Македонија
(Видео) Заев: Таргетот за референдумот е да излезат над 50 отсто од вкупниот број избирачи
Премиерот Зоран Заев денеска учествуваше на Меѓународната конференција насловена „Македонија гледа напред: Мигот е да се фати возот за ЕУ“, во организација на Прогрес-институтот за социјална демократија (ПИ).
Во својот говор Заев, обраќајќи им се на многубројните учесници, истакна дека оваа конференција доаѓа во клучно време и е одлична можност за да се пренесат силните пораки дека Македонија има многу важни пријатели, кои се посветени на перспективите на нашата земја.
„Драго ми е што можеме да зборуваме за прогресот на една мала земја што е кандидат за членство во Европската Унија и која има аспирации да учи од европските земји, но истовремено има амбиции да сподели свои вредности, кои можат да бидат придонес за реформирана Европа, кон која сите се стремиме, како еден од највлијателните фактори на светско ниво“, подвлече премиерот Заев, нагласувајќи дека со градењето пријателство со соседите и затворањето на сите отворени прашања, Македонија покажува европски манири дека вредностите опстојуваат и во регионот на Западен Балкан.
Тој се осврна на моментот на заокружувањето на одговорот „за“ на гласањето на референдумското прашање на 30 септември, подвлекувајќи дека на референдумот граѓаните ќе донесат одлука со која ќе ги потврдат промените што ќе ја одредат иднината на нашата земја.
Заев укажа дека анкетите покажуваат оти огромното мнозинство граѓани го поддржува референдумот и дека таргетот е да се постигне излезност на повеќе од 50 проценти од вкупниот број избирачи запишани во избирачкиот список.
Премиерот истакна дека покрај реформите, во Македонија се имплементираат и сериозни левичарски политики.
„Донесен е Законот за минимална плата, воведена е евтината тарифа за струја, се укина радиодифузната такса“, потсети Заев и најави дека деновиве Владата ќе потврди дека социјалната помош ќе се зголеми за трипати повеќе и дека ќе се зголемат платите на ранливите групи и лекарите и ќе се овозможи бесплатно здравствено лекување.
На прашањето зошто упорно ја кани и очекува партијата ВМРО-ДПМНЕ да се приклучи на кампусот „за“ во кампањата за референдумот, премиерот рече дека тој не се откажува лесно и верува силно и суштествено дека и опозицијата во Република Македонија е за ЕУ и НАТО.
„Затоа што не постои друга алтернатива за нашата земја од полноправното членство во НАТО и Европската Унија“, истакна Заев потенцирајќи дека е потребно единство, иако може опозицијата и власта да се различни и да не се согласуваат по многу прашања.
На панелот, на кој учествуваше премиерот, се обратија и претседателката на Фондацијата за европски прогресивни студии, Марија Жоао Родригез, Нилс Шмид, пратеникот во германскиот Парламент и известувач за надворешна политика на пратеничката група на СДП во Германија, Кати Пири, пратеничка во Европскиот парламент, СД група и Берт Коендерс, поранешен министер за надворешни работи на Холандија. На конференцијата, чија цел е да се дискутира и да се развијат стратегии за европска и евро-атлантска интеграција, како и за одржлива демократизација на Македонија и државите од Југоисточна Европа, учествуваа и други владини претставници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тоневски: Со мнозинство во советот одиме кон уште поголема победа во Пробиштип, време е за промени
На вечерашниот мини-митинг во општина Пробиштип, во рамки на вториот круг од локалните избори кои ќе се одржат на 2 ноември, се обрати кандидатот за градоначалник од редовите на ВМРО-ДПМНЕ, Тони Тоневски кој истакна дека во Пробиштип е потребна промена после 8 години апатија и уништување на градот, потенцирајќи дека новиот правец во кој ќе се движи општината ќе биде развиен, вистински и долгорочен со реализација на многу проекти кои ќе донесат развој и напредок на Пробиштип.
„Во првиот круг жителите на Пробиштип беа јасни, покажавте верба храброст и желба за промени, освоивме стабилно мнозинство во советот и сега сигурно со дигната глава одиме на уште поголема победа. Вие граѓаните ја препознавте програмата што значи работа, развој и сигурна иднина. Вие граѓаните го направивте вистинскиот избор за нашиот Пробиштип. Осум години стоевме во место, наместо да броиме нови индустриски погони, работни места, водоводи, ние броевме изгаснати светла во домовите. Затоа минатата недела Пробиштип испрати јасна порака, доста беше стагнација, уназадување и апатија, време е за нов правец, развиен, вистински, долгорочен“, рече Тоневски.
Кандидатот за градоначалник на општина Пробиштип посочи дека програмата е сеопфатна и е сработена заедно со граѓаните, со нивни предлози и идеи, со што ќе се инвестира во секој дел од општината, со проекти за младите да останат во својот роден град како и инвестиции во областа на туризмот, спортот и индустријата.
