Македонија
Почнува десеттиот Летен кампус на Криволак и Пепелиште

Сто и дваесет питомци и студенти од Северна Македонија и 11 партнерски и пријателски земји во следните две недели ќе учествуваат на десеттиот Летен кампус кој во организација на Воената академија „Генерал Михаило Апостолски“ од денеска се реализира на полигонот „Криволак“ и тренинг-центарот „Пепелиште“.
На отворањето на кампусот, заменик-министер за одбрана, Беким Максути, истакна дека станува збор за уникатен проект кој овозможува питомци и студенти од повеќе земји да разменуваат искуства, да учат едни од други и да стекнуваат познанства.
„Северна Македонија ќе стане полноправен член на НАТО и кадетите од нашата Армија многу наскоро нивните пријатели од земјите членки на алијансата ќе можат да ги наречат не само партнери, туку и сојузници“, рече Максути.
Митко Богдановски, продекан на Воената академија, рече дека големиот број активности и богатата програма на кампусот е резултат на долгогодишното искуство и успешната реализација на овој кампус, чиј дел досега биле над 1.600 питомци и студенти од дваесетина земји.
„Нашата главна мисија е да создадеме силна мрежа помеѓу идните офицери и да ги подготвиме за идна интероперабилност и соработка, како и да постигнеме високо ниво на културолошка размена, со што ќе дадеме и голем придонес кон глобалниот мир и безбедност“, рече Богдановски.
Оваа година учесници на Кампусот се питомци и студенти од Република Северна Македонија, САД, Албанија, Бугарија, Босна и Херцеговина, Косово, Црна Гора, Романија, Германија, Хрватска, Чешка и Норвешка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Скандал е да се прави журка додека Македонија се уште тагува, скандал е да се пали пиротехника, која што е забранета, велат од СДММ

„Социјалдемократската младина на Македонија со згрозеност реагира на скандалозната и срамна прослава на УМС на ВМРО-ДПМНЕ. Додека родителите и семејствата се уште тагуваат за смрта на 62 деца, додека над 200 млади се борат со последиците од повредите, додека цела држава бара одговорност, помош и поддршка“, вели Марта Крстеска – Социјалдемократска младина на Македонија.
„Скандал е да се прави журка додека Македонија се уште тагува. Скандал е да му се аплаудира на Мицкоски за говор полн со омраза кон семејствата на повредените и загинатите во трагедијата во Кочани. Скандал е да се пали пиротехника, која што е забранета, но беше и причина за пожарот и големата трагедијата во Кочани.
Мицкоски ги третира младите како реквизити, како инструмент за неговите политички хирови. Ги користи младите за негово шоу, за манипулација. За да му аплаудираат додека го истура гневот кон семејствата кои загубија деца.
Ова е дрскост, бесчувствителност и целосна деградација на младите.
Бидејќи употребата на пиротехника е и законски забранета и казнива бараме МВР да постапи без одлагање – кој одобрил, кој набавил, кој наредил употреба на пиротехнички средства?
Ги повикуваме младите да го кренат својот глас против начинот на којшто Мицкоски и ВМРО-ДПМНЕ ги третираат.
Младите не се декор за митинзи, младите не се статисти за фештите на Мицкоски, младите се двигатели на општеството.
СДММ стои рамо до рамо со младите што бараат одговорност за Кочани, со младите што сакаат да им помогнат на семејствата на загинатите и поредените, со оние што знаат што значи човечност“, соопшти Марта Крстеска – Социјалдемократска младина на Македонија.
Македонија
Ослободителна пресуда за струшкиот градоначалник, Мерко законски го набавил луксузното „ауди“

Основниот суд во Струга го ослободи градоначалникот на Струга, Рамиз Мерко, кој беше обвинет за незаконска набавка на луксузното службено возило „ауди“ А6 од 67.000 евра и уште три други автомобили.
Судот не утврдил дека Мерко го прекршил законот при набавката на службените возила.
Мерко беше обвинет за злоупотреба на службента положба, поради набавката на четири моторни возила во вкупна вредност од околу 114.000 евра, во време кога општината имала долгови и блокирана жиро сметка.
Обвинението беше поднесено лани во март, а судскиот процес почна во април.
САД го ставија струшкиот градоначалник на таканаречената црна листа, со што го означија како генерално неподобен за влез во Соединетите Американски Држави поради негова вмешаност во значителна корупција.
Против Мерко има девет обвиненија за несовесно работење, за бесправно градење, како и за фалсификување исправа.
Македонија
Викендов казнети 1.077 возачи, најмногу од нив возеле без возачка дозвола

Во деновите од изминатиот викенд (07./08.06.2025) како резултат на редовните сообраќајни контроли на патиштата низ земјава, од вкупно 1.077 издадени платни налози дури 174 прекршоци се однесуваат на возачи кои што учествувале во сообраќајот без возачка дозвола, 65 возачи возеле под дејство на алкохол и исклучени се од сообраќај, додека пак 172 возачи на мотоцикли се санкционирани за неносење на заштитна кацига.
Инаку, согласно одредбите од Законот за безбедност на сообраќајот на патиштата 156 прекршоци во текот на викендот се однесуваат на непочитување на пропишаната брзина на движење, 149 за недозволено паркирање, додека пак санкционирани се 58 лица кои некористеле сигурносен појас, изречени се 24 мерки за користење мобилен телефон при возење, осум санкции за минување на црвено светло, а изречени се и три прекршоци за возачи на електрични тротинети.
Исто така, 49 возила биле отстранети заради тоа што биле нерегистрирани, а седум возила заради техничка неисправност.
„Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, велат од МВР.