Портпаролот на општина Гостивар, Јасин Демири, на денешната прес-конференција информираше дека од денеска се прекинува кампањата „Вистината за ДУИ”, но не затоа што нема нови докази за злоупотреби, туку за да се остави простор надлежните органи да дејствуваат во согласност со утврдените прекршоци.

„Сите повреди и злоупотреби кои сме ги утврдиле при внатрешните контроли, односно за сите случаи каде што постои основано сомнение за сторен прекршок или кривично дело, сме ги пријавиле пред надлежните органи: Министерството за внатрешни работи – Финансиска полиција, Јавно обвинителство“, истакна Демири

Тој рече дека покрај тоа што Општина Гостивар има побарано контрола од страна на државната ревизија, побарано е исто така и трудовата инспекција и Државниот инспекторат за образование да спроведат вонредни контроли со цел вистината да излезе на виделина и за каква било злоупотреба да се побара одговорност.

„Општина Гостивар ќе продолжи со внатрешни контроли за работата на општинските раководства во минатите мандати, без да се заобиколи и работата на општинската администрација во овој мандат. Значи, никој не може да бега од одговорност бидејќи никој не смее да биде над законот. Не постои човекот за државата, туку државата постои за човекот“, истакна општинскиот портпарол. Тој изрази уверување дека судскиот систем во земјава час поскоро ќе се реформира и сите прекрштели на законот и криминалците ќе ја добијат заслужената казна.