„Многу ми е важно нашиот град да има иднина, нашиот Пробиштип заслужува многу повеќе, ние не ветуваме чуда ние ветуваме само работа, ветуваме развој, ветуваме иднина. Во програмата се влезени вашите идеи, оваа програма е победничка, заедно ја пишувавме заедно ќе ја реализираме, ќе започнеме со нова урбанизација, нова населба за изградба на куќи и нова индустриска зона исклучиво за незагадувачка индустрија. Ќе создадеме услов за нови работни места и повисоки плати, нашиот фокус се младите, младите ќе имаат бесплатен канцелариски простор доколу сакаат да започнат сопствен бизнис и бесплатни проекти за типски куќи. Голем дел од младите ќе можат да ја градат својата кариера и во туристичката дејност затоа што инвестициите во Лесново и Пониква ќе бидат големи, ќе изградиме детско одморалиште на Пониква, ново одбојкарско игралиште, Пробиштип ќе добие и нов градски базен“, вели Тоневски.
Македонија
Aрсовска: Директорот на „Комунална“ е пуштен, Јулијана од Управен нема да ја апсат оти има албум со сликички со функционери на ВМРО
Директорот на Комунална хигиена Скопје е пуштен неколку часа откако беше приведен во станица , не е виновен за ништо, работата ја вршел чесно и совесно, напиша на социјалните мрежи градоначалничката Данела Арсовска.
„Оваа информација пристигна откако по неколку часа убедување во полициска станица, директорот на Комунална хигиена им кажал дека во срцето и душата е ВЛЕН, уште додека бил во станица му донеле да потпише изјава за членство по што е пуштен да си продолжи со успешната работа во претпријатието.
Во меѓувреме Мицковски и МВРО упорно бараат некој од ДУИ да го апсат како што ветија, тргнаа по Изет Меџити од ДУИ, па откако стана ВЛЕН си го земаа во коалиција“, напиша Арсовска на социјалните мрежи.
За апсењата во Комунална таа и претходно се огласи на „Фејсбук“. Напиша дека претседателката на Управен одбор Јулијана Спировска, нема да ја апсат „бидејќи има албум со сликички со сите функционери на ВМРО“.
„Јулијана која ја управува Комунална Хигиена Скопје е осуден криминалец во 2022 година со казна затвор за убиство и осуден криминалец во 2006 за нанесување тешки телесни повреди. Јулијана во КХС ги команда другите членови на Управен одбор од ВМРО и ВЛЕН, кои се поставени од Советот на град Скопје од ВМРО и ВЛЕН.Јулијана 3 години опструира нови камиони, инвестициска програма, вработените кои 5 години ги чистат улиците не можат да земат решение за работа поради нејзините сопартијци од ВМРО и ВЛЕН во Советот. Јулијана по наредба на ВМРО континуирано со години прави опструкции додека градот не се удави во смет. И сега директоров им е крив кој не можел да набави 35 нови камиони бидејќи тоа Јулијана го одложила за да ги набави Орце“, напиша Арсовска.
Македонија
Филипче: СДСМ води чесна кампања, ВМРО-ДПМНЕ врши притисоци, пријавивме во ДИК
Претседателот на Социјалдемократскиот сојуз на Македонија, Венко Филипче, на новинарско прашање поврзано со кампањата и која е неговата оценка за истата, изјави дека
СДСМ води чесна, искрена кампања, насочена кон граѓанските интереси, нагласувајќи ги, како што рече, сериозните изборни притисоци и нерегуларности од страна на ВМРО-ДПМНЕ, кои уредно биле пријавени до ДИК и набљудувачката мисија на ОБСЕ/ОДИХР.
„Пријавивме притисоци и закани по работните места на гласачите, особено членови и симпатизери на СДСМ, поткуп и обиди за поткуп, па дури и на самите гласачки места. Дополнително, компании биле принудувани да присуствуваат на одредени настани, што не е во духот на демократијата”, изјави Филипче.
Тој додаде дека сите овие забелешки се официјално доставени до Државната изборна комисија и до ОБСЕ/ОДИХР.
Претседателот на СДСМ направи паралела со кампањата која СДСМ ја води и го истакна контрастот со владејачката партија.
„Ние водиме чесна, искрена и позитивна кампања. Имаме добри кандидати за градоначалници и советници, добро познати во своите заедници, со програми кои реално се реализираат”, рече д-р Филипле.
Тој потенцираше дека градоначалниците на СДСМ имаат меѓу 90 и 100 отсто реализација на предизборните ветувања, за разлика од градоначалниците на ВМРО-ДПМНЕ, кои, според Филипче, „не реализирале ниту 20 отсто”.
„Нашите градоначалници имаат помеѓу 90 и 100% реализираност на ветените проекти, додека, според нашите податоци, градоначалниците на ВМРО-ДПМНЕ немаат реализирано ниту 20% од своите програми”, изјави лидерот на СДСМ, д-р Филипче.

