Блиску сме до членството во ЕУ и НАТО, нема да дозволиме процесот да го нарушат или да го доведат во ризик неодговорни ултиматуми. Ова денеска го истакна првиот човек на Владата, Зоран Заев, за време на средбата со државниот министер надлежен за Европа, Михаел Рот.

Премиерот се осврна на актуелната политичка ситуација, со посебен акцент на процесот на постигнување политичка согласност за основните принципи и прашања поврзани со реализацијата на референдумот за договорот со Грција, кој ги донесе пред успешна завршница евро-атлантските аспирации на Македонија.

Заев ја нагласи поддршката што во изминатиот период дојде од Германија и од канцеларката Ангела Меркел во трансформацијата на политичката криза во која беше Македонија.

„Многу сме блиску до реализацијата на стратешките цели на Македонија – членството во ЕУ и НАТО, и нема да дозволиме процесот да го нарушат или да го доведат во ризик неодговорни ултиматуми. Остануваме посветени до крајот да стигнеме до решенија што ќе овозможат услови за фер референдум во интерес на граѓаните на нашата земја. Законот е еднаков за сите, амнестијата за политичкиот криминал е невозможна и особено нема да попуштиме пред притисокот да отстапиме од владеењето на правото“, рече Заев.

На средбата државниот министер надлежен за Европа во Министерството за надворешни работи на Германија, Михаел Рот, истакна дека Македонија со датумот за преговори со ЕУ и со поканата за НАТО отвори ново поглавје во својата историја и истовремено отвори ново значајно поглавје и во историјата на Европа во периодот кога за ЕУ е од огромна важност единството на сите европски земји.

Рот додаде дека Македонија и понатаму може да смета на целосна и силна поддршка од Германија. Тој потенцира дека претстојниот референдум е момент за одлука за европската иднина за Македонија и дека одговорноста сега треба да ја преземат сите релевантни политички субјекти во земјата вклучувајќи ја и опозицијата.