Ние политичарите треба да знаеме што правиме со историјата што ја пишуваме денеска за да им оставиме на идните генерации аманет на пријателство и заедништво, а не делби. Ова го истакна премиерот Зоран Заев одговарајќи на новинарско прашање за последниот развој на настаните во врска со блокирањето на процесот на проширување на ЕУ.

„Наша задача е да одиме напред. Да чекориме напред и јас верувам дека најбргу што може ќе се создадат услови. Ние не се откажуваме“, рече Заев додавајќи дека на проблемот со блокадата ќе се работи интензивно по празниците.

Во однос на реакциите на Словачка и Чешка, Заев рече дека му е драго што сѐ уште има европско во Европската Унија. Најмалку што смее да направи ЕУ, вели Заев, е да ги изгуби европските вредности и принципи.

„Се надевам дека тој дух ЕУ ќе продолжи да го испраќа кон нас земјите кандидати за членство затоа што ние немаме друга алтернатива. Како што сум кажал и порано, се надевам дека ЕУ нема да го изгасне светлото во мракот за да не бидеме изгубени. Таа водилка е нашата мотивација и за реформите и за да бидеме подобри граѓани, за да си ја европеизираме државата, да го средиме правосудниот систем, да имаме сила и енергија да градиме за нашите деца, за идните генерации, да го осовремениме здравството, да ја подобриме уште повеќе инфраструктурата“, додаде Заев.

Благодарение на Чешка и Словачка, Советот на ЕУ не ги усвои заклучоците за проширувањето.

Двете земји оценија дека текстот на заклучокот оди предалеку во мешањето на билатералните спорови, откако германското претседателство прифати вметнување на пасус кој гласи дека Договорите со Грција и Бугарија треба да им стават крај на барањата поврзани со „погрешно толкување на историјата“.

Чешка и Словачка сметаат дека ЕУ не треба да суди како да се идентификува една земја, ниту кој јазик да го говори и предупредија дека ваквата реченица претставува опасен преседан за процесот на проширување во иднина.

Оваа тема ќе биде препуштена на Португалија, која во новата година го презема претседавањето со Унијата.