Премиерот Зоран Заев заедно со министерот за транспорт и врски, Горан Сугарески, денеска присуствува на настан по повод почнувањето на новата фаза од градежните работи за изградба на експресниот пат Градско-Прилеп, на делницата Градско-Дреново. Изградбата на оваа делница е финансирана со средства на ИПА2-програмата за поддршка на Европската Унија.

„Граѓаните од Градско, Росоман, Неготино, Кавадарци, Прилеп, Битола, Крушево, Кривогаштани и другите поголеми и помали населени места зедоа учество, директно учество, во инклузивните програми на владата. Се вклучија со нивните предлози и упорност да почне и да се заврши овој експресен пат како исклучително важна делница од Коридорот 10, но и исклучително важна патна артерија за двата региона за граѓаните и компаниите. Најважно за граѓаните е што овој експресен пат отвора нови можности за брз транспорт на луѓе и производи, како и непречено и лесно поврзување на идеите за нови иницијативи, нови проекти, нови контакти“, порача премиерот во своето обраќање.

Во своето обраќање пред присутните амбасадарот на ЕУ во Македонија, Семуел Жбогар, истакна дека трансевропската патна мрежа, која е столб на европскиот внатрешен пазар, добива форма. Амбасадорот потенцира дека со отворањето на делницата Демир Капија-Смоквица се комплетира и последната алка што недостигаше во Коридорот 10.

„Денеска се среќаваме за да започнеме со изградбата на експресниот пат, делницата Градско-Дреново. Експресниот пат во должина од 15,5 км е дел од кракот Д на Коридорот 10,“ соопшти амбасадорот Жбогар.
Амбасадорот Жбогар рече дека Коридорот 10 е најважната меѓународна рута што поминува низ Македонија и што го поврзува регионот со преостанатиот дел од Европа и ги поврзува сегашните и идните земји членки на ЕУ и изрази очекување дека овој експресен пат значително ќе придонесе кон поттикнување на економскиот раст.

Министерот за транспорт и врски, Горан Сугарески, порача дека за граѓаните од Вардарскиот и Пелагонискиот Регион и за сите граѓани од Македонија денешниот ден е многу значаен. „На мое огромно задоволство започнуваме со еден од најкрупните капитални проекти. Изградбата на најзначајната патна артерија во регионот ќе даде нов стимул за економската моќ на регионот, а бенефитот директно ќе го почуствуваат околу 250 илјади граѓани што живеат во овој дел од Република Македонија “, порача министерот Сугарески. Во своето обраќање тој информира дека овој експресен пат од Градско до Прилеп, кој се гради во три фази, претставува вкупна инвестиција од 60 милиони евра, и ќе се гради според сите безбедносни и технички стандарди и се очекува да биде завршен во 2020 година.