Македонија
Заев на прес-конференција со Меркел, Моравјецки и Борисов: 43 милиони евра за проекти за Северна Македонија

Премиерот Зоран Заев, заедно со премиерот на Полска, Матеуш Моравјецки, со канцеларката на Сојузна Република Германија, Ангела Меркел и со премиерот на Бугарија, Борис Борисов, се обрати на заедничката, завршна прес-конференција на Самитот на Западен Балкан во Познањ, Република Полска, во својство на копретседавач на Берлинскиот процес во наредните 12 месеци, функција која ќе ја сподели со премиерот Борисов.
Во своето обраќање пред европската, регионалната и националната медиумска јавност, премиерот Заев им се заблагодари на полските домаќини за одличната организација на овој Самит, како и за бројните настани и активности кои му претходеа, и на иницијаторката на Берлинскиот процес, канцеларката Меркел, која, како што рече премиерот Заев, несомнено даде силен импулс за европската перспектива на Регионот и регионалната соработка.
„Сметам дека сите треба да бидеме горди на постигнатите резултати. Регионалната соработка доби нова димензија. Реализирани се мноштво на проекти и започнати се мноштво иницијативи кои треба да допринесат кон економски развој, зголемена трговска размена и меѓусебно подобро разбирање и помирување. Берлинскиот процес несомнено се покажа дека помага во остварувањето на стратешката цел на регионот – неговата интеграција во ЕУ, но тој не треба да го супституира пристапниот процес, туку и натаму да биде со него комплементарен“, рече Заев и додаде дека во Познањ имаше можност да се направи пресек на постигнатото и да се отвори дискусија за иднината на процесот.
„Несомнено регионот се повеќе станува сопственик на процесот. Еден од доказите за тоа е што во наредната година одлучено е Бугарија заедно со Република Северна Македонија да бидат ко-претседавачи на процесот ко-домаќини на Самитот. Тоа е извонредна вест за сите и е доказ за градењето на добрососедските односи, продлабочениот политички дијалог меѓу земјите и зрелост за повисоко ниво на соработка. Искрено се радувам, што со мојот пријател и колега, премиерот Борисов заеднички ќе ги пречекаме сите премиери од Берлинскиот процес и ќе воведеме нова практика на заедничко претседавање на една држава членка на ЕУ и една држава кандидатка за членство во ЕУ од Западен Балкан. Оваа заедничко претседавање само ќе го зацврсти нашето пријателство и ќе биде позитивен пример за идните години на Берлинскиот процес“, рече Заев. Тој додаде дека е голема чест што за прв пат од стартот на Берлинскиот процес една земја членка од Западен Балкан, кандидат за членство во ЕУ, како што е Северна Македонија, да копретседава со Берлинскиот процес и заедно со Бугарија да ги организира и координира проектите за поддршка на политиките на евроинтеграции на регионот.
Заев истакна дека оваа чест, истовремено е и одговорност и обврска да ги одржиме перформансите на иницијативата.
„Во наредните години нашата визија е целиот Регион да се најде во повисока фаза на интеграција во ЕУ. Напредокот во пристапниот процес отвора уште поголем потенцијал за соработка и економски развој на Регионот. Уверен сум дека овие цели ќе бидат постигнати“, потенцираше премиерот Заев на заедничката прес-конференција со полскиот премиер Моравјецки, со канцеларката Меркел и со бугарскиот премиер Борисов.
Во продолжение премиерот Заев изрази благодарност во име на Владата и во име на народот на земјата за новиот пакет за поврзаност, со кој Европската комисија им оддаде признание на политиките на Северна Македонија со фонд од 42,7 милиони евра за три проекти од огромна важност за земјата.
„Околу 13,2 милиони евра ни се доделени за Интерконекторот меѓу Република Грција и Република Северна Македонија за снабдување со природен гас, како еден од најзначајните енергетски проекти во овој дел на Европа, чија реализација ќе значи можност, иднина, конкурентност, безбедност и сигурност при снабдувањето со природен гас. Нашата држава, нашата Влада и јас лично ќе се заложиме овој проект да продолжи и кон нашите први соседи Косово и Србија и така да добие уште поголема регионална вредност. Тоа ќе ја зголеми енергетската независност на државите од Западен Балкан, и ќе ја зголеми меѓусебната поврзаност на овие држави и нивните економии во регионот“, рече Заев.
Тој објасни дека околу 2,8 милиони евра од овој фонд ѝ се доделени на земјата за изградба на заедничкиот железнички граничен премин и патен пристап на Табановце на границата меѓу Република Србија и Република Северна Македонија, за да се олесни и подобри движењето на стоки и лица долж Коридорот 10, и дека 27,8 милиони евра ќе бидат насочени за изградба на Автопатот А4, Блаце – Скопје, како придонес кон подобра поврзаност во Коридорот 8 и како продолжение на завршениот автопат Приштина – Блаце до нашата граница.
„Сите овие проекти имаат вредност и корист за целиот регион и ќе имаат позитивен ефект врз раздвижувањето на економијата и олеснувањето на патувањето на луѓето. Таквите проекти ја изразуваат вистинската вредност на Берлинскиот процес и регионалната соработка, а граѓаните и компаниите можат да го почувствуваат тоа во секојдневниот живот и работа“, рече премиерот Заев на заедничката завршна прес-конференција со премиерот на Полска, Матеуш Моравјецки, со канцеларката на Сојузна Република Германија, Ангела Меркел и со премиерот на Република Бугарија, Борис Борисов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Кисела Вода отворен нов парк со сообраќаен полигон

