Македонија
(Видео) Заев: Никој нема да биде дискриминиран, ниту запоставен

Премиерот Зоран Заев, заедно со амбасадорот на ЕУ, Самуел Жбогар, народниот правобранител, Иџет Мемети и пратениците Амди Бајрам и Самка Ибраимовски, учествуваше на завршната конференција „Без разлики“, што е дел од проектот „Спречување на дискриминација кон ромските деца“.
Целта на конференцијата беше да се одбележи завршувањето на проектот „Спречување на дискриминација кон ромските деца“, кој е имплементиран од Националниот ромски центар во партнерство со Асоцијацијата за истражување, комуникации и развој „Паблик“, а финансиран од Европската Унија, и да се презентира извештајот „Дискриминација на децата Роми, меѓународна и домашна регулатива, национални политики и институционална поставеност – анализа на случаи од терен“, заедно со документарни видео содржини продуцирани во рамки на овој проект.
,,Сè додека постои и еден регистриран случај на дискриминација, нашата земја и обврски да изградиме едно општество за сите – останува највисоко на нашата агенда, на агендата на Владата на Република Северна Македонија. Концептот „Едно општество за сите“ ќе биде само пуста желба доколку во заедницата што ја градиме остануваат места што дозволуваат или толерираат дискриминација. Никој нема да биде дискриминиран, ниту запоставен! Најмалку тоа смее да биде некое дете. Особено не децата од ранливите категории”, рече Заев.
Тој додаде дека ги следи сите активности во решавањето на т.н. ,,ромското прашање”, затоа што, среќно општество може да изградиме само ако сме сите среќни.
,,За нас, за оваа Влада, еднаквите права и достоинствен живот за сите, се искрена верба дека тоа е патот до успешна, заедничка држава и дом за сите, интегрирана држава во Европската Унија. И веќе ги направивме новите чекори кон решавањето на горливите проблеми со домувањето, поседувањето лични документи, малолетничките бракови, пристапувањето до вработување, до здравствено осигурување, вклученоста на Ромите во културата и образованието и така натаму.На сето тоа посветено работи Министерството за труд и социјална политика, во рамките на централната власт и во соработка со општините и со граѓанските организации.
Ќе посочам некои поважни активности:Во рамките на проектот Инклузија на деца Роми во предучилишните установи во текот на учебната 2017-2018 година, запишани се вкупно 514 деца Роми, во 19 општини во Република Македонија, или 82% од предвидено како цел.
Од април, минатата година, Управата за водење на матични книги отвори процес сите лица кои не се регистрирани во Матичната книга на родени, да поднесат барање за дополнителен упис. Сакам да апелирам до службите за поголема флексибилност, треба да го забрзаме проектот заради тоа што e потребна платформа и база на многу права на граѓаните од ромската заедница, но и граѓани од другите етнички заедници. 12 ромски информативни центри, во 12 општини, работат активно на терен, на информирање, советување, упатување на граѓаните за остварување на нивните права и обврски во социјалната заштита, здравството, домувањето, вадењето лични документи.Секој ден од годината ни е важен. Сите услови за создавање заедница на еднакви можности и права се битни.
Социјалната реформа што започнавме да ја спроведуваме значи извлекување на околу 400 илјади граѓани над линијата на сиромаштијата и еднакви шанси за секое дете.Со овие реформи пристапот до детскиот и образовниот додаток се зголемува за 20 пати. Од оваа година детскиот додаток наместо досегашните 3.200 деца, ќе го користат 73.500 деца, а образовниот додаток наместо како до сега, само на 3.800 деца, им следува на преку 64 илјади деца. Овде се работи најмногу за децата од ранливите категории на граѓани или од посиромашни семејства.
Социјалната помош ја зголемуваме, и очекувам до крајот на овој месец законите да се донесат, за 300%, но овозможуваме и полесна активација на невработените на пазарот на трудот. За оваа година издвоивме рекордни 1,1 милијарда денари за оперативниот план за вработување, заради отворање на што поголем број работни места, и покрај тоа дополнителни 2,2 милијарди денари повеќе од лани за детска заштита и социјална заштита.
Воведуваме европски стандарди на социјална заштита, зашто Европа значи солидарност и социјална правда. Наша обврска е да ги следиме тие принципи.Европската социјална повелба ги гарантира социјалните и економските човекови права. Унијата вложува во унапредувањето на социјалните права и напорите тие да бидат рамноправно уживани од страна на сите граѓани, за да се спречи маргинализацијата од секаков вид.Силно верувам дека на темелите на овие принципи, можеме да изградиме поубаво, праведно и слободно општество, кое, за жал, долги години наназад државните институции избегнуваа да го прифатат како реална неопходност на нашето општество”, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова ќе учествува на третата Конференција на ОН за океанот во Ница

