Македонија
Заев: Државата се грижи за Охридското Езеро, следува комплетна санација на колекторскиот систем
На трибината посветена на економските политики и перспективи „Силна економија – шанса за сите“, која се одржа во Охрид, премиерот Заев зборуваше за плановите и проектите од интерес на Охриѓани, на кои засилено се работи и се во фокусот за следниот период, информираат од владината прес-служба.
„Основавме државно претпријатие ‘Колекторски системи’. Овие денови се конституираат управните и надзорните одбори за да може да го преземеме ‘Проаква’ директно, кое должи 900 милиони денари. Комплименти за сегашното раководство, кое врати 120 милиони денари од обврските, но тоа не е доволно, блокирани се општините Охрид и Струга и тоа е проблем што го решаваме. 400 милиони денари должат само за струја на ЕВН, на пример. Со ваквото преземање државата ја презема обврската за колекторскиот систем во Охрид. Што значи тоа? Не може само Охрид и охриѓани да водат грижа за Охридското Езеро и Охрид, туку сите ние, државата. Дел од парите е предвиден во буџетот, дел со основање на овие институции ќе биде дополнително предвиден за да можеме комплетно да го зајакнеме колекторскиот систем“, рече Заев.
Премиерот додаде дека веќе се испланирани пари за комплетна санација, со внатрешни цевки, во самиот колектор, кои се нотирани како две слаби точки на колекторскиот систем.
„Ги знам деталите, само 3 пумпни станици работат, 18 не функционираат. Делот од Канео до Струга е главен за санирање, а делот кон премиерската и претседателската вила мора да го санираме заедно со филтер-станиците. Проекцијата е 4 милиони евра. Имаме можност и за грант или ќе платиме од буџетот за целиот колектор да го ставиме во функција. Се создава можност да се формираат нови водостопански претпријатија, Водовод Охрид и Водовод Струга, да се разграничат и да имаат иднина“, рече премиерот и додаде дека обезбедувањето чиста вода и заштитата на езерото е од интерес на сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одземен имунитетот на судијата Наќе Георгиев, Обвинителството отвори истрага и против Мемети, но за него не се бара притвор
Обвинителството отвори истрага за врховниот судија, Наќе Георгиев и членот на Советот на јавни обвинители, Иџет Мемети, кои се сомничат за „примање награда за противзаконито влијание“.
Од тука информираа дека акцијата за апсење на Георгиев следела по пријава од син на обвинет во предмет што се води во Основното јавно обвинителство за гонење на организиран криминал и корупција.
Обвинителството објави дека донесена е наредба за спроведување на истражна постапка за судијата и уште едно лице за кои постои основано сомнение дека сториле кривично дело Примање награда за противзаконито влијание од член 359 од Кривичниот законик.
Денеска основниот суд ќе одлучува за притворот за врховиот судија, а во однос на Мемети засега според доказите, нема основа да се предложи притвор.
„Според сознанијата добиени од пријавителот, првоосомничениот користејќи ја својата службена положба и претпоставено влијание лажно ветувал погодности за обвинет (татко на пријавителот) во друга постапка што се води пред Основното јавно обвинителство за гонење на организиран криминал и корупција, и лажно прикажале дека ќе извршат влијание заедно со второосомничениот. Предметниот обвинител, вчера вечер покрај предлозите за претрес на повеќе локации, ценејќи дека се исполнети условите до Основниот кривичен суд Скопје достави и предлог за определување на мерката притвор за првоосомничениот. Со оглед на тоа што станува збор за судија во највисокиот суд во државата – Врховниот суд кој ужива имунитет, а кој е фатен in flagranti во извршување на кривичното дело, предлогот преку Основниот кривичен суд е доставен на одлучување до Судскиот совет на РСМ кој во текот на ноќта му го одзеде имунитетот, по што денеска Основниот кривичен суд Скопје ќе одлучува за предложената мерка“, велат од Обвинителството.
Како што се додава, прибраните докази и извршените претреси до овој момент даваат законски основ на предметниот јавен обвинител да предложи притвор само за врховиот судија кој бил затекнат при извршување на кривичното дело.
Во однос второосомничениот, како што информираат од Обвинителството, до овој момент доказите не даваат основи за да се предложи најстрога мерка за обезбедување. Истрагата продолжува до целосна проверка на сите околности и наводи.
Синоќа по наредба на судија на претходна постапка извршен беше претрес во домот на членот на Советот на јавни обвинители Иџет Мемети во Тетово и претрес во службените простории на Советот на јавни обвинители.
Македонија
МВР утврди неправилности: забавниот парк со панорамско тркало во Карпош ќе биде отстранет
Постапувајќи по допрен глас дека во Скопје, на подрачјето на Општина Карпош, поточно пред спортскиот центар Борис Трајковски без соодветни документи и потребни дозволи се поставени реквизити за забавен парк меѓу кои и панорамско тркало, полицијата излезе на лице место и презема конкретни соодветни мерки и активности од делокругот на својата надлежност и овластувања.
„Од страна на инспекциските служби поведена е постапка за констатираните неправилности, по што ке бидат преземени конкретни мерки во насока на отстранување на истите, престанување со вршење на активноста, како и дислоцирање на реквизитите“, информираа од МВР.
За случајот, викендов алармираше Град Скопје, од кадешто беше истакнато дека фирмата „Дизниленд реквизити“ од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, повикаа од Градот.
Македонија
Претрес и кај Иџет Мемети во случајот со барањето поткуп
Синоќа, по наредба на судија на претходна постапка, извршен е претрес во домот на членот на Советот на јавните обвинители, Иџет Мемети, во Тетово и претрес во службените простории на Советот на јавните обвинители.
Претресот е поради сомнеж дека Мемети заедно со врховниот судија Наке Горгиев имал влијание злоупотребувајќи ја позицијата член на Советот на јавните обвинители во случајот барање мито за олеснителни околности.
Мемети е и поранешен министер за правда, уставен судија, државен советник во Владата и член на Државната изборна комисија.
Судијата Наке Георгиев вчера беше приведен кога бил фатен со мито.