Градоначалникот на Општина Кисела Вода, Орце Ѓорѓиевски, свечено го отвори новиот парк со прв инклузивен сообраќаен полигон во општината, простор наменет за игра, учење и развој на сите деца, вклучително и на децата со попреченост.
На местото на поранешниот запоставен простор, општината доби нов, современо уреден простор од околу 1.250 м², лоциран во рамки на Државното училиште за рехабилитација на деца и младинци со оштетен вид „Димитар Влахов“.
Паркот е дел од пошироката стратегија на Општина Кисела Вода за подобрување на животната средина и создавање нови зелени површини. Во изминатите четири години, беа оформени и уредени над 80.000 м² ново зеленило, со што значително се унапреди квалитетот на живеење. Полигонoт, пак, е прилагоден за потребите на сите деца и опремен со пристапни патеки, визуелни елементи и тактилни површини.
-Грижата за лицата со попреченост е еден од врвните приоритети во нашата работа. Отворањето на овој парк и инклузивен сообраќаен полигон е конкретен доказ за тоа. Се наоѓаме во училиште кое има специјална задача, да обезбеди образование и поддршка за децата со оштетен вид, и не случајно, токму тука вложуваме во инфраструктура која е достапна и корисна за сите. Уште на почетокот на мојот мандат, започнавме да ја поддржуваме оваа установа со донација на книги напишани на Брајова азбука за училишната библиотека. Денес, таа поддршка добива и просторна димензија. Но, со овој парк испраќаме и друга силна порака- дека Кисела Вода останува посветена на создавање зелени, чисти и функционални површини што ќе им служат на сите генерации. Од депонии правиме паркови. Од запуштени простори, безбедни и уредени катчиња за децата. И тоа е визијата со која продолжуваме да ја менуваме општината на подобро- изјави градоначалникот Ѓорѓиевски.
Инаку, во Кисела Вода по извршената реконструкција, се наоѓа првото целосно инклузивно основно училиште во државата, „Кузман Јосифовски Питу“, како и првата инклузивна јавна детска градинка во Скопје. Со ваквите проекти, локалната самоуправа покажува дека грижата за најранливите категории не е само декларативна, туку реална и видлива на терен.
Македонија
Во моментот нема активни пожари, надлежните апелираат да се внимава за Илинденските празници

Според податоците на Центарот за управување со кризи (ЦУК), заклучно со 18:00 часот , нема ниту еден активен пожар. Шест се целосно изгаснати, додека еден е ставен под контрола.
Под контрола е пожарот во Општина Берово, во реонот на планината Готен кон Малешевските Планини, каде што е зафатена нискостеблеста шума, смрека, борова и букова шума, како и грмушки и ниска вегетација.
Во изминатото деноноќие, пожарните служби успешно се справија со шест пожари на отворен простор ширум земјата. Во Општина Карбинци, пожар избувна во шумскиот предел кај селото Јунузлија. Слична ситуација се случи и во Општина Кавадарци, каде што пламна ниска вегетација помеѓу селата Галиште и Ќесендре.
Во Општина Прилеп беа активни два пожара. Првиот се прошири од селото Бешиште, низ местото познато како Бешишки Рид, и продолжи кон територијата на Општина Новаци и граничниот појас со Грција. Вториот зафати поширок реон помеѓу селата Царевиќ, Смолани, Радобил и Дрен, каде што гореше мешана шума и нискостеблеста вегетација.
Во скопската Општина Гази Баба беше изгаснат пожар во село Трубарево, каде што гореше отпад, додека во Општина Гевгелија беше изгаснат уште еден пожар во селото Милетево, кој зафати ниска вегетација.
Директорот на Дирекцијата за заштита и спасување, Стојанче Ангелов, денеска апелираше за внимателност за Илинденските празници, за да не се предизвикаат пожари.
Македонија
Арсовска за Чаир: Денес 50 дивоградби, утре уште 50, луѓето не заслужуваат да живеат безбедносно загрозени

Градоначалничката на Скопје, Данела Арсовска, денеска изјави дека до Обвинителството за гонење на организиран криминал и корупција е доставена обемна документација од 3.200 страници поврзана со сомнителни постапки за легализација и изградба на објекти во општина Чаир.
На брифинг со новинарите, Арсовска посочи дека станува збор за згради кои сѐ уште се градат – без документација, без проект, без платени комуналии и без статика.
„Ако нема санкционирање, денеска имате 50 згради што се градат. Утре ќе имате уште 50. Таму живеат луѓе, не бројки. И тие луѓе не заслужуваат да живеат во 12-катници без гаранција за нивната безбедност“, рече таа, предупредувајќи на сериозен преседан доколку институциите не постапат.
Документите доставени до обвинителството содржат, како што рече, докази за фалсификати, меѓу кои и изјави потпишани од лица кои во моментот на наводната изградба биле малолетни.
Таа ја нарече состојбата „очигледна операција на перење пари“, и нагласи дека ваков размер на криминал не е забележан во ниту една друга општина во Скопје.
Обвинителството веќе постапува по пријавата – одземена е документација од Општина Чаир и од Министерството за транспорт и врски, а тече споредба на податоците со други институции.
Арсовска истакна дека не планира повторна кандидатура за градоначалник, но зад себе остава над 900 реализирани проекти, од кои 250 капитални, „и покрај сериозните опструкции од Советот на градот“.
Во однос на најавата на градоначалникот на Чаир, Висар Ганиу, дека ќе ја тужи, Арсовска одговори дека ќе и биде задоволство да ги соочи доказите со него, било каде и на било која платформа.