Претседателката Гордана Сиљановска-Давкова од денеска престојува во работна посета на Ница, Франција, каде ќе учествува на третата Конференција на Обединетите Нации за океанот (UNOC3).
За време на конференцијата Сиљановска-Давкова ќе присуствува на приемот во чест на високите гости организиран од претседателот на Француската Република, Емануел Макрон.
Таа ќе биде дел од церемонијата на отворање на Декадата за криосферски науки, во присуство на генералната директорка на УНЕСКО, Одри Азуле, како и на презентацијата на препораките од специјалните настани на UNOC3 (Конгрес за океанска наука, Форум за сина економија и финансии, Самит за пораст на нивото на морето и крајбрежна отпорност) пред шефовите на држави и влади во „Агора Нептун“ во присуство на претседателот на Француската Република.
Претседателката ќе се обрати во рамките на третата Конференција на Обединетите Нации за океанот (UNOC3), за поддршка на спроведувањето на целта 14 за: Зачувување и одржливо користење на океаните, морињата и морските ресурси за одржлив развој.
На посебна церемонија, Сиљановска-Давкова ќе го потпише Договорот во рамки на Конвенцијата на ОН за правото на морето за зачувување и одржливо користење на морската биолошка разновидност на области надвор од националната јурисдикција (BBNJ), усвоен во Њујорк на 19 јуни 2023 година.
Македонија
(Видео) Аврамовски: Наместо пари за питијади и ајваријади, општините да инвестираат во повеќе јавни паркинзи, зеленило и подобри услови во градинките и училиштата

Либерално-демократската партија (ЛДП) упатува јавен повик до општините ширум државата: да престанат со расфрлање на јавните средства за еднодневни настани и манифестации како што се питијади, ајваријади, скара фестови и слични пригоди.
„Наместо тоа, ги повикуваме општинските власти да ги насочат парите кон проекти кои навистина значат подобар живот за граѓаните: повеќе јавни паркинг места, повеќе зеленило и паркови, подобри услови во градинките и училиштата. Јавните финансии мора да се трошат одговорно и домаќински“, вели во изјава за медиумите портпаролот на ЛДП, Љубен Аврамовски.
На граѓаните не им требаат свечености еднаш годишно, посочува Аврамовски, туку чист воздух, безбедни улици, функционални училишта и паркинг решенија секој ден.
„ЛДП стои на ставот дека локалната самоуправа треба да покаже зрелост и визија. Затоа ги повикуваме сите градоначалници и советници: наместо да се натпреваруваат кој ќе донесе поголема музичка ѕвезда или ќе организира поголема питијада – да се натпреваруваат кој ќе реализира повеќе конкретни, видливи и одржливи проекти за своите сограѓани“, заклучува Аврамовски.
Македонија
ВМРО-ДПМНЕ: Аудито Q8 на Филипче кое го возеше и во предизборната кампања е купено од фирмата која продавала 3 пати поскап јаглен на ЕСМ

Додека Заеви заработувале милиони, Филипче имал лично профит од 3 пати поскапата препродажба на јаглен од Грција на ЕСМ од 2022 до 2024 година, велат од ВМРО-ДПМНЕ.
„Аудито Q8 на Филипче кое го возеше и во предизборната кампања е купено од фирмата која продавала 3 пати поскап јаглен на ЕСМ.
Во енергетска криза, кланот Заеви и Филипче преку шема на фирми препродавале јаглен на ЕСМ три пати поскапо и профитирале а граѓаните плаќале повисоки сметки за струја.
Најскап договор за јаглен, кој го склучила ЕСМ, а е по цена од 82.5 евра за еден тон со вкалкулиран ДДВ, е со компанијата „Зобек мининг груп“. Зобек мининг груп е компанија која води директно до Венко Филипче.
Газдата на Зобек мининг груп за новинарите потврдил дека тој го купил аудито на Венко Филипче, преку фирмата која препродавала три пати поскап јаглен на ЕСМ и дека сега возилото е на Филипче.
Договорот со „Зобек мининг“ бил склучен во септември 2023 година, првично за испорака на 200 илјади тони јаглен за РЕК „Битола“ во рок од една година. Со два анекса количината на испорака била зголемена, прво за 40 илјади тони, па за уште 48 илјади тони, до вкупно 288 илјади тони.
Според официјално соопштение од „Лигниторихиа Ахладас“, рудникот во Грција каде се копал јагленот, пратено до грчкото Министерство за енергетика, а до кое дошле истражувачките новинари од Македонија, од овој рудник во 2023 година во Македонија биле продадени 768 827 тони лигнит, по цена меѓу 28-30 евра по тон.
Тоа е три пати помалку од тоа што Зобек мининг груп продава.
Заеви и Филипче се богателе и луксузирале врз грбот на народот кој плаќал поскапи сметки за струја за Филипче да ќари Ауди Q8“, стои во соопштението на ВМРО-ДПМНЕ.