Македонија
Заедничка седница со косовската влада на 25 јануари

Првиот вицепремиер и министер за политички систем и односи меѓу заедниците, Артан Груби, одржа работен состанок со вицепремиерката на Косово, Албулена Балај Халимај. Груби на прес-конференција рече дека со неговата колешка разговарале за заедничката владина седница меѓу нашите две земји што ќе се одржи на 25 јануари следната година.
„Разговаравме за предлог-договорите што беа предложени од министрите на нашите две влади, а кои се многубројни. Овие предолг-договори ќе поминат и разгледуваат од техничките и политичките групи кои свечено на 25 јануари следната година да бидат потпишани од министрите и да бидат свечено презентирани за време на заедничката меѓувладина седница што ќе се одржи во Скопје“, изјави Груби.
Груби исто така информираше дека со косовската вицепремиерка разговарале и за одржувањето состаноци на техничките групи со цел да се комплетираат до крајот на оваа година сите текстови на договорите што ќе треба да бидат потпишани.
Халимај за време на заедничката прес-конференција му истакна на Груби дека е задоволна што гледа една влада којашто има добра волја да соработува со Република Косово, потенцирајќи дека косовската страна е исто така многу заинтересирана за потпишување договори кои се во интерес на нашите земји, но исто така и на нашите граѓани.
„Досега има околу 20 договори кои се очекува да бидат потпишани и за кои ќе се разговара на ниво на експерти, техничко ниво и потоа и од политиката. Постојат многу договори што беа потпишани претходно со Република Северна Македонија и кои беа и сè уште се успешни. Она што вреди да се спомене на оваа меѓувладина седница важна точка е потпишувањето на договорот за граничните премини кои ќе станат One Stop Shop или едношалтерски систем “, рече Балај Халимај.
Двајцата вицепремиери оценија дека Република Северна Македонија и Република Косово имаат и ќе продолжат да одржуваат добри билатерални односи и дека целта на двете земји е интеграција во Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.