Македонија
Законот за родова еднаквост се подготвува низ процес на широки консултации

Министерката за труд и социјална политика Јагода Шахпаска одржа работна средба со Симона Граната Менгини, секретарката на Венецијанската комисија, на која се разговараше за процесот на подготовка на законското решение за родова еднаквост и опсежните консултации што Министерството ги води со сите засегнати страни и институции.
Министерката Шахпаска информираше дека веќе е изготвена драфт верзија на Законот за родова еднаквост и дека до крајот на месецот се очекува и стручни лица од ЕУ да дадат мислење за првичната верзија.
„Ова законско решение го подготвуваме низ процес на широки консултации како со невладиниот сектор и експерти за човекови права, така и со сите институции кои ќе добијат одредени обврски и надлежности. Работната верзија на Законот веќе е презентиран и пред дел од пратениците и пратеничките во Собранието на Северна Македонија. Само на тој начин, преку широка дебата ќе добиеме добро решение кое ќе даде резултати“, информираше министерката Шахпаска и додаде дека на сличен начин преку широки консултации со опозицијата и со невладиниот сектор успеа со консензус да бидат усвоени законите за спречување дискриминација и насилство врз жените и семејно насилство.
Таа нагласи дека со новиот закон за родова еднаквост, кој се очекува да биде финализиран и пуштен во процедура кон крајот на оваа или на почетокот на идната година, се обезбедуваат три нови механизми кои ќе обезбедат зајакнат надзор на спроведувањето на политиките на родова еднаквост и на централно и на локално ниво, но и воведување на принципот на задолжително родово одговорно буџетирање за сите институции.
Секретарката на Венецијанската комисија, Граната Менгини, го поздрави процесот на подготовка на Законот за родова еднаквост и нагласи дека широките консултации се многу важни за креиање на добри законски решенија. Таа изрази задоволство што Венецијанската комисија е консултирана уште во рана фаза на неговата подготовка.
Истовремено министерката Шахпаска информираше дека со новиот системски закон за работни односи, кој е во завршна фаза, во рамките на породилното отсуство, се предвидува отсуство и за таткото, што е уште еден значаен чекор во градењето на рамноправност меѓу мажите и жените.
Граната Менгини го поздрави овој предлог и оцени дека на тој начин на жените им се дава можност да создаваат семејство, без притоа да трпи нивниот кариерен развој.
Министерката за труд и социјална политика Шахпаска учествуваше на тридневната 8ма Меѓународна конференција за жените Ромки и патувачи во организација на Совет на Европа во Стразбур, Франција, на која се разговараше и за правата на Ромките, но и влијанието на пандемијата Ковид-19 врз нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Истрага против уште едно лице за пожарот во кочански „Пулс“

Со истражната постапка за пожарот во кочанската дискотека „Пулс“ е опфатено уште едно лице за кое е поведена истрага за – Тешки дела против општата сигурност од член 292 во врска со член 288 од Кривичниот законик.
Во текот на досегашната постапка се обезбедија докази согласно кои за сега осомничениот се утврди дека е одговорно лице – реален сопственик на осомниченото правно лице – агенција за обезбедување на имот и лица од Скопје, извести Обвинителството.
Согласно доказите, тој раководел со деловниот потфат и целокупното работење на агенцијата, заедно со претходно осомничениот управител и со овластеното лице на подружницата во Кочани.
Тие без да имаат склучено договор со корисникот на услугата Кабаре ПУЛС Кочани, во текот на 2025 година вршеле обезбедување на имот и лица за клубот. Новиот осомничен во континуитет активно раководел со планот и начинот за давање на услугата обезбедување преку правното лице. Заедно со осомничените кои биле ангажирани како обезбедување, спротивно на повеќе членови од Законот за приватно обезбедување, без каква било претходна безбедносна проценка и план за обезбедување, како и без проверка на условите за противпожарна заштита и опасност од пожари, без да извршат проверка по однос на сигурносните услови во кабарето од аспект на имот и лица, особено по опасност и можност за евакуација, во текот на вечерта кога настанал пожарот не контролирале и овозможиле влез на деца во објектот, не воделе грижа за преполнетоста на капацитетот за посетители во објектот, не спречиле внес и користење на експлозивни материи – пиротехнички средства од членовите на музичката група, со кои бил предизвикан пожарот, поради што настапила смрт кај 62 лица, со тешки телесни повреди се здобиле 157 лица, а со телесни повреди се здобиле 54 лица.
Врз основа на судска наредба вчера беше извршен претрес на две локации во Скопје и во Пробиштип, како и во автомобилот на осомничениот, при што беше одземена обемна документација поврзана со правното лице и електронски уреди. Лицето е лишено од слобода и со оглед на сите околности и законски основи, јавниот обвинител денеска до судијата на претходна постапка од Основниот кривичен суд Кочани ќе достави предлог за определување мерка притвор.
Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.