Македонија
Заев пред Груевски ќе ги образложува уставните измени

Сè уште не се знае дали пратениците на ВМРО-ДПМНЕ ќе учествуваат на дебата за уставните амандмани што ги предложи Владата, а кои треба да се разгледуваат на Комисија за уставни прашања.
Но, доколку денеска се отвори дебата по четирите амандмани, може да се очекува жестока дебата на Комисијата за уставни прашања во наредните максимум определни десет дена.
Актуелниот и поранишниот претседател, Талат Џафери и Трајко Вељаноски, ќе ги вкрстат копјата со свои аргументи. И двајцата имаат долгогодишно парламентарно искуство и вештини. Магистерот по одбрана ќе му се спротивстави на правникот Вељаноски. Заменик на Џафери е Џеват Адеми, заменик на Вељаноски е Амди Бајрам.
Амандманите како предлагач ќе ги образложи и брани премиерот Зоран Заев, но доколку дојде, ќе го слуша поранешниот премиер Никола Груевски, кој е член на Комисијата.
Инаку, Комисијата има претседател, шеснаесет члена и нивни заменици.
Членови, освен претседателот и заменикот, се: Бетијан Китев, Енес Ибрахим, Соња Мираковска, Самка Ибраимовски, Лилјана Поповска, Сурија Рашиди, Никола Груевски, Трајко Вељаноски, Димитар Стевананџија, Нада Ципушева, Дафина Стојаноска, Иван Стоиљковиќ, Стојан Миланов и Фадиљ Зендели.
Премиерот Зоран Заев вчера ги повика пратениците да ги поддржат измените доколку вистински се залагаат за влез во НАТО и ЕУ. Тој рече дека за време на дебатите во парламентот ќе се види дали е обезбедена двотретинска поддршка и дали мнозинството има обезбедено 80 пратенички гласа за да се менува Уставот.
За понеделник е закажана и десетдневна парламентарна дебата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шукова и Мојсова на пазарот во Тафталиџе: Ги слушнавме од прва рака проблемите на пазарџиите

Кандидатката за градоначалничка на Скопје од СДСМ, Каја Шукова, денес го посети пазарот во Тафталиџе заедно со Маја Мојосова, кандидатка за градоначалничка на општина Карпош.
„Денес бевме на пазарот во Тафталиџе заедно со Маја Мојосова, нашата кандидатка за Карпош. Ги слушнавме од прва рака проблемите на пазарџиите,“ изјави Шукова.
Таа посочи дека условите за работа се лоши, особено при екстремно високи температури.
„На вакви пеколни температури тешко се седи цел ден на тезга, немаат услови, но мораат да бидат таму. Работат напорно, чесно, и заслужуваат подобри услови за работа.“
Клучното барање кое било истакнато од страна на продавачите е јасно:
„Најчестото барање што го слушнавме беше едноставно – затворен пазар со нормални услови за работа.“
Во таа насока, Шукова истакна дека решението е веќе дел од нејзината програма.
„Во мојата програма имам конкретни проекти за затворање и модернизација на градските пазари. Пазарите ќе бидат живи, безбедни и функционални простори и за продавачите и за купувачите.“ – изјави Шукова.
Македонија
Муцунски во Истанбул се сретна со турскиот министер за надворешни работи

На маргините на состанокот на Балканската платформа за мир, министерот за надворешни работи и надворешна трговија, Тимчо Муцунски, денеска во Истанбул оствари средба со својот турски колега, министерот за надворешни работи, Хакан Фидан.
На средбата се разговараше за унапредување на билатералните политички односи, зајакнување на економската соработка и искористување на инвестициските можности. Соговорниците се осврнаа и на продлабочување на соработката во други области од заемен интерес.
Двајцата министри го потврдија силното пријателство меѓу двете држави, тесната соработка во рамките на НАТО, како и заемната поддршка во мултилатералните организации. Разговорите опфатија и актуелни регионални и геополитички прашања, со акцент на важноста од стабилен и просперитетен Балкан.
Средбата се одржа во рамки на првиот состанок на Балканската платформа за мир, иницирана од министерот за надворешни работи на Република Турција, Хакан Фидан.
Македонија
Големиот пожар кој избувна попладнево во близина на Струмица е под контрола

Големиот пожар кој избувна попладнево во близина на Струмица меѓу Градските гробишта и селото Баница и зафати огромна површина и со голема брзина се ширеше кон месноста Софилар и куќите во тој дел на градот е ставен под контрола, објави директорот на Дирекцијата за заштита и спасување (ДСЗ), Стојанче Ангелов.
Според него, големиот и црн чад излегува од склад во чиј двор од пожарот се зафатени гуми, а пожарникарите не дозволуваат пожарот да се шири кон селото Баница, градот и викендички во овој простор.
-Пожарот се движи во неколку насоки и има големи шанси да биде ставен под целосна контрола. На едно место навлезе делумно во Гробиштата во Струмица, зафати неколку квадратни метри и тука е запрен. Нема потреба од вознимереност и паника. Струмичките пожарникари побараа помош од соседните противпожарни единици, а доаѓаат и два „пинцгауери“ на ДЗС, а во случај на лош развој на настаните ќе упатиме и „ер трактори“. Во овој момент нема таква потреба, иако едниот „ер трактор“ превентивно е упатен кон Струмица, рече Ангелов во изјавата за медиумите објавена од местото на пожарот.
Соред командирот на ТППЕ Струмица, Александар Гудев, се работи за пожар од големи размери, кој засега го гаснат 30 пожарникари и 10 возила, а побарана е помош од пожарникарите од Валандово и вклучување на хеликоптер.
Од СВР Струмица попладнево упатија апел до граѓаните да не се движат во делот зафатен со пожар, а лицата кои се затекнати таму веднаш да го напуштат подрачјето.