Македонија
Заев: Апелирам за еднакви можности на сите деца

Претседателот на Владата, Зоран Заев, претпладнево се обрати на конференцијата на тема „Важноста за рано инвестирање: Зајакнување на раниот детски развој во земјите од Западен Балкан“, што е организирана од Светската банка и поддржана од Владата на Република Македонија.
На конференцијата во Скопје, на која присуствуваа и претставници од земјите од регионот, се обратија и високите претставници на Светска банка, Линда ван Гелдер, регионалната директорка на Светска банка за Западен Балкан, и Хаиме Саведра, сениор-директор за глобалната едукациска пракса на Светска банка, како и министерките за образование и труд и социјална политика, Рената Дескоска и Мила Царовска.
Генералната порака со која се согласни сите е дека од големо значење е еднаквиот пристап кон сите деца, обезбедувањето еднакви можности за сите деца и вклучување на сите деца во воспитно-образовниот процес затоа што практиките покажуваат поврзаност на подобри социо-економски состојби во една држава со стапката на опфатени деца во предучилишното воспитание и образование.
Премиерот рече дека постои свесност кај Владата колку е важен раниот детски развој во формирањето на личноста.
„Тие деца еден ден треба да бидат успешни лекари, професори, вредни работници и работодавци, чесни судии, политичари. Тие деца, кои и да се тие, независно дали живеат во Република Македонија, Западен Балкан, Европа, Африка, Америка, каде и да е во светот, сите тие се наши деца. Затоа што ниеден човек на планетата Земја не може сам. И затоа што има нешта што се заеднички.
На сите во светот ни се потребни мир и напредок“, изјави Заев.
Претседателот на Владата нагласи дека оваа Влада прави сè што може да постави систем на социјална заштита на граѓаните што ќе им овозможи на граѓаните и на семејствата егзистенцијален мир, кој понатаму влијае и на квалитетот на живот, а со тоа и на квалитетот на развој на личноста.
Исто така, се работи и на зголемување на опфатот на деца во градинките за 50 проценти и проширувања на капацитетите, посебно во сиромашните и руралните делови на земјата со цел обезбедување бесплатни три часа дневно образование во согласност со универзалните цели на ЕУ.
„За оваа 2018 година планираме уште 18 нови проширувања на градинки. Во 2017 се почнати 13 проширувања на градинки надвор од Скопје. Нашата цел е изградба и нови капацитети во 2019 година за што ја обезбедуваме потребната документација. Ние знаеме што покажуваат меѓународните пракси – дека предучилишното образование има огромна улога по кој пат ќе тргнат децата понатаму во животот. Исто така и дека квалитетните предучилишни програми водат кон пониска стапка на порано напуштање на образованието, намалени стапки на криминал и невработеност“, рече премиерот Заев.
Министерката за образование, Дескоска, истакна дека Владата на образованието гледа како на влог во иднината бидејќи вредностите на кои ќе ги научиме децата, солидарноста, владеењето на правото, почитта и грижата кон животната средина, тоа ќе се рефлектира подоцна и во општеството.
„Свесни сме дека добра и квалитетна едукативна програма во градинките, зголемување на опфатот на деца во градинките, ќе се рефлектира врз постигнувањата на целиот образовен систем, а дека во основното образование ќе имаме поподготвени деца“, рече министерката Дескоска.
Таа посочи и дека во моментот во Македонија се одвива важна реформа во образованието со долгорочни бенефити за државата.
Министерката за труд и социјална политика, Царовска, ја нагласи улогата на семејството во квалитетот на развој на личноста, но рече дека децата мора добро да се подготват за животот што следува, а за тоа се важни и институциите.
„Работиме на квалитетен ран детски развој. Ги менуваме состојбите. Затекнавме запуштен систем на образованите, запуштена грижа за децата. 11 години не се градеа градинки. Вложуваме во градинките, работиме на поголем опфат на деца и на квалитетот на воспитно- образовниот процес“, рече министерката Царовска.
Регионалната директорка на Светската банка за Западен Балкан, Линда ван Гелдер, обрна внимание на значењето на што поголема инклузија на ранливите деца, што има понатаму улога и во нивниот развој и во намалувањето на сиромаштијата и повика на конкретни стратегии во државите во согласност со универзалните цели во државите. Потребни се мерки за рано детско образование, дополни директорката Ван Гелдер. Сениор-директорот за глобалната едукациска пракса на Светска банка, Саведра, нагласи дека децата не можат да чекаат и дека е важно сите да добијат фер можности. Освен квантитетот, тој посочи и на важноста од квалитетот на наставата во градинките и училиштата и додаде дека јавните политики за детски развој се ургентна потреба и одговорност на сите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пронајдени двете девојки од Португалија кои се изгубија во реонот на Водно – Матка

Денес околу 17.00 часот од страна на Центарот за управување со кризи бевме известени за две изгубени туристки во реонот од врвот на Водно кон Матка, извести директорот на ДЗС, Стојанче Ангелов.
Како што информираше Ангелов, Дирекцијата за заштита и спасување итно извршила мобилизација на тимот за спасување на планина од Тетово и истиот веднаш бил упатен во пребарување на теренот.
Во 18.40 двете девојки од Португалија беа пронајдени и однесени до ресторанот Матка каде ги пречека Конзулот на Република Португалија, додава Ангелов.
Македонија
Дел од Ѓорче Петров утре без струја

Од ЕВН Македонија АД известуваат дека утре без електрична енергија ќе останат:
– во периодот од 09.00 до 15.00 часот, корисниците од улиците Веле Марков, Ибе Паликуќа, Воин Драшковиќ, Рафаел Батино. (општина Ѓорче Петров)
Македонија
Меџити прими жители од Страчинце: Анализите на експертите јасно покажаа дека отворањето на каменоломот ќе има сериозни последици врз животната средина

Првиот заменик-претседател на Владата и министер за животна средина и просторно планирање, Изет Меџити, денес ги прими во својот кабинет жителите од селото Страчинце, со кои одржа отворен состанок за одлуката за одбивање на барањето за отворање на каменолом во оваа скопско село.
Министерот Меџити ги информираше жителите за професионалните и институционалните причини што доведоа до оваа одлука. Анализите на експертите јасно покажаа дека отворањето на каменоломот ќе има сериозни последици врз животната средина, ризик од поплави и негативно влијание врз јавното здравје, велат од Министерството.
На состанокот беше истакнато дека приоритет е заштитата на животот и благосостојбата на граѓаните над секој економски интерес.
Меџити истакна дека следниот чекор е конечно поништување на концесијата во Влада, со што ова прашање ќе добие трајно решение.
Жителите на Страчинце се заблагодарија за одлуката и за приемот што го оствари министерот Меџити, нагласувајќи дека овој состанок е пример за владеење со отворен дијалог и чесна соработка со граѓаните.