенцијата. Повторно се склучува договор со Грција со кој Македонија повторно губи и повторно тоа го прави влада на СДСМ. Секојдневно во медиумите може да прочитаме вести за стечајни постапки на фирми кои до пред една година успешно работеа, исто како во време на транзиција. Додека за сето тоа време кланот Заеви ги брои милионите на своите сметки.
Економијата е руинирана, ништо од ветувањето на СДСМ за 500 евра просечна плата, ништо од враќањето на парите кај граѓаните, поврат на ДДВ нема, единствено нешто што е сигурно е тоа што ќе бидат зголемени давачките на граѓаните кон државата. Даноците ќе се зголемуваат, акцизата веќе се зголеми, а куповната моќ на граѓаните е во континуиран пад. Буџетот се полни на грбот на граѓаните, а секојдневно можеме да прочитаме за некое ново задолжување на државата. И покрај тоа што државата е на работ на должничко ропство, капитални проекти нема, реализацијата на капиталните инвестиции за првиот квартал од 2018 година е под 11 проценти. Каде одат парите, за кои граѓаните ги задолжува СДСМ? Дали можеби се инвестираат во плантажите за марихуана на Заев или пак во фирмите на Анѓушев?“, прашува партијата.
„Едно е јасно додека Македонија се носи кон економска депресија, истовремено се распродаваат државните и националните интереси наоколу. СДСМ е едно големо цунами за државата на сите полиња, а цената за тоа ја плаќаат граѓаните. Народот знае што се случува, народот го живее ветениот „живот“ секој ден и се погласно вели, нема да ви помине“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Владата на Мицкоски со своето неодговорно однесување се заканува долгорочно да ги загрози перспективите на земјава за членството во ЕУ“, велат од ДУИ

„Владата на Христијан Мицкоски, водејќи се од популистичкиот бран кој ВМРО ДПМНЕ го јавнаа уште кога беа опозиција, со своето неодговорно однесување, се заканува долгорочно да ги загрози перспективите на земјава за остварување на стратешката цел – членството во ЕУ“, велат од ДУИ.
„Иако го поставија како прв приоритет во рамките на новата Влада, Премиерот и неговиот најблизок круг целосно се откажаа од европското досие, и тоа веќе не го кријат во нивните настапи.
Не само со небулозното одбивање на Уставното дополнувања со неколку малцинства, туку Премиерот наоколу се фали дека новата Влада успеала да ја надмудри и Грција во изигрување на преспанскиот „Ерга омнес“ и се фали дека сѐ помасовно се изоставува делот „Северна“ од името на земјава.
Најавија дека ќе оформат иницијатива за создавање консензус по прашањето на европската перспектива на земјава, што е преставува добра интенција.
Но во јавноста секојдневно ги гледаме како внатре водат „лов на вештерки“ за тоа кој извршил поголемо предавство, кој кажал „Северна“, кој бара Уставни измени итн.; додека во исто време и надвор создаваат непријатели наоколу и меѓу соседите, и во Брисел и во останатите европски политички центри.
Денес Владата не само што нема консензус за европската перспектива, туку јавно се расфрлаат со некакви апстрактни гаранции, кои, парадоксално, ние ѝ ги наметнуваме на ЕУ како услов, небаре нам ни е местото да ставиме бенчмарк од наша страна, доколку Европската Унија сака да ги продолжи преговорите со нас.
Политичката перверзија оди дотаму што никој точно не знае какви гаранции всушност ние бараме. Има нејасни пораки од кого тие се бараат, кој треба да ги испорача, кој треба да ги ревидира, да потврди дека се исполнети, од кого имаме поддршка за тоа итн.
Владата свесно создава „нов спор за името“ кој треба да ја држи земјата надвор од интегративните процеси кои ќе значат извлекување на земјата од балканската кал.
Република Северна Македонија денес е меѓународно изолирана земја која ниту остварува, и која ниту има официјални билатерални посети од нашите сојузници и партнери.
Обратно, земјава влегува во разни контроверзни партнерства со автократи;обезбедува финансиски средства од сомнителни избори, под нејасни околности и услови; а и најавува влегување на сомнителни и контроверзни бизниси во земјава.
На земјава ѝ е потребна нова политичка платформа која ќе има јасна европска перспектива, преку зачувување на националното достоинство на сите граѓани и сите етнички заедници.
Оваа влада целосно го загуби легитимитетот за остварување на таква платформа и затоа се потребни предвремени парламентарни избори“, соопшти ДУИ.
Македонија
Дел од општините Карпош и Кисела Вода денеска без струја

Од ЕВН Македонија АД известуваат дека поради технички зафати во електродистрибутивната мрежа денеска без електрична енергија ќе останат:
· Во периодот од 09:00 – 12:00 часот улицата Иван Аговски зграда бр.10 влез1, општина Карпош;
· Во периодот од 09:00 – 15:00 часот улицата Јабланица, улицата Саса, населба Пинтија, општина Кисела Вода.
Македонија
Сончево време со температура до 24 степени

Времето денеска ќе биде сончево со мала до умерена облачност. Ќе дува слаб до умерен ветер претежно од северен правец. Минималната температура ќе биде во интервал од 2 до 9, а максималната ќе достигне од 16 до 24 степени, информира УХРМ
Во Скопје, сончево со мала до умерена облачност и со слаб до умерен ветер од северен правец. Минималната температура ќе се спушти до 7, а максималната ќе достигне до 24 степени.
Во четврток кон крајот на денот, во текот на ноќта и во петок под влијание на влажен бран ќе има врнежи од дожд, кои локално ќе бидат пообилни. Во деновите од викендот ќе се задржи променливо облачно време со повремен локален дожд. Температурите ќе бидат под просекот за овој период од годината.