Премиерот Зоран Заев денеска го прими алтернативниот министер за надворешни работи на Грција задолжен за европски прашања, Милтијадис Варвициотис, кој е во работна посета на нашата земја.

„На средбата како посебно важни беа истакнати проектите во енергетиката како стратешка и приоритетна дејност за двете земји за што сведочат веќе потврдените проекти за соработка и за заеднички инвестиции, кои имаат и силно регионално значење и потенцијал. За време на разговорот, од двете страни беше потенцирано задоволството што го нагласуваат инвеститорите од Грција за соработката со Владата на Северна Македонија, која, како што беше посочено, е дополнителен мотив и испраќа силна порака дека бизнис-заедницата на Хеленската Република има пријателска средина за инвестиции во нашата земја“, соопштија од Владата.

На средбата било потврдено дека од исклучителен заеднички интерес и стратешка цел на двете земји е Северна Македонија колку што може побргу да ги почне пристапните преговори со ЕУ и дека Грција во таа насока ќе продолжи со силната поддршка.

„Премиерот Заев истакна дека за Република Северна Македонија напредокот во интеграцијата во ЕУ првенствено треба да зависи од домашните реформи поврзани со постигнувањето на европските стандарди, а не од билатералните прашања, и дека во таа насока земјата има постигнато огромен напредок во усогласувањето на домашната легислатива со онаа на ЕУ како резултат на интензивниот процес на реформи и за европеизација на сите сегменти на општеството“, се наведува во соопштението.

Заев повторил дека е отворена поканата премиерот на Грција, Кирјакос Мицотакис, да ја посети нашата држава.