Македонија
Заев и Дудуш со заедничка видеопорака за Меѓународниот ден на Ромите

Премиерот Зоран Заев и градоначалникот на општина Шуто Оризари, Курто Дудуш, по повод Меѓународниот ден на Ромите упатија заедничка видеопорака до сите граѓани од ромската заедница со честитки за празникот, со кој се слават уникатната традиција и културата на Ромите како значаен дел од светското културно наследство.
Премиерот Заев во својот дел од пораката и честитките повикува сите граѓани на нашата земја да бидат активни и одговорни во придонесот кон создавањето еднакво праведно општество за сите и држава што вложува во своите луѓе, држава што е дел од глобалниот демократски свет.
„Заедно работиме за едноставен пристап до квалитетни социјални услуги, до широки можности за образование и за вработување, за сеопфатно учество на граѓаните од ромската заедница. За оваа интеграција обезбедивме посебни финансии од централниот буџет и од донаторите за квалитетно вклучување на Ромите во сите процеси на нашето општество“, вели претседателот на Владата во видеочеститката по повод 8 Април – Меѓународниот ден на Ромите.
Градоначалникот на општина Шуто Оризари, Курто Дудуш, во оваа заедничка честитка до ромската заедница по повод празникот истакнува дека денеска, кога Ромите го прославуваат денот на својата химна, знаме и јазик, и кога гордо ги промовираат својата култура и традиција, Општината продолжува понатаму да обезбедува достоинствен живот за сите.
„Ја развиваме Шуто Оризари во модерна локална самоуправа. Заедно ги рушиме стереотипите и градиме светла иднина во едно мултикултурно општество. Ги подобруваме инфраструктурата и заштита на животната средина. Благодарение на заедничките залагања на локалната самоуправа и на Владата оваа година ќе се пушти во употреба новата детска градинка ‘8 Април’, која ќе придонесе за квалитетно предучилишно образование, како и читалница за студентите Роми во рамките на средното училиште ‘Шаип Јусуф’. Градиме нови паркови и обезбедуваме достоинствени услови за раст и развој на нашите деца и млади“, нагласува во честитката градоначалникот на Шуто Оризари, Дудуш.
Премиерот Заев во заедничката порака по повод Меѓународниот ден на Ромите уште потенцира дека тој и Владата внимателно ги следат сите активности за спроведување на политиките за квалитетно вклучување на Ромите во сите процеси на нашето општество и ги охрабруваат припадниците на заедницата на пошироко учество во овие процеси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Доаѓа невреме – силен ветер, пороен дожд и град ќе ја погодат Македонија

Управата за хидрометеоролошки работи информира дека под влијание на влажна и нестабилна воздушна маса, во понеделник и вторник на повеќе места ќе биде нестабилно со пороен дожд и грмежи.
„Процесите ќе бидат поинтензивни особено во текот утрешниот ден кога локално ќе бидат во форма на невреме со пообилен пороен дожд за кратко време (над 15л/м2), силен ветер (над 60км/ч) и изолирана појава на град“, велат од УХМР.
Според најавите, од среда ќе преовладува претежно стабилно и потопло време со пораст на дневната температура.
Во Скопје, утре и во вторник времето ќе биде променливо облачно и нестабилно со пороен дожд и грмежи. Во делови од котлината ќе има појава на невреме со пообилен пороен дожд, силен ветер и изолирана појава на град.
Од УХМР препорачуваат во случај на појава на електрични празнења се препорачува поголема внимателност, да не се престојува на отворен простор и под осамени дрвја.
Македонија
ЦУК: Четири активни пожари во Македонија, 2 под контрола

Центарот за управување со кризи информира дека на територијата на Македонија се евидентирани вкупно 15 пожари на отворен простор, од кои: 4 се активни, 2 се под контрола, а9 се изгаснати.
Активни пожари: 4
1. Општина Чашка – над Богомила (мешана шума)
2. Општина Куманово – с. Слупчане (нискостеблеста шума)
3. Општина Студеничани – с. Дречавица (шумски пожар во планински терен)
4. Општина Македонски Брод – с. Грешница (деградирана нискостеблеста шума)
Под контрола: 2
1. Општина Долнени – с. Стровија, позади место викано Гајдарец-Клепало (нискостеблеста шума)
2. Општина Желино – с. Церово (мешана шума)
Изгаснати се пожарите во Берово, Брвеница, Струмица, Гевгелија, Куманово, Крушево, Долнени, Струга и Студеничани.
Македонија
(Видео) Избувнаа повеќе нови пожари – „Во Македонија има многу граѓани кои не ѝ мислат добро“, вели Михаилов

Попладнево низ повеќе делови од Македонија се појавија нови пожари, откако претпладне беше стабилизирана состојбата на теренот.
Надлежните институции реагираат со интервенции на копно и од воздух.
Информации објави заменик-директорот на ЈП „Национални шуми“, Кире Михаилов.
„Дефинитивно во Македонија има многу граѓани кои не и мислат добро, друго објаснување за ова кое се случува јас немам!
Пожаров кој го гледате е над село Ваксинце, општина Липково и избил пред 30 тина минути, а истиот ветерот многу бргу го шири накај Стража!
Таму се две екипи на ЈП “Македонски Шуми” Куманово и ТППЕ Куманово!
Откако ја стабилизиравме целосно состојбата и со добра координација на Главниот Штаб на Македонија до пладне го решивме и последниот активен пожар кај Долнени, во текот на попладневните часови веќе имаме пријава за неколку нови пожари!
После пладне е пријавен нов пожар во близина на село Богомила, општина Велес каде веднаш од страна на Главниот Штаб беа упатени сили на ЈП “Македонски Шуми” , екипи на МВР и месно население, а таму на помош беше пратен и делуваше од воздух еден хеликоптер.
Во 14 часот, во исто време се појавија два пожари, едниот во близина на село Милетино во општина Брвеница кој по брзата интервенција од копно беше локализиран и пожарот во општина Желино, во близина на село Церово на кој во моментов во координација со Главниот Штаб делуваат копнени сили составени од ТППЕ и ЈП “Македонски Шуми” и двата ЕР Трактори на ДЗС!
Исто така, нашите копнени сили кои сеуште се наоѓаат високо на пожарот во Долнени над селото Стровија попладнево ни пријавија појава на дури четири нови чадења или нови пожари кој во моментов службите ги проверуваат и пристапуваат на гасење на истите!“, напиша Михаилов на ФБ.