Министерот за јавна администрација, Горан Минчев, учествуваше на меѓународна конференција „Партнерство за реформи: Министерски дијалог Западен Балкан – Италија“, што се одржа во Рим, каде што имаше свое обраќање во рамките на министерскиот панел посветен на реформата на јавната администрација и европската интеграција.

Настанот, организиран од Министерството за јавна администрација на Италија, Националната школа за администрација на Италија (SNA) и Регионалното училиште за јавна администрација (РеСПА), ги обедини министрите од регионот, високи претставници од европските институции и експерти од областа на јавната администрација.

На конференцијата се обратија италијанскиот министер за јавна администрација Паоло Зангрило, претседателката на Националната школа за администрација Паола Северино и директорката на РеСПА Маја Хаџиска-Трендафилова.

Во своето обраќање, министерот Минчев ги претстави главните реформски приоритети на Владата во областа на јавната администрација и ја истакна стратешката насока на државата во процесот на европска интеграција.

„Нашата цел е да изградиме ефикасна, професионална и транспарентна администрација што ќе биде вистински сервис на граѓаните и носител на европските вредности“, истакна министерот Минчев

Министерот се осврна и на новата законска рамка за јавната служба, посочувајќи дека трите нови системски закони поставуваат темели за современ и европски модел на управување со човечките ресурси.

„Преку новите закони воспоставуваме мерит-систем заснован на професионалност, компетенции и интегритет. Нашата цел е администрација што ќе функционира според правила, а не според исклучоци“, потенцираше Минчев.

Посебен акцент беше ставен на процесот за воспоставување на Законот за високата раководна служба.

„Со овој закон создадовме основа за професионален управувачки кадар избран според заслуги, а не според политичка припадност. Тоа е клучно за стабилно и континуирано функционирање на институциите“, додаде тој.

Во однос на регионалната соработка, министерот истакна дека реформските процеси не можат да се спроведуваат изолирано и дека размената на искуства преку иницијативите на РеСПА претставува значаен поттик за унапредување на административните стандарди во регионот.

Министерот Минчев на крајот нагласи дека јавната администрација треба да биде движечка сила на промените, нагласувајќи дека професионалноста и дигитализацијата се клучните механизми што ја зајакнуваат довербата и го поттикнуваат европскиот напредок. Тој порача дека Министерството ќе продолжи проактивно да ги спроведува реформите што ја подигнуваат ефикасноста, транспарентноста и одговорноста на институциите, со единствена цел, администрација што вистински им служи на граѓаните и ја води државата напред кон Европската Унија.

Шахот станува сè поприсутен во воспитно-образовниот процес, а растечкиот интерес кај учениците ја зголемува потребата наставниците да бидат соодветно обучени за негово реализирање во рамки на наставата. Во таа насока, денес во големата сала на Општина Кисела Вода се одржа обука за наставници од основните училишта на територијата на општината.

Обуката ја организира Шаховскиот сојуз на Град Скопје, кој во континуитет работи на развојот и интеграцијата на шахот во основното образование. Како дел од соработката, Шаховскиот сојуз донираше и по два шаха за сите основни училишта во општината.

Со текот на активностите и методолошкиот пристап што наставниците ќе го применуваат во наставата се запозна и градоначалничката Бети Стаменкоска-Трајкоска, која присуствуваше на дел од обуката.

-Како општина, даваме силна поддршка на сите процеси што го унапредуваат образованието и создаваат вредности кај најмладите. Шахот е предмет кој развива концентрација, аналитичко размислување и дисциплина, вештини што им се важни на учениците. Оваа обука им овозможува на наставниците професионално да се подготват и да го пренесат знаењето на квалитетен и структуриран начин. Верувам дека со ваквите програми ќе продолжиме да градиме посилен образовен систем во нашата општина- изјави градоначалничката Бети Стаменкоска Трајкоска.

-Обуката е важна и задолжителна, бидејќи наставниците стекнатите знаења ќе ги имплементираат во изборниот предмет Шах, во рамките на наставата. Шахот веќе три години се имплементира како изборен предмет. Од прво до трето одделение е воспоставен како слободна ученичка активност, а во четврто и петто како изборен предмет. Наставниците што ќе ја завршат обуката добиваат сертификат со кој можат да држат часови по шах- изјави Ѓорѓи Миновски, претседател на Шаховскиот сојуз на Град Скопје.

Не надворешни закани, туку лошо владеење, тоа е најголемата закана за граѓаните од регионот и тоа го видовме со трагедиите во Нови Сад, Кочани, Тузла, но и во Грција со железничката несреќа, оти очигледно и земјите членки не се имуни на корупција”, порача претседателот на “Солуција”, Никола Димитров на Белградската безбедносна конференција.

„Имаме сѐ помалку демократија и сѐ помалку принципиелни актери на глобалната сцена”, кажа Димитров зборувајќи денеска во Белград на панел дискусијата “Изгубени во геополитиката? Пост – југословенски погледи на безбедноста, суверенитетот и иднината на Европа”.

„Ако ги прашате борците за демократија, за човекови права, владеење на лесното и медиумски слободи, кои им се најголеми сојузници верувам дека полесно ќе одговореа на ова прашање пред 10 години. Нашите природни сојузници за демократски процеси веќе не се очигледни”, оцени Димитров анализирајќи ги слабостите на вредносниот систем на Западниот свет.

Зборувајќи за најголемите закани за балканските граѓани денес, тој истакна дека недостигот на добро владеење е безбедносен ризик број еден во сите наши земји:

„Видовме со трагедијата во Нови Сад, видовме и во мојата земја, со страшниот пожар во Кочани, неодамна видовме и во Тузла, ама видовме и во Грција со големата железничка несреќа, оти очигледно и земјите членки не се имуни. Неказнивноста, корупцијата и лошото владеење се најголем ризик”.

Дали сме Македонци и дали ни е јазикот македонски не е дебата за овој век и за овој континент.

Во однос на надворешните фактори, Димитров ја цитираше анкетата на ИРИ од минатата година, каде македонските граѓани оценуваат дека за нас најголема закана е Бугарија, додека Грција после Преспанскиот договор падна на шесто место.

“Го решивме проблемот, инвестиравме огромен политички капитал и кога мислевме дека конечно ќе се занимаваме со реформи, ние бевме пак блокирани и тоа од Франција прво. Тоа вето од Франција го поплочи патот за ново вето од Бугарија, за прашања што не се поврзани со вистинските критериуми. Дали сме ние Македонци и дали зборуваме македонски јазик – ова не е се дебати од овој век и не се дебати за овој континент!”, порача Димитров.

Тој заклучи дека имаме сите за растење и ние како регион и самата ЕУ:

“Треба да учиме од балтичките земји како да соработуваме и како да си помагаме. Точно е дека сега има едем прозорец, поттикнат од војната во Украина и дополнително од предизвиците во трансатлантските релации и нам како Европејци мора да ни стане јасно дека ЕУ мора повеќе сама да се грижи за себе”.

На панел дискусијата заедно со Димитров беа и Петра Ротер, професорка по меѓународни односи од Љубљана, Неџма Џановиќ Мирашчија, професорка по политички науки од Сараево и Вук Вуксановиќ, од Белградскиот центар за безбедносни политики.