Со посета на делегацијата на НАТО, предводена од Џејмс Мекеј, директор на Евро-атлантско и глобално партнерство во одделот за политички и безбедносни прашања во штабот на НАТО во Брисел, денеска почна реализацијата на процесот за членство во НАТО.

Работната средба на експертските групи беше посветена на запознавање со процесите и процедурите во врска со процесот за членство во алијансата, како и за обврските што Македонија треба да ги исполни, како што се финализирањето на реформите за зајакнување на владеењето на правото, реформите во одбраната и во безбедносниот сектор.

На средбата беше истакнато дека најважно во оваа фаза е имплементацијата на договорот со Грција, како договор за македонската иднина, како договор што ги гарантира македонскиот идентитет и македонскиот јазик.

Со почетокот на овие пристапни разговори, беше истакнато на состанокот, Македонија ја исполнува својата стратешка цел како повеќегенерациски успех и како успех на сите институции, сите политички партии, цивилното општество и сите граѓани и ја остварува својата цел за безбедност, стабилност и сигурност како основа за дополнителен економски развој и подобра иднина за нејзините граѓани.

Во наредниот период на секои две-три недели работни групи на НАТО во различен состав ќе ја посетуваат земјата и со националните тимови ќе ги усогласуваат неопходните политики и стандарди до конечното официјализирање на членството на земјата во НАТО.

Работната група што присуствуваше на состанокот е составена од експерти од Кабинетот на претседателот на Владата, од Министерството за одбрана, од Министерството за надворешни работи, од Министерството за внатрешни работи, од Министерството за правда, од Министерството за финансии и од Министерството за информатичко општество и јавна администрација, што ја предводеше Стево Пендаровски, национален координатор за НАТО, а го придружуваше и државниот секретар во Министерството за надворешни работи, Виктор Димовски.