Заменикот-министер за одбрана, Беким Максути, денеска во Скопје го отвори ориентацискиот курс за европската безбедносна и одбранбена политика, како дел од процесот за стабилизација и асоцијација во Унијата, соопштија од Министерството за одбрана.

Од Министерството за одбрана додаваат дека програмата за обука е наменета за земјите од Западниот Балкан, а има за цел да ја поддржи изградбата на национални административни капацитети од доменот на заедничката безбедносна политика на ЕУ.

„Република Македонија ја смета политиката на ЕУ за проширувањето како комплементарна на безбедносната политика бидејќи проширувањето се покажало како најуспешен инструмент за воведување  мир, стабилност, демократија, владеење на правото и просперитет“, рече Максути и додаде дека со заеднички фокус и здружени напори, ЕУ ќе биде поефикасна и посилна, зашто безбедносните предизвици бараат координирана акција.

„Македонија е успешен пример на заедничката безбедносна и одбранбена политика, трансформирајќи се за релативно краток временски период од земја корисник на првата воена операција на ЕУ, во земја контрибутор кон светскиот мир и безбедност учествувајќи во операции предводени од НАТО, ЕУ и ОН“, изјави заменик-министерот на отворањето на обуката порачувајќи дека државата останува посветена на градењето мостови на добрососедство и соработка во регионот.

Максути се заблагодари на австриското претседателство со Унијата, како организатор на обуката, и истакна дека благодарејќи на австрискиот ангажман, министерствата за одбрана на земјите од Западниот Балкан неодамна потпишаа и заедничка декларација за соработка во повеќе сегменти на заедничката безбедносна и одбранбена политика.

Од Македонија на овој курс учествуваат претставници од министерствата за одбрана, за надворешни и за внатрешни работи, Секретаријатот за европски прашања, Дирекцијата за безбедност на класифицирани информации.